Õли ӱхэлл старухалла и старикалла вохо. Старуха мэни обахкаа. А старикка jӓй пӓрваккаа тэчемӓӓ. А старуха юттõли: «Сиӓ сӱӧта вохуа, и юота».

А старикка унохти. Нӓеб, этти старуха тулõб котуосõõ мэцӓссӓ. Тӓмӓ руозгаа чӓтээ, да õввõсс аяб вохуата сӱӧмӓӓ õввõõ тагаа. А сиӓлл õли пиккарайн õя. А тӓмӓ ӱли õяа аjõ вохуо. Тулõб старуха аккунналаа. А тӓмӓ вохуо чӓӓнти тагааз. Старуха чӱзӱб вохолт: «Õлõдко сиӓ сӱӧннӱ, Марффани, я юонну?»

Юттõõб тӓллээ вохо: «Ӱлээ рохуо ёхзин. А сӱввӓ эн саанну. А ӱлээ виэ сõввин, ювва эн саанну. Ку нӱд õлла касõнн пӓйвӓӓ õннõтуо? Руозгалл урвотõтти нику урпа-вицалла. Вайт кõвõпии вайваттии милл он пиччӓ вилла, и рааной эб нӓӱ̆».

«А чен синуа лэй?»

«Фуома сидой-парта».

И суссõда õли Фуома, и сидой-парта. Старуха обахкойкаа ёхси суссõдаа. А сэ старикка мэнэб вэттӓ туомаа. Тулõб панкõйкаа вассаа. А тӓм вõтти паррас чиин. И алкõ тӓллээ обахкой сухõõ тõўккиа: «Сӱӧ, лõхкõõ! Ӓлӓ раддё минуу вохуа!»

А Марффа такаа рӓӓгаб: «Õма старикка лэй. И слифкой миӓ тӓллээ эн анна».

А старикка юттõли: «Мэнэ ванапагана! Мэццӓ-алтиад хуллуссамаа пантии, тулид обахкой сухõõ тõўккимаа. Да кõйкõõ парраа вэрэлээ раткозид. Таўкõõ сиӓ уомõнна мэццӓ-хаамойкаа ӱхтээ».