Оли эннэ кунигаз, и кунигахал оли колд пойкаа. Кунигахал оли ойкии кӓппиӓ сааду. Саауз казвойд култайст оммээнад. Ёкко ӧӧ айн кӓӱ̆тии варастамааз. Кунигаз луги оммээнад ӱхэст пууст, я ёкко ӧӧ хӓввииз ӱкс оммээна.

Сиид кунигаз лӓхэтти ванхэмман пойкаха вахтии, эйг табаяйз варааст. Сэ пойга мӓни вахтии, хэйттииз маккаамаа, эйг нӓхнӱд варааст. Мӓни хоомуксэст коттии. Ӓтти кӱссӱӱ: «Нӓйт-кӓ варааст?» Пойга санноо: «Эн нӓхт». Тойзээл ӧӧл мӓни тойнэ пойга. Мӓни дай хэйттииз маккаамаа, я маккайз тааз хоомуксээ нассээ. Мӓннӧӧ коттии тааз. Ӓтти кӱссӱӱ: «Нӓйт-кӓ варааст?» – «Эн нӓхт». Колманнэхээл ӧӧл мӓни колмааз пойга. Мӓни я нойзи вахтимаа, я хӓӓ вахти поол ӧӧхӧ нассэ. Поолэн ӧӧн айкой тули вараз. Лэнзи линду. Линнул оллиид култайст суллад хӓннӓӓз. Пойга амбуй линтуа. Линнулд ланкэйз ӱкс култайн сулга. Пойга отти сулан я вэй вахтихоонэхэссэ. Итсэ хэйттииз маккаамаа. Тули кунигаз катсомаа: каннээл оли култайн сулга. Кунигаз катсой и мӓни пойз. Пойга нойзи ӱллӓӓ я отти сулан я вэй ӓдиллээ. Ӓтти кӱссӱӱ: «Куй сиӓ сайд?» Пойга санноо: «Миӓ варааст эн таванд, а нӓйн». Сиид ӓтти санноо: «Питтӓӓ мӓннӓ этсимӓӓ варааст», – я  андой кайгиллэ колмэллэ пояллээ хэппойст.

И пояд лӓксиид этсимӓӓ. Мӓнниид колмэн кээзэн тээдӓ мӧӧдӓ и тули колд тээнхаараа. Хӧӧ лӓксиид кайг эри тээллэ. Ноорэмб пойга мӓни ойгиаа кӓттээ. Мӓни тээдӓ мӧӧдӓ и нӓги сутта тээн ӓӓрээст. Хӓнэлл оли пӱссӱ кэра, и тахтой ампуа сутта. Сузи нойзи лӓккӓӓмӓӓ и санноо: «Элӓ амму миннуа. Сао миуллэ, куху сиӓ таход мӓннӓ». Пойга санноо: «Миӓ мӓӓн этсимӓӓ линтуа, кумба варасти мэйен омэниа». Сузи санноо: «Лаккаа оммааз хэбойсээз тӓхӓ, истуу миуллэ сэлкӓӓ, и лӓхэммӓ мӓнӧмӓӓ». Пойга истуйз суэллэ сэлкӓӓ, и хӧӧ мӓнниид ӱли ӱхэксӓн кунигахан риигин. Сээл оли сэ линду, мигӓ варасти омэниа. Сиид сэ сузи саой: «Миӓ йӓӓн тӓхӓ, а сиӓ мӓӓ варастаммаа линтуа», – и саой пояллэ: «Линду он пахайсээз клэткааз». Сузи саой: «Ода линду, элӓ кэрдӓ клэткаа». Пойга мӓни линтуа оттамаа. Я сиид туумаяа: «Куйн миӓ одан линнун, а клэткаа эн кэрдӓ?». Отти линнун и клэткан. Нойз туломаа пойз, и одэттии киин. Я кунигахаал оли саотту: «Кэн сэнэн линнун варастаа, ниин сиид силл кэррал табэтаа». И вээтии сэ пойга кунигахаллэ, я кунигаз кӱзӱй: «Кэнэн сиӓ оод пойга я куст сиӓ оод?» Пойга саой: «Миӓ оон кунигахан пойга, я миун ӓттиин лӓхэтти этсимӓӓ тӓдӓ линтуа. Тӓмӓ линту кӓй мэйен саауз я варасти омэниа. Мӧӧ киин эммӓ таваннэхэд, а нӓйммӓ, ёд оли тӓмӓ линду. Я сиид лӓксиммӓ этсимӓӓ. Я нӱд миӓ пуудуйн киин». Я сиид нойзи ругоэломаа, ёд ластайз хӓнд пойз. Сиид кунигаз саой: «Ку тоод миуллэ тойзэлд кунигахалд хэппойзэн кулдахаръян».

