Õли куниказ каўкан маалла. Õли тӓлл кõм тӱтӓртӓ. Тӱттӓрэд чӓӱ̆сивӓд jõгõõ рантаа уюмаа. Ӱхэлл кõртаа тули суур туули. И туулиспӓӓ вэй кõйкк кõм тӱтӓрт. Куникаалõõ тули юттõõмаа палвõлия. Юттõли: «Синуу тӱттӓрэт туулиспӓӓ вэй, пӧллӱннӓ. Эби нӓчӱннӱ пӧллӱз».

«А кухõппуолõ вэй?» – куниказ чӱсӱ.

«Ӱли суурõõ jõгõõ».

Куниказ нõйси дуумаамаа, кут лэӱ̆тӓӓ тӱттӓриитӓ. Вот куниказ тõйзõлл пӓйвӓӓ уомнииз варай куццõ куй мõнт руотиа солдаттай. И антõ луваа: кумпа вõтаб лэӱ̆тӓӓ тӓмӓӓ тӱттӓрэд, сэнэлээ аннаб пуол рииккиӓ. Ко он холостой, сиз вõттагуо хоть куммаа тӱттӓрээ тахоб. Вот ӱфси нуориисса, эсимэйн вуоси õли сõтамэхэннӓ. И тӓм и юттõли куникаалõõ: «Вот, миӓ вõтан пӓӓлээз лэӱ̆тӓӓ. Вайт анна миллõ баабушкаллõõссаа чӓввӓ. А миллõ анна кõм руотиа солдаттай и лайва, и лайваасõõ кõлмõсс вуввõсс панõ сӱввӓ.

Куниказ лахчи баабушкаллõ. И тӓмӓ ӱли кõлмõõ пӓйвӓӓ баабушкалт тули. И кõйкк кõм руотиа õлтии чериккоз и причастиа вõттивад. И тӓмӓ вõтти. И силл пӓйвӓӓ лайваакаа мэнивӓд. Мэнивӓд коко вуввõõ вэттӓ мӱӧ. И сис пууттузивад островаа. Мэнивӓд лайвалл синнэ. Сиӓл мõнõллайзõд линнуд и мõнõллайзõд пӓхчинӓд казвивад. И мõнõллайзõд маръяд и мõнõллайзõд õўнад. И валкõа маачиви õли. И чивэз õли пиккарайн пууговицца. И сõтамиэз вõтти пууговицаа пӓӓлээ таллаз ялгаакаа. Мõнõллайзõд звиэрит туливад тӱвээ. Култакарвад оленид туливад, õпõзõд кабъяд пõдрад, култащетинад каруд и кõйкии лаўлулл тултии. Линнуд вилисэлтии. Тули виимэйзэсси лэфф. Инеэхмиизээ ӓӓлэлл паятаб. И эйттӱзивӓд солдатид.

Лэфф и юттõõб нӓйлээ: «Тӱӧ мэйт ӓлкаа пэлчӓӓгаа. Мӱӧ лиэммӓ тэдде лангод илма лахъёйтта».

Но сис тӓм чӱзӱб: «Юолкаа, куза он куникаа тӱттӓрэд, вассõзõд лангод!»

А нӓмӓ юттõõвад: «Вот, мэнкаа тагõпаа. А вӓхӓнайкаа виэл мэйлл вõõрассõлõгаа.

Туотии нӓйлээ калойт. Туотии линтуй, жааритõтту. Сӱӧтэттии и юотõттии нӓмӓ. Нӱд нӓмӓ пакõниивад звиэрииссӓ. Мэнивӓд тõйсõõ рантаа островаз. Сиӓл линту паятаб инеэхмиизээ чиэлэлл. И юттõõб нӓйлээ: «Мэнкаа тагõпаа õя мӱӧ». Сиӓл куникаа тӱттӓрэд уювад кõйкии кõлмõõ. И нӓйлл он култа-каўкалод. А сõвад он панту казгõõ пӓӓлээ рантаа. И тӱӧ иэстӓӓ сõвад вõттагаа нӓнниэ. А сиз нӓмӓ изэ тулõвад тэйлээ. Ато тӓӓл тэддед сӱввӓссӓ. Тӓӓлл он кõйкк нõддяд. Вайт силла он вõтõтту баабушкалт ӱвӓ чиръя кааса. Сиӓ саад куникаа тӱттӓрээ. И мэнэд ӱли мэрээ. И эттӓ уппуо.

Вот нӓмӓ мэнивӓд. И лэӱ̆тивӓд сõвад и култакаўкалод. Но нӓмӓ нӱд ё тулõвад лайвасõõ. А тулõб такаа хаамолайнõ чедрӓпуу кайналоза. И тапалõб куникаа тӱтӓртӓ, тӱттӓриитӓ. И тахоб нӓйт панна чедрӓӓмӓӓ таппурасс шолккаата. А солдатти вõтти пууговицаа мундэрилт каткази, и пани пӱсӱӱ лаjõнкии пууговицаакаа. И хампу. Ко старуха тõкку маалõõ, мэрэсс кõйкк вэси мэни чихумаа мунõйта. А тӓллээ куникаа тӱттӓрэд õливат кõрjõтту лайваза. И шинэлиикаа катõтту. И юттõль старухалõ виэл иэзӓ хампумисс: «Мэйл бõлõ четӓйд тӓӓллӓ, ко вайт солдатид».

Но тӓм тули, тõй кõйк кõм куникаа тӱтӓртӓ. Кõм вуотта мэни вӓлээ. Но вõттаасс тӓтӓ вассаа кõйк куникаа вӓчи, а аннõттии тӓллээ нуорõп тӱтӓр мэхэлээ, куммаа тӓм тахтõ.