А кооллу чехс-ӧӧллӓ туõб. Ӱхстõшшõмõтт тунниа сааб тӓӱ̆ннӓӓ, сиз коттоо туõб. Куй ё кахстõшшõмõтт тунниа, нии ё ӓввиӓб. А сиз тӓмӓ тулõб.

Пойка эб тõхтинну котонн магата. Айн коттоо чӓӱ̆с. А сиз тули солдатти. Ӧӧсси чӱсӱ. А нӓвӓд юттõõвад: «Мӧӧ изэ эммӓ тõхи õлла котонн. Эмӓ чӓӱ̆б коттоо».

А солдатти юттõõб: «Миххээ эттӓ тõхи?»

А юттõõб: «Мэйл тӓмӓ айн чӓӱ̆б чехс-ӧӧллӓ коолуунна».

А сиз солдатти юттõõб: «Мэнкаа тӧӧ. Миӓ лээн ӱфсинӓӓ. Миӓ эн пэлчӓӓ».

А но сиз и jӓй ӧӧсси солдатти риххээ. Тӓмӓ сиз тули ӧӧллӓ. И чӱзӱб: «Таход сиӓ сӱввӓ?»

«Тахон», – юттõõб солдатти.

Солдатти мэни кааппии. И митӓ сай, кõйкк лаввалõõ пани коолуулõõ. Тӓмӓ сэй вай эб сӧӧннӱ. Иссу лавваа таканн. Солдатти иссу да изэ сэй. А коолу сõйсõ ӓрээз. Вот солдатти сэй дай лӓхси: «Пассибо силлõ, хакаллõõ!»

Вот, сиз тӓмӓ юттõõб солдатиллõõ: «Эшто лаа нӱд маккаавад котонн. Миӓ энӓпӓӓ эн нõйс чӓӱ̆мӓӓ. Миннуа синнэ мааилмаа эб вõтõтту, эшто миӓ эллӓӓзӓ эн саанну пассибуа. Васса нӱд сайн миӓ пассибоо. Силлӓ миннуа аjõтти таккаа».

Эмӓ õли мокома, кумпа челлэйд миттӓйд эб антанну.