Варõз я мато 

Ранналл варõз вааттõ ӱввӓӓ суурõõ пуу. Сиӓлл тэчи õммаа пэззӓӓ. Пани мунад. Иссу мунõеэ пӓӓлл. А ко пойгад ё лӓхсивӓд, тӓм лэнтии õццимаа сӧӧккиа пойкõõлõõ. Сэннээ пуу юурõõ алл õли мусса мато. Куй ва варõз лэнтии вӓллӓӓ пэзӓссӓ, мато мэни пуут мӧӧ я вõтти ӱххээ пойгаа и сэй. Варõз тули и нӓэб: ӱхтӓ пойкаа бõõ: рӓӓку, рӓӓку, эб тӓӓ, чен вõтти, куххõõ пойка мэни. Эб мэннӱ нӓтэлиӓ, куй тӓллээ эб jӓӓннӱ ӱхтӓ пойкаа. Варõз рӓӓку, сõйттõли. Эб тӓӓ ченнээ пӓӓлээ сõйтõлла. Нõйс тааз мунõмаа. И тэчи тõйзõд пойгад. Мато вэй кõйкк нии ку эсимэйзэд пойгад. Варõз нӓчи, ку тӓм вэй виимэйзээ пойгаа. Варõз нӓчи, этти мато он вӓӓри. Тӓм вэй. Лэнтэли, лэнтэли, рӓӓку, рӓӓку. А мато сэй пойгаа.

Варõз дуумааб: «Митӓ нӱд тэхӓ? Куй маоокаа õлла?» Мэни варõз рэволõõ. Юттõли тӓллээ кõйкк õмад аззяд. И чӱзӱб: «Куй алъяа сэ мато вӓллӓӓ, и саавва тэхӓ пойгад?»

Рэпо и юттõõб: «Миӓ синнуу õпõтан. Миӓ õõн виизаз. Кассээ jõккõõ чӓӱ̆б уюмаа куникаа тӱтӓр. Кõõз мээб уюмаа, jӓтӓб õмад култõзõд туннид. Сиӓ ваата, куххõõ тӓм jӓтӓб, вõта нээ туннид. И лэнтӓӓ синнэ, куза он мато. Ва элӓ лэнтӓӓ айвоо кõркõалл. Куникаа тӱттӓрээ рахваз нӓчевӓд, этти сиӓ вõтид туннид. Ёхсõвад синуу таккаа. А сиӓ паа туннид маолõõ, юурõõ аллаа, куза тӓмӓ элӓб. А сиз и ваата, митӓ сэнэсс лээб».

Нии варõз и тэчи. Пани туннид маолõõ юурõõ аллаа, а иззэ иссуус пуу õхзалõõ. Куникаа тӱттӓрээ рахваз тули. Нӓчи, этти тӓм синнэ пани туннид. А иззэ исуб пуу õхзалл. Тӓл тунниа бõõ. Нӓвӓд нõйстии сиӓлл õццимаа. Вааттавад: туннид овад сиӓлл. Я туннии тӱвэнн он суур мусса мато. Вайкка мато эби вõтанну тунниа, но рахваз тӓммӓӓ таппõ, а варõз вõйс тэхӓ пойкõй. Ченниид тӓллээ эб мӓсӓннӱ.

Лахсõнн куулин.