Видензьпяйв, 03.02.2023

ВВИКП

сайт в разработке
  Кириллица - наша азбука!  
Сайтан меню
Ягусэн категорияд
"Образцы вепсской речи" [15]
Материалы из книги М. Зайцевой и М. Муллонен "Образцы вепсской речи" 1969 года, записанные кириллицей.
Вепсские народные сказки [24]
Сказки из книги "Vepsän rahvhan sarnad" 1996 года, записанные кириллицей.
Vepsänman sarnad [8]
Сказки из книги "Vepsänman sarnad" 2006 года, записанные кириллицей
Ičemoi londuz [4]
Тексты из книги "Ičemoi londuz", записанные новой вепсской кириллицей
Kodima [25]
Материалы из газеты "Kodima", записанные кириллицей
Вепсская Викия [1]
Статьи из Вепсской Викии (Вепсян Викияспяй лехтполед)
Песни группы "Noid" [4]
Тексты песен группы "Noid", записанные кириллицей.
Списки слов из словаря [3]
Списки слов из вепсского диалектного словаря 1972 г.
Другие материалы [3]
Реклама на сайте
К представленной на сайте рекламе сторонних страниц автор сайта отношения не имеет. Платформа сайта ставит её автоматически. Приносим свои извинения.
Деклараций
Всеобщая декларация прав человека на вепсском языке (в новой вепсской кириллице)
Новая книга
М.Ю. Кузнецов. Русские черты в вепсском синтаксисе. СПб, 2018.
Статистик

Онлайн всего: 1
Гостей: 1
Пользователей: 0
Форма входа
Главная » Статьи » Вепсские материалы » Kodima

Ёга кюмнензь возь ом вепсян культурвозь
Ёга кюмнензь возь ом вепсян культурвозь

Вепсян культурвозь 2012
       Ёга кюмнензь возь Юминкего-фонд (Кухмо, Суоми) тегеб ӱхтэс Вепсян культурсебранке, митте сиядасэ Каръялан валдкундас, Вепсян культурводэн. Сэн айган пайндас вепсянкелижид киръёйд, сятас озутэлусид, семинаройд, празникойд и тойжид азjтегойд. Ненэ тегод ладитас Суомес и Вепсян мал: Ӓнижвепсляйжил тахойл, Ленинградан и Вологдан агъёйдэн кюлиш.
       Водэл 2012 ведэтас вепсян культурвозь ё коўмандэн кердан. Юминкего-фонд ом сану тугед культурводэн тяхт Альфрэд Кордэлинан фондаспяй.
       
Пайндусэд
       Вепсян кирjкель лехтихе эзмяйжен кердан Веняман революциян jӓльгхе. Пайндихе лехтэсид и техтихе опендузкиръёйд. Сталинан айган ӓjид опендузкиръёйд полттихе. Вайше перестройкан jӓльгхе (1980 возидэн лопус) завоттихе удэс лода вепсян кирjкельт. Эрасидэн патриотойдэн вягил техтихе и пайндихе вепсян абэце-кирj; оли оттуд похъязэ кирилижед киръямед. Но сил-жо айгал вепсляйжед тедонайжед заводиба мугажо вепсян кирjкелен тегемишт, миччен похъязэ хё отиба латиналайжед киръямед. Сиш айгаспяй заводихе вепсляйжен литературан вахв либунд.

Вепсляйжед знамасижед персонад
       Кайк маман келел пагижияд вепсляйжед ома знамасижед персонад. Вепсян кельт лугетас луяс ванхакс келекс балтиянмерен суомалайжидэн келидэн кескес, митте ом, войб олда, ляхемб тойжид пракельхе. Вепсляйжил ома мугажо вахвад культурверод да культурjӓльгестуз. Вепсляйжед ом вяхялугуйне рахваз, сикш кайкутте хейшпяй ом арвоказ.

