Юмал маата мӧӧ чӓӱ̆си. Мээз õли айво кэӱ̆хӓ. Тӓллээ чӓзэттии Мииккулаа обраазаллõ риситӓ. Тӓмӓ чӓӱ̆с айна риссиимӓ Мииккулаа обраазаллõ. Юõлти: Мииккула, мииласлиивõй, аннаб силлõ раххаа. Мииккула эб антанну тӓллээ раххаа, я тӓмӓ лэй Мииккулаа обраазаа. Туõб хукко вассаа.

«Куза сиӓ õлид?» – мэхэлт чӱзӱб.

«Мэнин обраазаа лэйн».

А сэ хукко юттõõб: «Лӓӓмм нӱд минуукаа!»

Но вот, мэнтии нӓвӓд ӱхтээ таллоо. Сиӓлл õли лӓсивӓ. Но вот, сиӓллӓ сэ хукко лõйккази. И пэси кõйкк палад. И таггааз пани тааз инеэхмиизээ, куй палад õливад. Ӱхтээ пани, и инеэхмиин тули тэрвээсси. Тӓмӓ jӓй таллоосõõ иссумаа, хукко. А сэ мээз ёхси ээспӓй хуккуа таллоо, тõйсõ, куза он лӓсивӓ. И мэни и лõйккази тӓммӓӓ палосси тõйзõз талоза. И пэси, и пани палад тааз ӱхтээ. А нӓвӓд ӱхтээ эвӓд мэннӱӱд мэхэлт. Тӓмӓ ёхзõб хуколõ вассаа: «Ой!» И кайпааб: «Тэйн миӓ нику сиӓ тэйд. А эн саанну тэрвээсси».

А хукко юттõли: «Сиӓ ё таход ӱлэпӓӓсс миннуа».

Но вот, мэнтии нӓвӓд чӱйлӓӓсээ таллоосõõ ӧӧсси. Õли сэнэллӓ хуколла кõм просвэраа. Вõтти ӱххээ дай сэй мээз. И хукколлõ эб юõллу. А хукко нõйси чӱсӱмӓӓ: «Куза вээл ӱфс просвэра?»

«Миӓ, – юттõõб, – эн вõтанну, пӱххӓӓб».

Но мэнтии, мэнтии тээтӓ мӧӧ. Сиз исуттии тээ сэрвӓӓ. Сэ хукко нõйси якамаа раххой. И кõлмõ коккоосõõ пани айн. Вот! Я сиз пани кõлмõ коккоосõõ хукко.

«Вõта сиӓ нӱд, кумпа таход, коко».

Но тӓмӓ вõтти, мээз, ӱххээ. А тõйзõ вõтти хукко. А тӓмӓ сиз и чӱзӱб хуколта: «Челлээ jӓӓб кõлмõз коко?»

А хукко: «А касэ сэнэллэ, чен просвэраа сэй».

«Миӓ, – юттõõб, – и сэйн!»

«А миз сиӓ сиз эд юõллу?»

«А миӓ пэлчӓзин юõлла».

«На, – юттõõб, – силлõ кõлмаз коко».

Мэнтии, мэнтии тээтӓ мӧӧ. Хукко я прошшайтти да рӓӓгасти таггааз: «Наа, – юттõõб, – минуу коко раххойта. Ва нӱд элӓ Мииккулаа уноста. Сиӓ jӓркӓӓсси таход саата раххаа. Пиӓб вэд трудиттаа. Элӓ уноста Мииккулаа».

Тӓмӓ вот, нӱд пӓӓси риккаасси.