Куй кару калой пӱӱзи 

Мõни воотта тагааз миӓ элин Камчадгалл. Палвõлин сиӓл флооттаза. Кõйккилайлл он тӓӓтӓвӓ, этти сиӓлл, Камчадгалл, он палъё калота, мõнõллайсиа лõхиа. Нох, рахваз кӓӱ̆б, пӱӱвӓб калойта, кэд вõйвад. Муйтõшши калакайццõ он пайкалл: вõтаб киини, штрафиб. А инэхмизэд пӱӱтӓвӓд калой; пэлкӓӓвӓд, а ӱхскõйкк пӱӱтӓвӓд. Нох, мӧӧки узõйн кӓӱ̆зиммӓ калассамаа. Ӱхскõрт лӓхзин мэнэмӓӓ сõбрõеэкаа. Мэниммӓ каўкалõõ мэццӓӓ, õйкэсси карунурккаа. Õлимма миттомаа мээссӓ. Вõтимма калой jõгõсса вõрколла. Киирээссии тэйммӓ, калакайццõа пэлкӓзиммӓ. Нох, вõтимма я панимма калад вӓрцциисээ. А изэ куулимма, этти кэн-лээб тулõб пõõсай мӧӧ. «Кэн касэ вõйб õлла тӓӓллӓ?» -- тõйн-тõйсиилт кӱсӱзиммӓ. А сиӓлт кару тули вӓллӓӓ. Тӓмӓ, кару, ваатахти мэеэ пӓӓлээ, мӓризи я аjõ мэед такаа вӓхӓкõйзõõ. Кõйкк ирмузивад, висказивад ялгад пихалõõ я ёхсивад кэн кухõõ. Миӓ изэ мэнин пухõõ, нику линту лэнтӓзин. А кару, нӓб, эб тахтонну мэед тарттуа, вайт тахтõ тӓм тайтаа мэед ирмуттаа вӓхӓкõйзõõ. Вӓрции сэнээ, калоеэкаа, jӓтэттии махаа…