Эли куниказ. Тӓлл õли кõм пойкаа. Но
куниказ нӓчи, этти тулõб ё ванасси. Чиирээсс вõйб коолла. Тӓм куццõ пойгад эннэллээз.
И антõ кõйкилõõ лооккапӱсӱд стрэлоеэкаа. И юттõли: «Кумпа куххõõ аммуб и пуутуб,
сэ сиӓлт и вõтаб найзõõ».
Ванап пойка ампу и пуутту риккаа мэххээ
коттоосõõ. Тõйн пойка ампу, пуутту купцаа коттоо. Нӓвӓд сиӓлт и вõттивад найзõд.
А кõлмайз пойка ампу и тӓммӓӓ стрэла мэни соххõõ. И пуутту коннаасõõ. И ноорõп пойк
и вõтти найзõсси коннаа. Ванапад вэллэд награттии: «Миллизээ найзõõ тõйд».
А пэррӓӓ, сиз сэ куниказ чӓхси ноориккõйлõõ
чӱхзэттӓӓ лэйвӓд. А ноорикõд, куй эливӓд риккайз талолойз, эвӓд тунтõнну, миттӓйд
тэхӓ. Нӓйлл тэхтии валмиид кõйкк. Лэйвӓд туливад пахад. Сиз чӓхси ноорõпалл миннялл
лэйвӓд тэхӓ. Ноорõпаа минняа лэйвӓд ӱвӓд. Кõõз бõллу четтӓйд котонн, ноорõп
миння вõтти коннаа нахгаа вӓллӓӓ. Сиз тӓм õли айвоо илоз. А ку ва нӓэб, этти ченниид
туõб, тааз панõп сэннээ нахгаа ӱллээ. Мээз тӓммӓӓ, ко ё сай коннаа найзõсси,
ойти тӓтӓ. Тӓлл õли моком каропка тэхтӱ, куза конна маказ. Тӓм тӓтӓ и лакассõли.
Паятти тӓммӓӓкаа. Мээз эб тӓӓтӓннӱ, этти тӓм он инеэхмиин. Куниказ антõ õммõлла
чиўтод кõйккиилõõ миннялõõ. Ванапад минняд эвӓд тунтõнну ӱввии чиўттоа õмõлла.
А ноорõп миння õмпõли айвоо ӱввии. Куниказ чииссэли ситӓ чиўттоа. Ванапõйлõõ минньõйлõõ
õли паха мээл: тӓлл кõйкк ӱввии мээб, а иззэ он
конна. Вот, нӓвӓд нõйстии дуумаамаа, куй ситӓ коннаа таппаа, риккоа.
Õли ӱфскõрт мокома аззя. Сэ конна jӓй
ӱфсинӓӓ. Вõтти коннаа нахгаа вӓллӓӓ энэссӓ. А илма нахгатта тӓм õли илоз инеэхмиин.
А ванапад минняд нӓхтии, этти сэ он инеэхмиин, бõõ конна. Вõтõттии нахгаа и
визгаттии ахъёосõõ. А сэ конна õли нõддьõтту. Сэннээпэрӓсс и õлич конна. А нӱд тӓллээ
пиӓб ё коолла, ку нахка пõлõттии. А тули мээз, нӓчи, миллин тӓммӓӓ найн он. Бõлõ
конна. А он илоз тӱттӓрикко. Тӓм
нõйс тӓтӓ суутõлõммаа.
А тӱттӓрикко идгõб: «Миӓ нӱд коолõн»
А мэхэлл нии жали тӓтӓ, юттõõб: «Хоть
сиӓ õллõйзид и конна, ӱфскõйкк миӓ синнуа сувваан».
Сэннэпэрӓсс, этти мээз кõввии суваз, эб вааттанну, этти он
конна вай инеэхмиин, нõддяўз лӓхс вӓллӓӓ. Нии нӓвӓд jӓйвӓччи элӓмӓӓ каххõõ
чеззээ. А куниказ нӓйлээ jӓтти õммаа риккаўсõõ.
| 
