Миӓ эн мӓлэхтӓ к ӱвии. Мэйлл õли. Исӓ
эмӓ элэттии. Эмӓ кооли, а тӱттӧ jӓй. Тӱттӱӓ куцуттии Галя. Тӓмӓ, мээз, нõйси наймаа.
Баба-Ягаа вõтти. Но сэ Баба-Яга эб суванну тӓтӓ Галяа.
«Мэццӓӓ пиӓб вээjjӓ!»
Исӓ ракõтти õпõзõ и вэй мэццӓ. Сиӓл õли
пиккарайн кото мэццӓз. Тӓмӓ иззэ тули котто, сэ исӓ. А jӓтти тӱтӧккõйзõ синнэ коонтала
чедрӓмӓ. Туõб охтого. Сиз нõйси чихуттама энэл рооппа. Сиз нõйси сӱӱмӓ. И сиӓлт
силланалт хӱппӓз иири, крииса. Юттõб, што «Анна миллõ рооппаа».
Тӓмӓ анти. Пани блюудочкал иирэлэ. Иззэ
нõйси маккама. Сэ он ӱӱ. И тули ухсõ кару.
«Авваа ухзõ! – юттõб. – Нõйзõмм пэллама!»
Анти тӱтӧл кэлло. Тахоб ловитта. Крииса
ко хӱппӓз силланалт и кэлло вõтти энэлл. А иззэ мэни силланнал таказ. А иири юттõли
тӱтӧл, што «Сиӓ мэнэ кõръюу. А миӓ хӱппӓн».
А тӓмӓ силланал дрилизõб. А кару
дуумааб, што сиин. А тӱттӧ кõръюз. Тӓмӓ ёониттõлõб, ёониттõлõб. Эб саанну чӓттэ.
Сӱлчи и лӓхси пойз. А сиз тӱтӧл сӱнтӱвӓд платьяд шолккõзõд. И пиккарайн кирсту култаа.
Сиз сэ тули ё оомникко. Исӓ тули õпõзõка вõттама. А эминтимӓл котон он ӱвӓ
мээли, што ё тапõтту. Койр ёониттõб маад мӱӱ. Эминтимӓ тэчи рэхтилкаккуа.
Дуумази, што лээвӓд ё поминкод. Койра юттõб: «Кирсту тоовва култа и платьjõй. Ӱхэд
и тõйзõд».
А Баба-Яга койрал чӓзиб ютõлла, што покойникка
тоовва. А койра паятаб, куй он аззя. И ко тули ё котто, нӓчи, што он култа. И
платьёй. Юттõли: «Вээ нӱд минуу тӱттӧ оомõнӱӱсси!»
Тули охтого и ракõтаб õпõзõ и лӓхэтти
тааз чедрӓмӓ, мэццӓ тэчемӓ. И тоожõ чедрӓз-чедрӓз. Охтогон чихуттама нõйс. Сиз
нõйси сӱӱмӓ. Чихутти сэнэ роопаа. А тааз силланналт хӱппӓз иири и чӱсӱ рооппа.
А тӓмӓ анти ялгал. И унохти роопаа иири. Нõйси тӓмӓ маккама. Сиз тааз кару ухсõ
тули. «Нии што авва ухс!»
Тӓмӓ аваз ухзõ. Анти кэлло. «Давай пэллама».
Нӱд вõтти тӱттӧ иззэ сэнэ кэлло. И
давай ӱмпӓриккуа пэллама. Пэлаз митӓ пэлаз. Цоп сай чиини. Лууд jӓтти маасõ. А
иззэ лӓхси. Изинтимӓ оомникосс туõб õпõзõка вõттама. Кацоб: сиин õлла лууд.
Лууд пани лайтьёл и лӓхс котто. А Баба-Яга тааз тээб рэхтилкаккуа. А сэ койр
тээб: «Лууд товва котто».
А тӓмӓ анти сӓблӓл: «Юттõ, што култа
тоовва. Сиз аннан рэхтилкаккуа».
А тӓмӓ айнõ: «Што лууд тоовва».
Õпõн тули аккуннал. А Баба-Яга тули
аккуннал. Кацоб, што лууд õлла ч. Давай иткõма: «Абаа а, абаа!» И липу лõппу кааска.
| 
