Махувõõ нурмõлла он тоожõ кахси чиввиӓ. Эвӓд õлõн нии cуурõд. Тоожõ швээда айгасса. Õли бохаттэри. Тахтõ нэйллӓ чивилӧйллӓ Капорёо крэйпостиа муртаа. Ӱфс õли ӱххээ кайнналла, и тõйнõ тõйзõõ кайнналла. Эб мэннӱг крэйпостииссаакк. И jӓтти чивид синнэг.

Капорёза он комнатад мааналла. Пиӓб мэннӓг ӱллээ силлаа крэйпостии. Сиӓл сиз он õйкõа чӓттээсээ ухси. И сииттӓ ухзõсса мэннӓг õливад ходы. Чӓӱ̆зимӓӓ вааттамаа. Паятаттии, што швээдаа куникаа шлӓӓппи он. Ку швээд мэни пойз, jӓтти сорок сороковок дэнгаа, синнэ мӓ сӱӓммээ. Ӱфси матросси авази кахчӱммэттӓ усса, а виимэттээ тули куссу. Сиз тули таггааз. А сиз õли паппи. Паппи нэллӓчӱммэттӓ усса авази. Айна мэни. А виимэттээ тоожõ эб пӓӓзнӱг. Тули куссу. Айна виилӓ ухзõд õливад.

Ситӓ минуу ӓддӓӓ эммӓӓ исӓ паятти. Ку швээд мэни пойз, сиз кõйчч лаваллõõ jӓйвӓд, тарõлкад и вилкад, и курассõд. Крэйпости õли мэрээ ранназа. Ку тӓмӓ мэни мааналõццõõ, мэни лайвалõõ. А мааллõб сӱнтӱннӱ мэннӓг, маата мӱӱ. Чииниг õлõйси вõõттуг. Ӱфс вирста маата он Капорёсс Шираковаа чӱллӓӓ. Нӓнниэ чӱллӓӓ алла он нииттӱ. Сиӓлл õливад виилӓ швээдаа лайвоjõõ обломки. Старикад паяттивад.

Ситӓ мӓлэхтӓӓ, што паятаттии, што швээд чӱсӱ, эн мӓлэхтӓӓк куммалт куникаалта, што лаззõ миннуа Капорёо. Нии миӓ коко воовõõ нõйзõõ синуу войскаа сӱӱттӓмӓӓ, и сõвõттамаа, и ченниттӓмӓӓ.

А вэннӓӓ куниказ отказал. Эб ласкõннуг Капорёо.