Õливад куумушкад рэпо и суси. И вот рэпо уомнииз варай мэни чӱлӓӓ. Найзикко õли мэннӱ вэттӓ туомаа. А ухзõõ õли јӓттӓннӱ раголлаа. Мэни сӱӓммээ рэпо. А найзиколла ӱлээ пата лаввалл õли. Тӓм писси пӓӓ патаа, и сэй ӱлэттӓ. И кõйкõõ ӱлээ сэй. Найзикко тулõб рихээ. Тӓм паа тõкутти маалõõ силлалõõ. А изэ ёхс вӓллӓӓ. Найзикко нõйси иткõмаа. Да уффаткаакаа такаа ёхси. Дуумази, што суссэдаа койра. Да риккõ сиӓлт уффаткаакаа клазид.

Мэнэб рэпо мэццӓӓ пӓӓ ӱлээкаа. А суси чӱзӱб: «Чен синуа обижойтти, ко тулõвад пӓӓссӓ мозги вӓллӓӓ?»

А тӓмӓ юттõõп суõлõ: «Виэ минуа сэллӓс котуоссаа. Миӓ эн вõй õлõн раддётту».

«Узгон, узгон, кумани. Нӓӱ̆̆б пӓӓсс, што лӱӧтӱ õлõд».

Иссу рэпо сэлчӓӓ суõлõõ. И суси виэб. А тӓм и лаўлаб суõ сэллӓзӓ: «Сӱӧмӓттӓ сӱӧтӱӓ виэб». Ваццаз маўчид лõхкõõвад. Нии паллё ӱлэттӓ он ваццаза.

А суси юттõõб: «Ай, куумани, митӓ сиӓ лугõттõлõд?»

«Лугõттõлõн õмии ӱвии пӓйвии, ку паллё милл хӓтӓӓт õли».

«А куй нӱд миӓ мэнэн сӱӧмӓӓ митӓйд?»

«Ай, сиӓ куумани. Синуу таваакаа лиэб таўгõта».