Кас õли немцаа маалл. Иэлмуйнаа сиӓлл õли вӓчи сэлчиӓб кõйкõлõõ элӓмӓллээ. А куй козиттии вӓллӓӓ ноуриккõата, жениха эб тӓӓтӓннӱ. И нуориккõ женихаа бõллу нӓхнӱ. Ӱхэлл хэрралла õли илоза тӱтӓр кõлтõйзии ивуухсиикаа. Кõркõат казвуа, и айвуо чӓбиjӓ. Туливад тõйзõсс лиднасса хэрра фровваакаа нӓннээ талуо вõõраазии. И нӓӱ̆ттии нӓйлээ чӓбиjӓ инеэхмиинэ. Õли нӓйл ӱфс пойка. И тахтозивад найттаа. И чӓбиjӓӓт тӱттӓриккуа мэхэлээ вõттаа. Пойгаа найттивад. Тэчивӓд пулмад. Чиирээ каўтõõ пулмад мӓнџиттии. И эйтэттии макаамаа нуорõд. А тӓмӓ эб ванну кõлтайзии ивуухсии. Уомнииз вааттõ, этти кõлтайзõд ивуухсэд. И челлэйд эб юоллу, и ёхси пакуо.

Мэни паллё вуосиита. А нуориккõ айн элӓб сиин куоза нӓннээкаа. А женихаа эб тӓӓ. И юолтии, этти паха вэй женихаа. И тули тӓдилт чиръя каўкаа лиднасса, вõõраа куникаа маалт, этти мэйлл он нӱд мокома муода, этти жениха эциб нуориккõа суурõсс арттэлиасса. Тӓмӓ дуумаз мэннӓ синнэ элӓмӓӓ тӓдилээ. И тули сэ пӓйвӓ, кõõз õли суури арттэлиа тӱттӓрии копитõтту. И вот, тӱттӓрэд кõйкк õливад илозиис сõпõйз. Иссузивад рӓӓтуа мӱӧ. Суури рихи õли ё тӓӱ̆нӓӓ вӓчиӓ. Тилаа энӓпӓӓ бõллу. А сэ мэни, тӓмӓӓ найнõ виимэйзэсси вааттамаа. И тилаа бõллу, кухõõ иссуа. А тӓм jӓй сõйсомаа ахъюо тӱвээ нурккаа.

Вот, тули жениха. Жениха тулõб иэзӓ. Тӓлл он сининэ рӓттэ чӓезӓ. Кумпа нõõб нуорикõсс вõттамаа, сэнэлээ панõб пихаа пӓӓлээ. Мэни тӓм партии лӓпи. Эб нӓӱ̆тиннӱ ӱфсиид. Сиз мэни нурккаа, сõйзатту. Сиз ваатаб: сõйзоб ахъюо таканн виэл ӱфси. И тӓм мэни тӓмӓӓ тӱвээ. Эб тунтõнну, этти тӓмӓӓ найнõ, куммаа тӓмӓ jӓтти. Пани пихаа пӓӓлээ синизээ рӓтээ. И куцуб танццимаа. А тӓмӓ эйттӱ. И вӓризэб. И дуумааб ко туннõб, сиз аяб вӓллӓӓ. А ко тõйзõлõ найсиуб, нии миллõ паха миэли лиэнэб. Нӱд нӓмӓ танццизивад. Тӓм тахтõ лангõта маалõõ. Жениха чиин пити. Эб тунтõнну, ко танццизивад.

Тӓм ёхси пакуо. И мэни саадуусõõ. Садуз õли брууда. Бруудаа ранназ õли jӓрчӱ. Тӓм иссуб и идгõб. И кõвии нõйсии энэскаа паяттамаа: «Но ко тӓмӓ минуу миэз. Да нõйзõб õнõвасс элӓмӓӓ тõйзõõкаа, миллõ лиэб паха миэли».

А тӓмӓ койрõйкаа ёхси тӓтӓ эццимӓӓ. Сõйзоб тӓмӓӓ сэллӓӓ таканн. И куултааб, митӓ паятаб. А тӓмӓ эб тӓӓтӓннӱ. Вõтти тӓтӓ чиини. И: «Охт силлõ иткõа, юттõõб тӓллээ. Тиэммӓ пулмад. Миӓ вõтан синуа мэхэлээ».

А тӓм юттõль вассаа: «Сиӓ кõлтайзиисс ивуухсиисс ёхзид пакуо, нику минуу миэз õли. Я jӓтти минуу».

А тӓм чӱзӱб: «Милтизэсс сиӓ лиднасс õлõд туллу?»

Тӓмӓ юттõли лиднаа. Сиз миэз вõтти энтӓӓс ивуухсиисс чиини. И юттõли: «Куй миӓ õлин хуллу! Мокомаа чӓбиjӓӓ найзõõ jӓтин. Мааилмас тõйсс мокомаа бõлõ».