Иэлмуйнаа õли эминтимӓ тӱттӓриккõйзõлõõ. Исӓ мэни лиднаа. А тӱттӓриккõйзõлõõ эмӓ тõўкказ риигаа, куммаз риигаз чудиттии. Тӓм дуумаз, этти тӱттӓриккõйн сиӓл куолõб, ко эйттӱӱб. Вот, кахстõшшõмõтт тунниа ӱӧтӓ колисасс риигаа ухсõõ. А линад эливад ахõтту. Тӱттӓриккõйн нõйсии иткõмаа. А линад и юттõõвад: «Ӓлӓ идгõ! Мӱӧ синуу иэсс вассаамма».

Таас паха хэнки колизэб: «Аваа ухси!»

Линад вассаавад: «Эммӓ аваа усса. Лаа мӱӧ паятамма õмаа элуо силлõõ чевӓӓссӓ я сӱчӱзӱӱссӓ, ку муокатасса, и кõйккõа мааилмаа мӱӧ мэдде луут туули виэб. Чевӓӓлӓ варай мэхэд эвӓд макаа ченнӓттӓ, и илма фурашкатта. Пӓйвӓ бõлõ ӱлээлээ нõйссу, нӓмӓ адраакаа чӱнтӓвӓд мэйтӓ вартõõ. Раўт-ӓчеэллӓ ӓессӓӓссӓ. Сиз ко пихолл вискуасса ӱхзи пõлтуа мӱӧ мэйтӓ. Сиз мӱӧ суурõз и пичӓз сувõз казвамма. И сӱчӱзӱлл мэйтӓ рэпиӓссӓ ивуухсиисса. Найзõд рэпивӓд маас вӓллӓӓ. Сиз ко пӧллӱйт раддюасс ялкой пӓӓлээ. Сиз ко мэддед виjjӓссӓ риигаа, ахтаасса. Сиз ко тулõвад мэхэд и найзõд риигаа. Лӓммиттӓӓс чихвасси. Сиз ко мэйтӓ сиӓлт рэпиӓсс риигасса. Сиз ко мэйтӓ таппаасса, примозлиикаа кõйкк мэдде пӓӓд калккалõд вӓллӓӓ. Калккалõд jӓӓвӓд нэйлээ тулавуотõõ сиэмэнэсси. А сиз ко мэддед лаготтааса рохуо пӓӓлээ. Сиз ко иэзӓ лунта вõттаасс вӓллӓӓ. Сиз таас паннасс риигаа. И риига чихвасс лӓммиттӓӓсс. Сиз ко мэйтӓ найзõд таппамаа нõйсõвад. Таппõпуйла плакуттаасса. Сиз ко витõмилл лӱввӓссӓ. Сиз ко мэйтӓ крааппиасса хаакõйлла. Сиз сукõасс. Сиз ко мэйтӓ чедрӓтӓссӓ ниитисси. Сиз ко кутуасса канкаасси мэйтӓ. Сиз ко õммõлласса эхтэйтӓ мõнõллайсиит. Сиз ко кутуасс силта-шиской, кухõõ ялкой пӱхчиӓсс. Милтизэд муукад мӱӧ тэрппизимӓ мааилмаза. Сиз ко мэдде ванад палад jӓӓвӓд, сиз нээд кõйкк заводас папэрисс тэхӓсс. Но вот, мӱӧ õлõмма нӱд муучиттэли, мааилмаза свӓтойд. Я пэркэлэ мэйсээ ӓлӓ тарттуу. Мэйлл он ангэлиаа тэрппиминэ. Ӱфсиид эб вэй нии паллё тэрппиӓ, силлӓ мэйлл он сини-куккаад ко кукицõмма. Сэ он тайваа воймасс тэрппиминэ мэйлээ аннõтту».

Куккõ лаулõ. Пэркэлэ ёхси вӓллӓӓ. И тӱттӓриккõйн jӓй элуо. Уомнииз найзикко тули линой вааттамаа. Нӓэб, этти тӱттӓриккõйн сиӓлл исуб. И мэни чӱлӓӓсээ, и юттõли вӓеллэ, этти юмала тõй лахзуккõйзõõ. – «А мэйлл эби õллу лахсай. Мӱӧ тӓмӓӓ вõтамма».