Ӱхэлл мэхэлл õли кõм пойкаа. Ӱхт куцуттии Иивана, нуорõпаата. И тӓмӓ õли айвуо муудра тõйсиисс вэллиисс. Исӓ нõйси куолõмаа. Эмӓӓ нэйл ё бõллу. И исӓ юттõли: «Ванõпаллõ пойгалõõ я чехсимӓйзэлээ кото пуолиттаа. А Иивана, силлõ митӓ ваяа лээб, сиӓ тулõ минуу чӓӓпӓлээ». И чӱзӱ, митӓ силлõ ваяа он. – А тõйсилõõ юттõли: тӓтӓ вӓллӓӓ ӓлкаа аягаа, этти тӓмӓ он вӓхӓмиэлинэ.

Но мэни паллё вӓхӓнайкаа, куникас тэчи суурõõ эццигуо. Куццõ кõйкõõ вӓеэ, митӓ он вайт тӓмӓӓ рииккиз вӓчиэ. И юттõли вӓелээ: "Вот, минуу тӱтӓр исуб сэйццемӓттӓмӓл јӓтажилла. Чен вõйб хӱпӓтӓ, и сõрмухсõõ вõттаа тӓлт, сэ лиэб минуу вӓвӱ. И тулõб мэдде рикии пӓӓлээ сõта, и сис сэ вӓвӱ суурõõ бохаттэрии тапаб, кумпа вõйб синнэ хӱпӓтӓ, линнулл лэнтӓӓ вай опõзõлл хӱпӓтӓ».

Кõйки мэнтии. И нэд мэнивӓд вэллэд, кахс вэллиӓ. А Ииванат эб вõтõтту. Тӓм мэни изӓлээ чӓӓпӓӓ пӓӓлээ. И юттõõб: «Минуу вэллэд обижойттаасс. Изэ мэнивӓд, а минуу јӓттивӓд».

Исӓ юттõль: «Куникаа вӓвӱ лиэд. Ӓлӓ идгõ! Вот, миӓ аннан силлõ опõзõõ, и култа-мõõкаа, õпõзõд латы, шолкказõд ратуссõмõд, и валкõат сõрмиккаад. Каўниит сааппугад, синизээ пальтуо. Мусса шлӓӓппи кõлмõõ сулгаакаа. Панõ нэд сõвад ӱлээ, култа-мõõкка вӱӧлээ, шлӓӓппи пӓхииэ. Иссуу опõзõлõ сэлчӓӓ и панõ мэнэмӓӓ. И юттõõ нии опõзõллõ: «Каурга, каурга, хӱппӓӓ тайваа кõркуулõõ я куникаа уонõõлõõ, куза минуу нуориккõ исуб. И туулõõ пӓӓллӓ сõйзо пуол тунниа, кунни миӓ тӓллээ суута аннан. Я сõрмухсõõ чӓесс вõтан».

Опõнõ юттõли: «Эб милтинэ линту нии лэнтӓӓ куй миӓ».

Иссуу опõзõллõ сэлчӓӓ. И опõнõ нõйси тайваа кõркулõõ. Туулиспӓӓн мэни. Лидна тӓӱ̆нӓӓ вӓчиӓ, куникаа дворцаа иэзӓ õли мõнõлайсс вӓчиӓ. Кõйкк тахоттии хӱпӓтӓ. А ченниид эб пӓӓссӱ. А тӓмӓ кõркõпалт лиднаа опõзõõкаа туулиспӓӓкаа мэни. И вӓчи рӓӓгуттии лиднаа мӱӧ суурõлл ӓӓлэллӓ, этти мэццӓ-хаамо касэ тулõб туулиспӓӓкаа. Тӓм хӱппи и антõ суута тӱттӓриколõõ. И вõтти сõрмухсõõ. А опõнõ туулõõ пӓӓл сõйсõ. И куникаа тӱтӓр тӓллээ пани пэцатии пӓӓлээ. И тӓм тули вӓллӓӓ. Таас туулиспӓӓкаа котуосõõ. Опõзõõ лахчи вӓллӓӓ. И сõвад антõ опõзõллõ ойтуу. А изэ пэцатии ситõ чиин руояккаа рӓтээкаа. И сэнээ сõрмõõ пани чиин руояккаа шижгаакаа, куммаз õли сõрмуз. Вот, мэни ё нӓтэли тõйнõ, кõõз вэллэд туливад тагааз. Вот, куниказ и чӱзӱб: «Õлико кõйкк вӓчи туллу?»

А нӓмӓ юттõливад: «Мэйл хуллу вэлли јӓй котуо вайт».

А куникас чӓхси тувва вэллээ дворццаассõõ. Кõйкк вӓчи эциттии. Пэцаттиа эб лэввэттӱ. Нӓмӓ туливад вэллэд котуо. И чӱсӱвӓд: «Михээ пӓӓ ситозид? Митӓ пӓӓкаа он?»

«Аккуналл мӓнчизин поёккõйсиикаа Сирькаа, дай Сирькаакаа лахзõд лэйвӓд лобаа мӱӧ. Вэрэлл он лоба».

