| Сюгюзьвернисаж
Сюгюзькун 15. пяйвял Шоўтjӓрвес эзмяйжен кердан оли ӓникойдэн, юрьказвмусидэн и фруктойдэн озутэлуз, миччен ними оли "Сюгюзьвернисаж — 2012"
Шоўтjӓрвен школаннокс керазихе ӓй риституйд: Шоўтjӓрвен эляид, адивойд Тойжегеспяй и Калагеспяй.
Айгтегон сядаяд тегиба ӓй мелентартуйжид номинациёйд: "Минун чемпион", "Тервхен фабрик", "Витаминойдэн айт", "Ӓникойдэн кунигахузь", "Веразмайне чуд" и тойжид, миччихе ӱхтни ӓй эразвуйччид композициёйд. Калаген школан опеникад и эляяд Калагеспяй ӱхтниба нецхе озутэлусхе и сайба лахjсиёйд. Номинацияс "Минун чемипон" эзмяйжен сиян сай кундэндэн классан опеник Лида Логинова. Хян ом казватану кайкид сурембан морковкан. Номинацияс "Ӓникойдэн кунигахузь" эзмяйжен сиян сай сейчемендэн классан опеник Алёна Малышева ӓниккомпозициянке "Негликаз чуд". Номинацияс "Тервхудэн фабрик" вягести Валентина Александровна Малышева лаконос- и физалис-зелльказвмусидэнке. Вягестаиле анттихе арвокахид лахъёйд, а кайк фестивалин ӱхтникад сайба китяндкиръейжид и пенид лахъёйд. Ярмалкал войли остта юрьказвмусид, фруктойд, маръёйд, эразвуйччед ӓникойд и зелльказвмусид, мет и ӓй тошт, а мугажо риституйл оли воймуз ваехтадас соладусидэн и марjкейтусидэн вархапанендойдэн рецептойл. Тахтойше сануда сурь спасиб кайкиле, кен теги нецен мелентартуйжен айгтегон — Шоўтjӓрвен администрациян пямехелэ Ирина Сафоновалэ и культуррадникойле. Ся оли мугойне-жо хювя и чома, кут иче озутэлуз, сикш оли ӓй рахваст. Кут ом хювя, конз вепсляйжиш кюлиш техтас мугойжид айгтегойд. Ненэ ома тодэсижед пенед празникад, миччед керадаба кюлидэн эляид ӱхтэс. Мё тойвом, мише неце ярмарк-озутэлуз тулеб хювякс традициякс.
Мария МИРОНОВА
| 
