Õли старикка я старуха. Старикка чӓӱ̆си калой пӱӱтӓмӓӓ, а старуха чедрӓс таппуройта. Эливӓд нӓмӓ мэрээ ранназа зэмлӓнказа. Старикка тули котуо. Юттõõб найзиколлõ: «Митӓ калойд õлõн пӱӱтӓннӱ мõнт вуотта, виэл каммугаа куммаа бõллу».

Старуха юттõõб: «Микӓ мокома?»

«Коко чууда, – юттõõб, – тӓнӓнн õли пууттунну вõрккуосõõ ӱфс кала. Бõллу айвуо суури. А култõнõ õли. Инеэхмиизээ ӓӓлэлл паятти. И чӱсӱ милт мэсизиикаа вэтээ. И миӓ лаззин. А миллõ юттõли: «Митӓ силлõ ваяаа, тулõ чӱсӱмӓӓ мэрээ рантаасõõ. Миӓ кõйккõа силлõ аннан. Сэнээ пэрӓсс, этти лаззид минуа волилõõ»

А старуха юттõõб: «А сиӓ хуллу хайска! Эд вõйнну чӱсӱӓ калалта васõсс каўкалуа? Вэдь нӓт кас он лõхкõнну! Эб саа митӓйд тэхӓ. Мэнэ мэрээ рантаа тагааз! Чӱзӱ вассõн каўкало и уонõ!»

Мэни старикка мэрээ рантаа. Куммартии мэрэлэсээ. Мэрэсс нõйси вэси чихумаа. И тулõб култõнõ кала. И юттõõб старикаллõ: «Митӓ сиӓ таход?»

А старикка юттõõб: «Старуха чӱсӱ васõсс каўкалуа и уонõтта.

«А мэнэт котуо, лиэб вассõнõ каўкало и уонõ. Но горя силлõ старухаакаа паллё лиэб. Айвуо кураажиттааб паллё».

Мэни старикка котуо. Ваатаб вассõн каўкало он и вассõнõ уонõ. Старуха рӓӓгуб вассаа: «Ё тулõд вӓллӓӓ!»

«Тулõн, – старикка юттõõб. – Онко силл ӱвӓ элӓӓ вассõзõз уонõõз?»

«Эй сиӓ хуллу-матти, эд сиӓ тӓӓтӓннӱ чӱсӱӓ парапаата калалта?»

«А митӓ сиӓ таход чӱсӱӓ виэл?» – юттõõб.

«Миӓ тахон õлла столбовой дворянкой. Эн тахо õлла талонпойканасõнна».

Мэни старикка тааз мэрээ рантаа калаа рӓӓкамаа. Вот таас кала тулõб тӓллээ. Ё вэси кõйкк он мэрэз мутиказ. И юттõõб: «Митӓ сиӓ таход чӱсӱӓ?»

«А минуу старуха тахоб õлла столбовой дворянкой. Штобы сиӓ на посылочках õлõйзид тӓллээ. И мэрээ пõхъяза милтин силл он дворцца, и штоб сэ õлõйсс тӓмӓӓ».

Кала юттõõб: «Каст эб лиэнэ».

А тӓмӓ юттõõб: «Сис тӓм минуу тапаб, старуха».

«Мэнэ котуоз. Старуха лиэб ванаа каўкалуо тӱвэнн. И иткõмаа лиэб. А сиӓ мэнэ и нарри тӓтӓ: онко ӱвӓ иссуа столбовой дворянкой, рикки каўкалуокаа?»