Õливад кахс миндяа ӱхэз талоз. И мэнивӓд парккиисõõ. Нӓмӓд лõўнаассаа тэчивӓд тӧӧтӓ. Рэпизивӓд парккиа мэццӓзӓ. И лõўнаттивад нӓмӓд кахõ чеззээ. Сиз эйттивӓд оокаамаа. И нуккузивад. И ноорõпалл миндялл мэнэб гаада сухõõ. Ӓддьӓ сэ нӓчи. А нӓмӓд макаавад. Õвад тӓӓ митӓйд. Но ӓддьӓ аjõ ӱлээз. Нику ӓпиӓ нэйл тули, этти тӓмӓ тапаз унитилалт. Нӓмӓд сиз хӱппӓзивӓд. Но ӓддьӓ сэ ко тули, ӱлээз эб аянну. Гаада õли ё поолõõссаа сухõõ мэннӱ. Нӓмӓд ӱлээз нõйсивад. Чӱзӱб ӓддьӓ ноорõпалт миндялт: «Митӓ сиӓ нӓйд унõза?»

А тӓмӓ: «Нӓйн унõз ко миӓ чӱлмӓӓ-чӱлмӓӓ вэттӓ jõйн».

«Но, – юттõõб, – нӱд мэнэммӓ котоо, – ноорõпаллõ юттõõб. – А сиӓ ванõп jӓӓ вээл сихээ мэццӓӓ. Тӓтӓ куццу ӓммӓз котоо».

А тӓмӓ тули ээзэпии и юттõли найзõлõ: «Тӓмӓлл он гаада сууза».

«Нӱд мэнэ, панõ саўна лӓмпимӓӓ», – миндялõõ юттõль.

А старухалõ юттõль: «Ява тӓллээ нӱд õзрõй, эттэб миндя тэчейсс сууримой».

И антõ миндялõ лаадгоо рõõскаа пиимӓӓ. Юттõõб: «Ява и ёо пиимӓӓ».

Тӓмӓ айн яваб и ёоб. А изэ старикка мэни лӓммитти саўнаа. И вот, сиз ко лӓммитти: «Но нӱд мэнэммӓ саўнаа!»

Мэнивӓд нӓмӓд саўнаа. Но тӓмӓ пиимӓӓ jõй. И гаада таукõз сӓӓммээ. И тӓмӓ жааруз нõйс õхсõнõмаа. И вот õхсõнии. Гаада тули суусс вӓллӓӓ. Гаада õли таўгõнну. Сиз тӓмӓ сай арвуа, михээ минуа куцутии котоо.