Я сэ пойга лӓкси саамаа хэвойст. Мӓни, истуйз суэллэ тааз сэлкӓӓ. Я лӓксиид синнэ кунигахаллэ хэвойст саамаа. Мӓнниид синнэ. Сузи саой тааз: «Нӱд, ку мӓӓд, нии ода хэппойн илма суйтсида. А ку одад суйтсиин кэра, сиид тааз пуудуд киин». Я сэ пойга лӓкси хэвойст саамаа и туумаяа: «Куйн миӓ одан хэппойзэн илма суйтсида, лаа одан суйтсэтки». Отти суйтсэт я пани хэппойзэн пӓӓхӓ. Нойзи тоомаа хэвойст, и сиин пайгааз одэттии хӓӓ тааз киин и вээтии кунигахаллэ. Кунигаз санноо: «Куйн сиӓ роохид хэвойст варастаа?» Я хӓӓ кӓй ругоэломаа: «Лазэ миннуа пойз, миӓ тээн, минэн сиӓ кӓзэд». Я кунигаз санноо: «Ку тээд сэнэн, минэн миӓ кӓзэн, ку тоод миуллэ сээлд кунигахан риигист тӱдӧйн, сиид миӓ аннан сиуллэ тӓмӓн хэппойзэн».

И пойга лӓкси этсимӓӓ тӱттӧйӓ и мӧрни тааз суэллэ. Сузи тули я кӓй хӓнд торумаа: «Микс сиӓ тэйд ниин, куй миӓ эн кӓскэнд?» Я пойга истуйз суэллэ сэлкӓӓ, я лӓксиид мӓнӧмӓӓ. И мӓнниид синнэ кунигахан рииккии. Сиид сузи саой: «Нӱд куунтэлэ миннуа, ода тӱттӧй; нӱд эй оо ассиа сиун, нӱд он ассиа миун. Оо сиӓ нӱд тӓсс, а миӓ мӓӓн саамаа тӱттӧйӓ». Я сузи мӓни синнэ саатуу, истуйз пэхкоо и сэн тробан кохаллэ, михэ туллоо куляйттаммаа кунигахан тӱттӧй. Тӱттӧй лӓкси куляйттаммаа нӓнткӧйн кэра, и мӓнниид сиихэ суэн кохтаа, и сузи отти сэнэн тӱдӧйн и вэй синнэ, миз оли сэ пойга. И мӓнниид поян лоокс. Тӱттӧй и пойга истуйсиид суэллэ сэлкӓӓ и мӓнниид синнэ рииккии, миз оли хэппойн кулдахаръя. И сузи сиид саой пояллэ: «Сиуллэ он саали антаа тӱттӧйӓ. Но, миӓ нойзэн тӱдӧйкс, а сиӓ хэйдӓ тӱттӧй тӓхӓ. И пойга йӓтти тӱдӧйн сиихэ, и итсэ лӓкси суэн кэра. Я сэ сузи нойзи тӱдӧйкс, я сиид мӓнниид кунигахаллэ. Я кунигаз андой сэнэн хэппойзэн. Пойга отти хэппойзэн я лӓкси пойз. Кунигаз лӓкси куляйттаммаа, я сиид мӓнниид саатуу, я сузи и пакээни. И мӓни поян лоокс, истуйз сиид сэлкӓӓ, и мӓнниид синнэ кунигахаллэ, миз оли кӓппиӓ линду. Сиид сузи саой: «Сиуллэ он саали анта хэвойст, миӓ нойзэн хэбойзэкс, я сиид лӓхэммӓ кахэн кэзэн». Я сузи нойзи хэбойзэкс, я мӓнниид кунигахаллэ. И пойга андой хэппойзэн, итсэ отти линнун и лӓкси пойз, а кунигаз отти хэппойзэн я лӓкси куляйттаммаа хэбойзээл я катсомаа хӱввӓӓ хэвойст. Истуйз сэлкӓӓ. Сузи куй пӧӧрӓхти, я кунигаз ланкэйз мааха сэлӓст и вайёйз мааха, я сузи паккээни. Мӓни синнэ, миз оллиид тӱттӧй я пойга. Сиид пойга истуйз суэллэ сэлкӓӓ, тӱттӧй истуйз хэбойзэллэ. Лӓксиид мӓнӧмӓӓ.

