ПРИХЯ ОТТЬ АКАКС ЛИНДУН 

Эндэ эли укк да акк. Укол да акал оли ӱксь пойг. Неце мамм коль. Ну, колишканзь батть. Неце батть куцушканз пойган.

– Вот, – сануб, – пойг, мина нюгуди колен. Сина, пойг, эля и рада, мисэ вандхад кушттэйж и сё, ка мисэ лийб олиж меденке.

Неце батть коль. Пойг кайкуччел пяйвал вандхад аи. Батэй кяськ рата сихессай, мисэ лийб тегижихе сёда ку меденке. Неце пойг:

– Вайтти, либо пробуйда рата да кюнтта кюлякс.

Неце прихя радашканз кюлякс, ка лийб тегихе магед. Прихя и сануб:

– Проўдан батэй саный: «Радад, ка лийб тегесэ магед».

Батть накажи: «Пойг, наймха ляхтед, ка кен эзмяйне вастха пуўтуб, сида и ота».

Неце пойг и задумай найда. Ляксь хян мецникоймаха оруждянке. Ляксь, ка хянэлэ линдыйне вастха тули. Нецен линдыйжен тахтэль ампта, ка хян уўгалэ дё наголо иштузэ. Неце прихя сэ сануб:

– Батэй саный, мисэ кен вастха тулоб, ка отта милэй неце линдыйне.

Нецен линдыйжен той хян кодихе. Элэтазэ, ка линдыйне мин войб рата. Элэтазэ дё коўме пяйвад. Неце прихя мяни риндал бабыйнну. Бабыйл и кюзуб:

– Милэй ом тодуд линдыйне акакс, батэйл ом кясттуд.

Неце бабый и опендаб:

– Ота поўтынтруб и кяске хомен омбелта пайд да каддяд.

Неце прихя дё тули кодихе, отть, андый трубан поўтнад, кяськ техта пайдан и каддяд.

– Мина олэн отну синдэй эмагакс.

Неце прихя ляксь мецха мецникиймаха. Неце линдыйне отть, адивокс тегихе, адив тегихе, ка што надо. Нециле прихялэ пайдан, каддяд омбель и варнха риппуть. Иче линдыйжекс и кяндихе. Неце прихя тули, ка пар собид омбелтуд варнас. Неце прихя бабыйнну и дёксоб.

– Бабушко, – сануб, – омбелну ом паран собид.

– Вот, – сануб бабэй, – хомен мёст кяске собид омбелта, а иче мянэ то ӱксвоччид вицейжид и сану, мисэ мян мецха, а иче вардийче вереян тага.

Неце нийжне пайдад, каддяд омбель, верейле и ляксь. Неце прихя няггоб вереян тага, мисэ нийжне луяс красивы. Неце нийжне тагазэ продишканз, прихя хянт и табазь и дотого нецен нийччен лёй ненил вицейжил. Неце адив дё кяндихе сякиякс зверикш: хян и гадакс, хяндикахакс. Потом кяндихе вяртнякс. Но, неце прихя и сануб:

– Назад, золота гора, наперёд, молода жена.

Неце прихя отть вяртнян каткейж и кандон аллэ и пани. Адив тегихе, ка што надо. И эляшкатхе. Адив сэ и сануб:

– Айгиш, Ванюша, сина заводид миндэй опета.

Хё эляшкатхе. Ну, тойжиш майшпей тедишть прихя, мисэ ом хивя адив. Адивон пидаб отта тойжихе майхе. Но сига хийл ома дяги-бабад слугад. Ванюшад и куцтазэ царинну.

– Вот, – сануб, – Ванюша, сина малтад, санутазэ, детскиян суман люўта.

Неце прихя сануб:

– Эн мина малта.

Неце мурзейменну и тули. Мурзеймелэ и сануб:

– Милэй нинга кясттихе техта.

Ну вот, мурзейн опензь хянт и селгить кут люўта.

– Мянэ дорогад мёто и сига кюнттазэ серыял хёбол. Ну вот, сина дергейда коўме карвашть.

Неце и мяни детскиян суманну. А сигя маа дё кайк трясише.

– Не трясись, мать сыра земля, на тебе подарки.

Неце отть, карвейжид хийть синна и сигапей ляхттихе сумад, сундуган целыян. Вот, неце прихя сундуган отть пян пялагелэ и кодихе цариле вёб. Ненед дё слугад пордхил варастэтазэ:

– Анда, мё вём.

Неце прихя сануб:

– Кен люўзь да той, ка сэ и вёб.

Нецен суман и вей. Царь сануб:

– Мин же войн пян чапта?

Неце прихя мёст кодихе ляксь. Ненед слугад и мёст замекайтхе: куни ий извоткой прихяд, ка ийса отта мурзейнт. Царь сануб:

– Ванюша, сина махтад техта царин лонген, кайкед, окроме линдунмайдод олиж, сига кайкед олиж.

Неце прихя кодихе ляксь, тули мурзейменну и сануб. Мурзейн сануб:

– Мина саныйн силэй, мисэ айгиш заводид опета, ӓй хлопотийд лийноб, –неце мурзейн сануб, – вере магатта.

Неце мурзейн кунасэ кявелзь и теги до того лонген, кайкед, окроме линдунмайдод.

– Мянэ, – сануб, – вё и ала анда нениле дяги-бабийле вёда.

Неце прихя и вей. Дяги-бабад дё пордхил сийштазэ:

– Анда, Ванюша, мё вём.

– Эн дё анда, кен той, сэ и вёб.

Неце царь и сануб:

– Кут мё войм хянэл пян чапта, хян мёст теги лонген.

Неце прихя мёст кодихе тули. Пройди вяхейне айгад и прихян мёст куцтазэ царинну.

