Нэстэри
Иэл õли мээс, Нэстэрихси ситӓ куцуттии.
Тӓллӓ куус пойкаа. Тӓмӓ ли чӧӱ̆хӱкконээ. Юттээб: «Пиӓб мэннӓ Юмалалта чӱсӱмӓӓсэ
армоота, куй чӓсэб сӧӧттӓӓ Юмала минуу лахсай я миллэ энэлэни сӱввӓ аннаб».
Мээб тээтӓ мӧӧ, туэб пӱхӓ Пэтро вассаа,
чӱсӱб: «Кухõ сиӓ, Нэстэри, мээт?» -- «Лӓхэн Юмалалта чӱсӱмӓӓсэ, куй чӓсэб сӧӧттӓӓ
минуу лахсай я миллэ энэлэни сӱввӓ аннаб». – «Лӓхэ минуукаа ӱхэзӓ».
Мэнти ӱхэзӓ Юмалалэ саа. Пэтро
юттэли Нэстэрилэ: «Сиӓ ооттээ минуа õввэза». – «А куй сиӓ минуа унохтат, эт
юттээ Юмалалэ, митӓ миӓ тулин; анна миллэ ялкумэт, сиис сиӓ эт унохта минуа». –
Пэтро антõй ялкумэт, а унохти Нэстэрии, эб юэллу Юмалалэ Нэстэрии асъята. Пэтро
тули вӓллӓӓ Юмалалта, нõйси омаса õпосэлэ сэлчӓӓсэ нõйсэмаасэ, эб õллу ялкумиита.
Сиис васса мӓлэхти Нэстэрии. Мэни тагаас Юмалаа тӱвэ. Юмала нõйси чӱсӱмӓӓсэ: «Митӓ
сиӓ тулит тагаас?» – Пэтро юттэли: «Тулин
тагаас Нэстэрии пэрӓсс, тӓлл эб оэ митӓ сӱввӓ». – «Ла Нэстэри вõтаб волгахси хот
ченэлтӓ хот лэйпӓ, хот дэнггаа; куй туллас вõлкаа саамаасэ вӓллӓӓ, ла ванноб кõлмэ
кертаа, што эб вõтанну, да кõйкки прошеной лээнэб». – Пэтро тули да паятти: «Нии
ситӓ вииттӓ чӓхси Юмала вõлкаа вõттамаасэ и ванномаасэ кõлмэ кертаа, што эб вõтанну,
да кõйкки лээнэб прошеной». – Пэтро нõйси опосэлээ сэлчӓӓсэ нõйсээмаасэ,
Нэстэри б ялкумиита анна, ванноб кõлмэ кертаа: «Ей богу, эн вõтанну!» – Пэтро юттээб
ихсэ энэллэсӓ: «Тӓмӓ б лээнэ вõтанну», да лӓхси вӓллӓӓ.
Нэстэри тули котоосэ да ухсээ пэӓлэ рипусси
ялкумэт. Мээб хэрра тээтӓ мӧӧ, аяттэлеб: кассэна он култа-маастэри, кумба култадзиа
ялкумиита туннэб тэхӓ. Куцарилэ юттээб: «Пиӓ чинни опонээ, ла миӓ лӓхэн чӓссэн
тэхӓ култадзэт ялкумэт энэлэни». Хэрра сэ мээб рихээсэ, чӱсӱб: «Сиӓ õлэт
ялкумиеэ маастэри?» – Нэстэри вассаси: «Õлэн». – «Этко вõта миллэ тэхӓ кулласс ялкумиита?»
– «Тэчейсин, а боэ култаа, минэсс тэхӓ». Хэрра тӓллэ култаа антõй, минэсс тэхӓ,
да антõй õпеата. Сиис юттээб: «Кõс сиӓ тээт?» – Тӓмӓ юттэли вассаа: «Миӓ куй
саан валмиихси, ихсэ тоон силлэ ялкумэт».
Хэрра ооттамаасэ тӓтӓ, ооттэли,
ооттэли, михси нии каўгаа тӓмӓ б тоо. Мэни айкаа ӱвӓ пала, тули ихсэ õцимаасэ. Õци
Нэстэрии да лӧӱ̆ти юттээб Нэстэрилэ: «Михси сиӓ миллэ эт тоону ялкумиита?» –
Нэстэри вассаси: «Миӓ ялкумиита эн туннэ тэхӓ», да нõйси риитээмӓӓсэ. – Хэрра юттээб:
«Сиӓ милта вõтит сэйцеэ сатаа дэнггойта, да вõтит култаа да õпеата, да
ялкумиита эт тэхнӱ; лӓхэ нӱд минуукаа суутоосэ, сэӓл суввитас». – Нэстэри юттээб
хэрралэ: «Миӓ эн вõй мэннӓ синуукаа, õлэн кõлмэ пӓйвӓӓ ё сӧӧмӓттӓ». – Хэрра сӧӧтти.
– Тӓмӓ сиис юттээб: «Миӓ õлэн ченнӓттӓ, эн вõй мэннӓ». – Хэрра тӓллэ антõй омаса
сааппогат ялкаасэ. – Сиис юттээб: «Миӓ õлэн ӱхэлӓ чуутола вайтас, энӓпӓӓ сõпõйта
бõлэ, эн вõй тулла синуукаа». – Хэрра шуубаа ӱлэ антõй омаса, сиис вэй карэтиза
тӓмӓӓ суутоосэ.
Мэнтии суутоосэ, хэрра юттээб: «Ситӓ
да ситӓ вииттӓ Нэстэри дэнггат, куллат, õпеат вõтти, да ялкумиита б тэхнӱ». –
Нэстэри юттээб: «Пэттээб хэрра минуу пӓӓлээ тӱхjӓӓ; хэрра пошалуй юттээб, што он
милла тӓмӓӓ сааппогат ялгаза». – Хэрра ваатаб ялкоеэ пӓӓлэ: «Минуу онни
сааппогат ялгаза». – Нэстэри юттээб: «Сиӓ вээлӓ пошалуй вõйт юэлла, што милла синуу
шууба он ӱллӓ». – Хэрра ваатаб тӓмӓӓ пӓӓлэ: «Минуу онни шууба силла ӱллӓ». – «Вот
сууто нӓэб, што тӓмӓ тӱхjӓӓ пэттээб минуу пӓӓлэ», – юттээб Нэстэри и сиис кõлмэ
кертаа ванноб, што «Ей богу, мии эн вõтанну!» да кõйкки прошеной õли. – Нэстэри
риккаахси пӓӓси, ни ченэлэ б ооли махсаа, хот митӓ вõлгахси вõтти.
| 
