Пиккарайсии лахсиеэ кааска. Кõм
карруа. Õли ӱфс пиккарайн тӱттӓриккõйн. Мэни тӓм мэццӓӓ маръёй коръямаа. Ӧхсӱ
мэццӓӓ. Ӓвитти тээ. Мэни, мэни и нӓэб: сэйзоб пиккарайн кото. Ухс õли авõ. Вааттõ
синнэ. Кооз четтӓйд бõллу. Тӓм мэни коттоо. Лаввалл сэйсовад кõм лааткоа. Сэ
кото õли каруеэ кото. А каруя котонн бõллу. Мэнтии мэццӓӓ хӓйлӱмӓӓ. Тӱттӓриккõйн
вõтти лузикаа и прообаз суурõсс лаадгосс. Сэ õли исӓкарруу лаатко. Майсти суппиа.
Эб нӓӱ̆ттӓӱ̆ннӱ тӓллээ. Вõтти тõйзõõ лузикаа и майсти пээнэпӓссӓ лаадгосса. Эб нӓӱ̆ттӓӱ̆ннӱ.
Сэ õли эмӓкарруу лаатко. Сиз тӓм вõтти, майсти пиккарайзõсс лаадгосса. Сэ суппи
тули тӓллээ мээлтӓ мӧӧ. Тӓм кõйкк и сэй. Сиз прообаз иссуа стуулиеэ пӓӓл. Õли суур
стуули. Иссу суурõз стуулиз. Эб нӓӱ̆ттӓӱ̆ннӱ, тӓмӓ õли айво кõркõа. Сиз иссуз тõйзõõ,
пээнэпӓӓ стуулии пӓӓлээ. Тõйн стуули эб нӓӱ̆ттӓӱ̆ннӱ. Сиз иссуз кõлмõттомаа
стуулии пӓӓлээ. Пиккарайнõ õли. Сэ тули тӓтӓ мӧӧ. Тӓм нõйси стуулилл лõõккумаа.
И мурти стуулии. Сиз тӓм нõсси ӱллээз стуулии. Мэни иззэ тõйсõõ риххеэ. Сиӓл
сэйсовад кõм кроваттиа. Суур кроватти иззӓӓ карруу. Пээнэп эммӓӓ карруу. И
пиккарайн õли карруу пойгаа. Тӱттӓриккõйн мэни суурõлõõ кроватиллõõ. Сэ õли кõркõа
и тӓм тõкку маалõõ. Сиз тӓм вõтти пиккарайзõõ jӓрjӱӱ и пани пиккарайзõõ кроватии
тӱввээ. Нõйз jӓрjӱӱ пӓӓлээ и мэни эйтти кроваттии. Кроватти тӓтӓ мӧӧ. И тӓм нукку.
Силл айкаа, куй тӓм маказ, каруд
туливад коттоо, нӓлчӓзэд. Исӓкару ко ваатасти õммаа лаадгоо пӓӓлээ и рӓӓгасти: «Чен
сэй минуу лаадгосса?»
Эмӓкару ваатасти õммаа лаадгоо пӓӓлээ
и вингасти: «Чен сэй минуу лаадгосс, и кõйкк сэй?»
Исӓкару вааттõ õммаа стуулии пӓӓлээ,
рӓӓгасти: «Чен иссу минуу стуулилл?»
Эмӓкару ваатасти õммаа стуулии пӓӓлээ,
рӓӓгасти, эб нии кõввии: «Чен иссу минуу стуулилл, лиикасти пайкалт?»
Пиккарайн кару вааттõ, вингасти: «Чен
иссу минуу стуулилл, и мурти тӓммӓӓ?»
Сиз каруд мэнтии тõйсõõ риххеэ
оокааммаа. Исӓкару вааттõ õммаа кроваттиа. Рӓӓгасти: «Чен лэжи минуу кроваттиз?»
Эмӓкару тоожõ вааттõ õммаа кроваттиа.
Рӓӓгасти, эб нии кõввии: «Чен лэжи минуу кроваттиз?»
Пиккарайн кару нõйз jӓрjӱӱ пӓӓлээ и
тахтõ мэннӓ õммаа кроваттии. Нӓэб, этт сиӓл чен-лээ маккааб, тӓм нии нõйз винкумаа
кõввии, нику тӓммӓӓ нахкаа вõттааз. Тахтõ тӱттӓриккõйсса пурра. Тӱттӓриккõйн аваз
силмӓд. Нӓэб, этт овад каруд. Эйттӱ. Ӱппӓз кроватисса маалõõ. Аккун õли авõ. Тӓм
ӱппии аккуналлõõ и сиӓлт мэццӓӓ. Каруд тӓтӓ эвӓд таванну.
| 