Сиид сэ пойга кӱссӱӱ суэлд: «Эткӓ сиӓ тииӓ, миз овад миун вэлйӓӓнд?». Сузи саой: «Миӓ тииӓн, миз овад сиун вэлйӓӓст, муд эй ваа кэлпаа сиуллэ санноа». Пойга кӓй кӱзӱмӓӓ: «Сао, миз овад миун вэлйӓӓнд?». Сузи саой хӓнэллэ: «Вэлйӓӓст тэккӧӧд сиуллэ пахайсээст». Пойга саой: «Эвӓд тээ миуллэ миун вэлйӓӓнд пахайсээст». Сузи саой: «Сиун вэлйӓӓст овад сээл хартсэнойз я тиўккаад карттаа». Сиид пойга лӓкси синнэ, миз оллиид хӓнэн вэлйӓхӓд. Вэлйиил оли саадэтту ё хэппойст. Я сиид тиўгэттии ё пӓййен пӓӓллэ. «Тӓмӓн нӱд ёс саадамма, сиид аннамма омад пӓӓд». Ё сиид ёўдуй ноорэмб вэлйӓ сиихэ, ости хэйллэ хэппойсэд йӓллэ, я сиид лӓксиид мӓнӧмӓӓ коттии. Нойссиид ванхэммад вэлъед туумаамаа, ёд ноорэмб вэлйӓ сай тӓмӓн линнун я хэппойзэн. «Куйн мӧӧ нӱд мӓӓммӓ коттии? Ӓтти нойсоо мэйдӓ торумаа. Нӱд табамма тӓмӓн вэлйӓн». А вэлйӓӓ сидӓ нугутти коваст. Вэлйӓ хэйттииз маккаамаа. Хӧӧ оттиид таппойд сэнэн вэлйӓн, я итсэ лӓксиид мӓнӧмӓӓ коттии. Мӓнниид коттии, саннойд ӓдиллэссэ: «Мӧӧ саймма нӓмӓд линнуд я хэппойст». Ӓтти киитти хэйдӓ, я сиид ванхэмб пойга тахтой оттаа тӱттӧйӓ найзэксээ я нойзи пулмиа пидӓмӓӓ.