– Вот, – сануб, – Ванюша, сина махтад элябид гусид техта.

Сэ божиже: «Эн махта».

А хё санутазэ: «Эд техне, ку тегезэ пя чапта».

Вот неце прихя и сануб Настасья-Прекраснаялэ:

– Нягед, мина саныйн айгиш сина заводид миндэй опета, ак и сануб, – мя пакиде кукс айгад ненид каксь акад, кудамбид пидаб извотьта.

Тулдхе. Ляхтхе. Мурзейн андый пайкейжехе энтя мида кирдить, ну и селгить хийд лёцзэ родимиялэ малэ. Ну вот, ненэ мяндихе, мяндхе кувердан сэ айгад. Пертийне

– Пертийне, пертийне, пяйвхапей оцин, мийхепей пордхейжин.

Пертийне азотихе. Пертхе и мяндхе.

– Фу-фу! Тридцать три года жила, русского духа не видела, русский дух явился!

Неце прихя и сануб:

– Бабушко, хилляшти, чомашти. Эд эхтну сётта, ни дётта, а ригехтид кидоштада.

Неце акк и кюзуб:

– Куспей тё олэт, куспей мянэтт?

Неце прихя и сануб:

– Нинга и нинга. Санутихе: тяс техтазэ элябид гусид.

Акк и сануб:

– Минун пойгад техтазэ. Вот, – сануб, – пойгад тулдазэ, ка куна тийд панда? Хё тийд сёдазэ.

Неце отть, пани ӱхтэн каймлохо, тойжен пани тойжхе, прихян – пян пялагелэ. Вот, ненэ прихяд и тулдхе мецаспей.

– Энтя мида ом русский дух пертиш.

– Олдхе наку рахваз, – мамм сануб, – кясттазэ гусид элябид техта хё.

– Микш жо пястид хийдазэй?

– Вайтти мина пордхиле мянэн хийкалдан.

Мяни, тряхни, хё и ляхттихе. Тулдхе пертхе. Прихяд и санутазэ:

– Мида кявелетт?

– Кявелем, – санутазэ. – Тё махтат элябид гусид техта.

Ненэ прихяд санутазэ:

– Сийчас, сём да дём и тегем.

Сёдхе, дёдхе и ляхттихе техмаха.

– Анда, – санутазэ, – мийле тянна пидатэй мезь.

Неце акк мяни, акан и селгить.

– Но вот, – санутазэ, – тулид иштте и нуккахта ала. А нуккахтад, ка сад корвалэ.

Неце акк, роўк, пидать, пидать и нуккахть.

– Нуккахтид?

Акк ий теда, мида сануда. Сануб:

– Нуккахтин.

Хё корвалэ, акк и риктихе.

– Анда тойне пидатэй.

Неце тойне акк мяни.

– Ну вот, сина ала нуккахта, – акалэ и санутазэ.

Акк нуккахть. Акалэ и санутазэ:

– Нуккахтид?

Акк сануб:

– Нуккахтин.

Акалэ пядмёто корвалэ хлопни, акк и коль.

– Ну вот, нугуди тулэ иче.

Неце прихя и мяни.

– Тулид, а нуккахтад ка и силэй сэжо.

Неце прихя пидать и нуккахть.

– Сина нуккахтид? – санутазэ.

Прихя сануб: «Эн нуккахтану».

– А мин тегид?

– А думэйн.

– Мин думэйд?

– А мяргад мад, вей куйвад ом энамб? – прихя сануб. – Мяргад мад ом энамб.

– Вайтти, мё мяам мяричем. Ийля проўд, ка сурм силэй.

Мяндхе, мяритихе и мяргад мад энамб. Хянэн проўд и ляксь. Эдэлэзэ и пидатаб. Ну, мёст и нуккахть. Мёст санутазэ:

– Нуккахтид? – санутазэ.

– Эн, – сануб. – Думэйн.

– А мин думэйд?

– А думэйн: пеньт мецад вей сурьт энамб ом. Миндэй мёто, – сануб, – пеньт мецад ом энамб.

– Вайтти, – санутазэ, – мё мёст мяричем.

Ну вот, хяндаст мёто и ляксь: пеньт мецад энамб. И мёст пидатаб эдэлэзэ. Хян и нуккахть мёст.

– Нуккахтид?

– Эн, – сануб, – нуккахтану, а пайкейжен корманаспей отин.

– А ну вей, – санутазэ, – мий ом силэй пакейжес?

Оттихе пайкейжен, лугетихе: неце ом хийде вяву.

– Ох, – сануб, – мё хяткестийм, адив ом оттуд и столан тага ишттазэ, варастэтазэ час на час.

Оттихе, теравашти ненэд гусид тегалтихе и санутазэ:

– Кудамб мийш терамба вёб?

Ӱксь сануб:

– Мина вён часус.

Тойне сануб:

– Мина вён полес часус.

Коўманзь сануб:

– Мина силмалэ панен, мигнин и сига лийноба.

Ну, неце силмалэ пани и мигни. Хё дё пордхил ома. Неце адив дё сига варастаб, ий уско. Адив нягишть, мисэ мяноб прихя, дё тулоб. Неце нийжне дёўгал столалэ и лавалэ хиппяхть, отть ненэ гусид кайвий да пясть вяммаха. Адив и сануб:

– Гуси, что можете, играйте!

Ненед гусид дотого техтхе, столад веретихе, народад ӓян риктихе. А царь и сануб:

– Азота, ика кайкид дё рикийд.

Неце мурзейн и сануб:

– Гуси, что можете, то и играйте!

Неце царь сануб:

– Тяйзё, азота!

А прихя сануб:

– Кирдитанед кайкелэ царстволэ царикш, ка аскей азотан.

Неце царь отть и кирдить царикш и тянамбей сига элэтазэ.