Ӱхскõрт элэтти мээз и найн, и тӱттӧ и пойк. Мээз и найн мэнти линна тоома сõппа. Лахзõд jӓӓти кахõ чеззэ котто. Тӱттӧ юттõб: «Миӓ мэнэн вӓхӓнайка тõйсика».

Сэ пойка юттõб: «Мээ! Мээ!»

И мэни. Вӓхӓнайка õли. Нии поол тунниа. Тули котто. Пойка эб õõ. Луйкко и анõ вõтõтти аккуналт пойга и вõти пойз. Сииз тӱттӧ давай лӓхси эццимӓ пойка. И мээб, мээб, мээб. И туõб омэнапуу васса. Тӱттӧ чӱзӱб: «Омэнпуу, омэнпуу, омэнпуу, нӓйд сиӓ анõхт и луйккоа?»

Омэнпуу юттõб: «Нӓйн». Сииз юттõб: «Прооба минуу омэна!»

Тӱттӧ прообаз и тааз лӓхси ёхсõма. Ёхзõб, ёхзõб и туõб ахъё. Илма оонõтта ахъё сэйзоб. Тааз тӱттӧ юттõб: «Ахъё, ахъё, нӓйд сиӓ анõхт и луйккоа?»

Ахъё вассази: «Миӓ нӓйн. А прооба минуу рӱйзлэйпӓ!»

Тӱттӧ прообаз. И тааз пиӓб мэннӓ этээз. Ёхси, ёхси. Сиӓлт туõб пиимӓ-jõки и кииссэли парраз. Нӓйлт тааз чӱзӱб: «Нӓйттӓ ку луйккоа и анõхт?»

«Нӓймм! Прооба мэjе пиимӓ и кииссэлиӓ!»

Тӱттӧ тааз прообаб. Сииз лӓхс тааз ёхсõма. Ёхси, ёхси. Сиӓл он пиккарайн кото мэццӓз. И сиӓл Бааба-Яга чедрӓӓб. А сэ Бааба-Яга тӓтӓ эб нӓхнӱ. Тӱттӧ кацоб: «Вэлли он сиӓл аккунал, пэллаб култайсие муниека. И тӱттӧ сэнэ вэлле сай вõтта, а Бааба-Яга эб нӓхнӱ. Лӓхс тулõма пойз. Туõб, туõб, кацахтаб. Пӓӓ пӓӓл он чи анõ и луйкко. Бааба-Яга нӓчи, што нӓйтӓ эб õõ. И аjõ таказ. Нӓвӓд пӓӓсти личи кииссэлли-паррасса и пиимӓ-jõккõ. Тӱттӧ юттõб: «Кõръятка мэйт! Кõръятка мэйт!»

И кõръятти. Сииз тааз лӓхэтти тулõма айн котто. Тааз õлла луйкко и анõ пӓӓ пӓӓл. Тулти личи ахъёа. Тӱттӧ тааз юттõб: «Кõръя мэйт! Кõръя мэйт!»

Ахъё кõръяз. Тааз õлти, митӓ õлти. Тулти тааз котто. Тааз тӱттӧ и пойк нӓчивӓд: луйкко и анõ лэнтӓвӓд. Нӓвӓд, тӱттӧ и пойка, тааз лӓхсивӓд хооду. Нӱд ё õлти личи омэнапуута. Тааз луйкко и анõ лэнтӓвӓд пӓӓ пӓӓл. Õлти ё личи омэнапуута и тааз тӱттӧ юттõб: «Омэнпуу, омэнпуу, кõръя мэйт!»

Но кõръяз. А сииз нӓвӓд ё лӓхэтти, котто пӓӓсти.

Луйкко и анõ Бааба-Яга номад õлти. Слуужитти тӓмӓ ӱмпэр.

Лахзõд тулти котто. Аккуна ӓӓрэз исутти и оотõлла иссӓ и эммӓ.