Я сиид ёўдуй суур нойда, пани хэйед кайг маккаамаа я итсэ варасти тӱдӧйн я вэй итсэллээ. Сиид сузи мӓни катсомаа сидӓ пойкаа, мигӓ оли табэтту. Сузи сай вариксэнпоян киин. Вариз тули кӱзӱмӓӓ пойкаатаа. Сузи саой: «Миӓ эн анна сиуллэ пойкаа, куннииз эд тоо элогаст я кооллутта вэттӓ». Вариз мӓни, той кахэллааяйст вэттӓ. Сузи отти, кастой пойкаа, я пойга нойзи ӱллӓӓ. Сиид сузи саой: «Мидӓ сиун вэлйӓӓст тэккиид? Хӧӧ сиун таппойд. Сиӓ нӱд мӓӓ этсимӓӓ йӓллээ тӱттӧйӓ. Лӓхэ нӱд мӓнӧмӓӓ тӓхӓ суурээ мэтсӓӓ».

И пойга лӓкси. Мӓни ниин кавван, ку тули вастаа коди. Мӓни хӓӓ сиихэ коттии. Сиин коиз оли ӱкс ванха акка. Сэ акка кӱзӱй: «Михэ сиӓ нӱд мӓӓд?» Пойга саой: «Мӓӓн этсимӓӓ йӓллээ тӱттӧйӓ». Акка нэввой пояллэ: «Сиӓ нӱд мӓӓ ӱли ӱхэксӓн мэрэн. Сээл он суур тамми, таммэн алл он суур кирсто, я кирссооз он суур йӓниз. Йӓниксээз он сорза, сорзааз он муна, мунааз он пахалайзэн хэнги». И пойга лӓкси мӓнӧмӓӓ.

Мӓннӧӧ тээдӓ мӧйд я катсоо: таппэлоод колд пахалайст. Сэ пойга кӱссӱӱ: «Мидӓ тӧӧ таппэлэтта?» Пахалайст саннойд: «Саймма колд риистаа, нии эммӓ тииӓ, куйн яккаа». Пойга саой хэйллэ: «Миӓ обассан тэйллэ, куйн яккаа; миӓ лазэн пӱссӱӱст лоойн мэтсӓӓ. Кумба сааб сэнэн лоойн я тооб миуллэ, силлэ сиид кайг нэ риссад». Пойга лӓкси лоойн мэтсӓӓ, я хӧӧ лӓксиид этсимӓӓ. Пойга отти нэ риссад и мӓни пойз. Сиид мӓни синнэ, миз оли суур тамми, я отти таммэн алд кирссон. Кирссоост сай йӓниксэн, я йӓниксээст сай сорзан, сорзааст сай мунан я сиид лӓкси туломаа йӓллээ.

Мӓни синнэ пахалайзэллэ оттамаа сидӓ тӱттӧйӓ. Сид хӓнэл оли моккоома хатту. Пани сэнэн хадун пӓӓхӓ: сиид хӓнд эй нӓхт миккӓӓ. И сиид мӓни пахалайзэллэ, кӱзӱй: «Анна пойз тӱттӧй!» Пахалайн санноо: «Мигӓ сиӓ оод?» – «Миӓ оон, – санноо, – инхимин». Сиид отти сэнэн мунан кормунааст я риккой. Сиид пахалайн кооли. Отти сэнэн тӱдӧйн я отти сойдун и лӓкс мӓнӧмӓӓ коттии.

И мӓни синнэ ӓдиллээ. Сээл кайг магасиид. Хӓӓ нойзи силл сойдул сойттамаа, я вӓги нойзи кайг ӱллӓӓ. Я сиид саой ӓдиллээ: «Мидӓ тӧӧ нӱд пулмиа пиӓттӓ?» Ӓтти лӓккӓйз хӓнэллэ, куйн оллиид кайг ассиад. Сиид пойга саой: «Хӧӧ миун таппойд, итсэ оттиид тӱдӧйн и хэппойзэн, и линнун». Сиид ӓтти отти ванхэммад пояд я сидой хэппойзэн хӓнтӓӓ, я моллоомад рэвитти. Нойстии пидӓмӓӓ пулмиа ноорэммаллэ пояллэ. Кутсуттии сэ сузи пулмии, я сузи тули колмээл хэбойсээл. Сиид нойстии ёомаа я сӧӧмӓӓ.