«А митӓ чӓиэкаа тэйд?»

«А мӓнчизин поёккõйсиикаа таммастаммаа, и наглаасõõ ратказин сõрмõõ».

«Но кухõõ синуа хуллуа виэд? Ко куникас куццõ виэл! Синуу лӓпи сиглаа куникаалõõ лиэтээсээ кусõмаа эб вијјӓ».

Нӱт таас коко куу эцциӓссӓ кõйккõа рииккиӓ мӱӧ. И сõта ё личи тулõб. А куниказ виэл эб тӓӓ митӓйд валмиссуа сõтаасõõ. Куниказ антõ сõнаа: «Хоть ку вана õлкуо, хоть ко лӓсивӓ õлкуо, вайт миэз элӓјӓ, кõйкии пиӓб õлла куникаалл». Сиз виэтии сэ хуллу Ванюшка. Тӓм мэнэб руояккаалл рӓтээл айн он пӓӓ чиин сивотту. Вэллэд юттõõвад: «Нӓт, касэ куникаа вӓвӱ тулõб. Сэйццемээ пайкаакаа чиутто ӱллӓ я кахõссõмаа пайкаакаа каацад ялгаза. Тохолаапутид ялгаза, и риккилӓйзэд. Ай ситӓ куникаа вӓвӱӓтӓ!

«Ӓлкаа вэллэд минуа награгаа рахваа аайкаа. Юмал аннаб воймаа. А Юмалаа эмӓ аннаб миллõ õннõа. И лиэнэн миӓ мокома нику тӱӧ».

«Э! Вэллэд юттõõвад, Аабрамаа тӱтӓр эб тулõ силлõ мэхэлээ. А куникаа тӱтӓрт сиӓ нюухата эд саа, эди нӓэ тӓтӓ кõртайд. Куулõ, ко рахваз паяттаасс».

«Куйбõ, куйбõ! Миӓ эн õлõ куйва пуу. Мõнõллайсс маръяа и минуз он».

«Да куй нии, куй нии? Куникаа вӓвӱ эд лиэнэ, вэллэд юттõõвад».

Ё куникаа дворцаа тӱвэнн овад. Тӓм вэллиллээ юттõõб: «Миӓ јӓӓн вӓхӓнайгасси тэйсс».

А изэ чӓӓнтӱ нуркаа тагаа. И рӓӓгуб овõсса энэллээз: «Хӱппӓӓ, и тулõ чиирээпӓӓ. И рохо б эхтииси минуу ялгаа алла пайнуа. Õлõйзит сиӓ сиинӓ туулõõ туйскуунн. Тулõ!».

Тулии опõнõ туулõõкаа. Иссуу сэлчӓӓ опõзõлõõ. И мэнэб õми вэллии мӱӧтӓ. А вэллэд эвӓд тунтõнну тӓтӓ, а тӓм вэллиилээ юттõõб: «Нõйска иэсс! Кас Иивана мэнэб!»

И мэни! Мэни куникаа дворццаа. Опõзõõкаа ајõ. Сиӓл куниказ вассаа вõтти. Тӱттӓрээкаа риннаа. И тӓм куникалõõ юттõли: «Лаззõ кõйкк вӓчи вӓллӓӓ. Миӓ ӱфсинӓӓ мэнэн сõтимаа».

Куникас чӱзӱб тӓлт: «Нӓӱ̆тӓ миллõ мэркки, куй сиӓ нõõт сõтимаа ӱфсинӓӓ».

«А иссуу минуукаа сэлчӓӓ минуу опõзõллõ. И мэнэммӓ тагаа лиднаа мэрээ пӓӓлээ».

«А мэрэсс нõйзõб кит-рыыба нэйлээ вассаа. Пухуб нэйлээ куй мõнõлт вирсталт вэттӓ пӓӓлээ и сухõõ. Тӓмӓ вõтти ӱхээ сулгаа шлӓӓпилтӓ, вискази и тули суур кõркõа силта, этти кит-рыыба эб вõйнну силтаассаа пухуа». Сис куниказ юттõõб: «Миӓ тӓӓн, этти силл он воймаа паллё».

Сиз мõõкаа вõтти. И пуолиттаа кит-рыыбаа лõйкказ. Сиз юттõли куникаалõõ: «Таход виэл, нӓӱ̆тӓм митӓйд?»

Сис тӓм нӓӱ̆тти куникаалõõ мэццӓзӓ. Кут вииппази култамõõкаакаа, нии тухаттõмалт вирсталт мэццӓӓ мааллõõ пани. Куниказ юттõли тӓллээ, этти миӓ Юмалалт чӱсӱзин айкаа каммугаа вӓвӱӓ.

Нӱт пулмад пиэттии куникаа тӱттӓрээкаа. А вэллэд айн котуо уоттõõвад. Тӓм куццõ вэллиит дворццаа пулмõлõõсõõ. И јӓй тӓм куникаа вӓвӱсс.