Паятан рэпо-кумасса. Рэпо суõкаа ӱввии эливӓд. Энэллээз лэйпӓӓ тӧӧлл савваа. Вõттивад энэллээз пиккарайзõõ паллаа маата, кокад лапъяд и мэнтии омэной исуттаммаа. Этт нӓйлл эб чӓввӓ коттоо лõўнаалõ, нӓвӓд вõтõттии лõўнат кааса, котикко каккуя и кукшина мэттӓ. Сӧӧкки пантии пõõсаа аллаа. Иззэ мэнтии тӧӧт тэчемӓӓ. Кайвõттии, кайвõттии. А рэпо дуумааб: «Сиӓлл он мэси. Куй синнэ чӓввӓ мэттӓ и каккуя сӧӧмӓӓ. Куулõб, этт рӓӓгасти сооза соо-линту». А рэпо юттõõб: «Парайко, парайко тулõн».

Висказ кокка маалõõ. А суси чӱзӱб: «Куххõõ сиӓ, рэпо?»

А рэпо вассааб: «А куулид, куй миннуа куццуаз? Минуу туттава куцуб, тӓлл пиӓб õлла риситтӓйзэд».

«Сиз мээ, – юттõõб, – ёко куццуаз. Вай ӓлӓ õõ каўгаа».

Рэпо мэни. Сай сиӓл кукшинаа мэттӓ и каккуя. И туõб таггааз. А суси чӱзӱб: «Нии чиирээсси? Четӓ сиӓл юмала антõ?»

«Пойгаа», – юттõõб рэпо.

«А куй куццуаз?»

«Алку куццуаз».

Нõйстии тааз тӧӧт тэчемӓӓ. Кайвõттии, кайвõттии. Нӓт, вõйб õлла тунни вай кахс. Рэпо тааз куулõб, эт линту рӓӓгаб. Тааз тахоб мэннӓ. А суси чӱзӱб: «Куххõõ сиӓ тааз?»

Рэпо юттõõб: «Вэдь, куулид, куй миллõõ рӓӓгуттии?»

«Куулин. Сиз мээ!»

Рэпо мэни тааз. Сэй каккуя и мэттӓ. И тули таггааз. Но, суси чӱзӱб: «Митӓ нӱд юмал антõ?»

«Тӱттӓриккõйзõõ», – вассааб рэпо.

«Куй куццуаз?»

«Чехспайкка».

«Миллизэд, – юттõõб, – нимэд он».

«А линтулайлл мокомад нимэд он».

Тааз куулõб, этт линту рӓӓгаб, соо-линту. Рэпо вассааб: «Куулõн, куулõн, туõн, туõн!»

И мэни. А суси юттõõб: «Сиӓ вайкк ӓлӓ õõ каўгаа».

«Миӓ чиирээсс тулõн», – вассааб рэпо.

Мэни и сэй jӓтӱccэд. Ей мээ. Тули таггааз. Суси чӱзӱб: «Чен сиз вээл сӱнтӱ?»

«Нӱд он поё».

«А куй куццуаз?»

«Õцуз».

А суõлл тахтаўб сӱввӓ. Пиӓб õцциа сӱввӓ. Рэпо юттõõб: «Вõйб ё мэннӓ. Айка он ё лõўнаттаа».

«А силлõ эб тахтаў сӱввӓ?»

«Эй! Миннуа риссээлл сӧӧтэттии».

А рэпо юттõõб суõлõ: «Сиӓ мээ ӱфсинӓӓ лõўнаттаммаа».

Суси мэни. А рэпо jӓй. Суси нӓэб, котикоз бõлõ ӱхтӓ каккуа. Кукшиназ бõлõ мэттӓ. Суси суутту я арваз, этти рэпо тӓтӓ пэттэли айн. Тӓм и юттõõб: «Кӱлл миӓ силлõõ каззээ махзан. Синуу раткаан поолиттаа, и лõўнатан».

Рэпо нӓэб, этти суси он кõввии сууттунну. Висказ ялгад пихалõõ и пани мэнэмӓӓ мэццӓӓ.