Рэпо митӓ тэчи? Мээз тули калоеэкаа.
Калад эливад панту сааниккоосõõ. А рэпо нӓэб, ко он калад. А куй нӓйд савва? Сиз
рэпо вõтти эйтти тээ пӓӓлэ. Лэжиб, нику кооллу. Мээз тули тӓммӓӓ тӱввээ.
Ваатаб, эйтти кооллу рэпо лэжиб.
«Вõтан коттоо. Хакалõõ лээб ӱвӓ каглуз
шуубалõõ».
Вõтти сэннээ рэввоо. Висказ сааниисõõ.
И мэни этэз. А рэпо илляккоо тэчи аўкоо каллойсõõ. А айн вискõ и вискõ каллой тээ
пӓӓлэ. Ку кõйкк висказ, сиз иззэ ӱппии. А мээз илма рэвотта, илма каллой коттоо
тули. И юттõõб хакалõõ: «Мээ вõта, сиинӓ он силлõõ ӱвӓ каглуз. Миӓ, – юттõõб, –
рэввоо лэввин».
Мэнэб хакка вааттамаа. Бõõ рэппоа, бõõ
каллой. Туõб, юттõõб хакка: «Миллин каглуз сиӓл силл õли? И миллизэд калад? Бõõ
каглусса, бõõ калой».
Хукко юттõõб: «Нии, нии, куй бõõ? Миӓ
иззэ висказин рэввоо сааниисõõ. А калад õсин».
Мэни вааттамаа, а ӱфскõйкк бõõ митӓйд.
А рэпо коръяз калад. Ӱхтээ пайккаа кõйкк
кантõ. Исуб и сӧӧб. Сэнэлл айкаа тули суси.
«Митӓ сиӓ сӧӧд?»
«Нох, вай эд нӓэ, этти каллой сӧӧн?»
«Кусс сиӓ вõтид калад?»
«Кусс вõтин? Ярвõсса пӱӱзин».
«Õпõта и миннуа, куй саавва».
«Сиӓ мээ ярвõõ jӓӓ пӓӓлэ. Тээ аўкко.
Писӓ синнэ ӓнтӓ аўккоосõõ. Ису и ооттõõ. И айн юттõõ: «Суõ ӓнтӓ пӱввӓ кала суур
и пээн!»
Суси мэни. А рэпо ситӓ айкаа юттõõб:
«Jӓӓтӱ, jӓӓтӱ, суõ ӓнтӓ!»
Суси чӱзӱб: «Митӓ сиӓ, рэпо, сиӓл
паятад?»
«Айн юттõõн: «Пӱввӓ, пӱввӓ, кала суур
и пээн, суур и пээн».
Суси тааз: «Миӓ чи ситӓ юттõõн». Суси иссу синнэссаа. Кунниз ӓнтӓ jӓӓттӱ.
А рэпо ёхси вӓллӓӓ. Jӓтти суõ ӱфсинӓӓ иссумаа jӓӓ пӓӓлэ. Тултии найзõд сõппõй пэсэмӓӓ.
Нӓчевӓд, этти исуб суси. Суси тахтõ ёоса. А ӓнтӓ он jӓӓттӱннӱӱ. Эб лӓхэ вӓллӓӓ.
Найзõд мэнтии. Саатии чен кэпид, чен алко. И тапõттии суси синнэ.
| 