НИНА ЗАЙЦЕВА
       Кельтедомест и рунойлияд Нина Зайцевад войб лугеда вепсян кирjкелен мамакс. Хян оли сэн процессан охъяндаян, миччен сатусэн оли заводитуд перестройкан айгаспяй вепсян кирjкель.
       Хян радаб Каръялан тедокескусэн Келен, литературан и историян институтас кельсекторан охъяндаян.
       Хян оли нийдэн кескес, кед тегиба Вепсян культурсебран и вепсянкелижен Кодима-лугендлехтэсэн. Хян оли лугендлехтэсэн эзмяйжен пятоймитаян кахеса вот.
       Хян ом кяндну Калевалан вепсякс и киръютану рунойд. Вепсян культурводэн 2012 пайндас хянэн Вепсян эпос "Вирантаназ". Сэн тегемине ом яткнус эрасед водэд. Эпосан похъязэ ом оттуд вепсляшт рахвахалишт фольклорад да мифологияд.

ЗИНАИДА СТРОГАЛЬЩИКОВА
       Зинаида Строгальщикова ом тетаб персон, кудамб мюлюб эзмяй кайкид Вепсян культурсебран тегиёйдэн группаха. Кайк культурсебран радводэд хян ом сэн ваехтаматой пямезь. Хян пани ӓй вягед вепсян идентитеткюзундан пятандаха и сэн знамойчендан либутандаха рахвахан тяхт. Зинаидан тегод нягуба сиш, мише эразвуйччиш агъёйш эляяд вепсляйжед рижаба нюгюдь ичтазэ ӱхтхижекс рахвахакс. Хянэн тедотёд, миччиш хян оппиб вепсляйжидэн историяд, паниба похъян вепсляйжидэн ичетундэндалэ.
       Хян оли валитуд депутатакс и радой Каръялан парламентан пямехиштон группас; хян ом ӱксь парахимиш вяхялугуйжидэн игяхижидэн рахвахидэн тундиёйшпяй, тугедаjишпяй и полестаjишпяй. Хяндаст войб лугеда вепсляйжидэн корктембакс эзитаякс валдкундас и кескрахвахалижес мезькундас.

РЮРИК ЛОНИН
       Рюрик Лонин (1930 - 2009) оли вепсляйжен рахвахан эдустай, кудамб тартуй керадамха кодирёўнан фольклорад и эловеройдэн калуйд вёл эдэл перестройкад и гласностид. Хян оли Шоўтjӓрвен вепсляйжен музеян тегий. Музей оли авайтуд водэл 1967, а Рюрик Лонин  оли сэн пямехен 2001 водхесай. Нюгюдь музей кандишеб хянэн нимен.
       Водэл 1980 Рюрик Лонин заводи эзмяйжен опета лапсиле вепсян кельт Шоўтjӓрвен школас, хоть эй олэнд-ки опендаян. Хян ом киръютану ӓй киръёйд, паяти Шоўтjӓрвен рахвахалижес хорас. Хяндаст лугетас знамасижекс вепсян рахвахан персонакс, кудамб пайной ӓjидэн вепсляйжид коскиёйдэн кюзундойдэн пятандаха.

АНАТОЛИЙ ПЕТУХОВ
       Анатолий Петухов ом тетаб вепсляйне киръютай. Хян ом сюндуну Вологдан агъян Шимjӓрв-кюляха. Хян киръютаб венякс, но темойд отаб вепсляйжидэн элоспяй. Вёл Советскиян Союзан айган хян оли ё Киръютаjидэн себран ӱхтник. Хян ом сану ӓй лахjпаўкойд ичезэ киръютандрадос. Хян ӱхтни мирун эзмяйжехе ӱхтхижехе киръютаjидэн и рунойлиёйдэн конференцияха, митте оли техтуд водэл 2002 Юминкегос и пагижи ичезэ коллегойдэнке вепсян келел. Тойне мугойне конференций техтас хянэн нюгюдьляйжес элосияс Вологдас.

НИКОЛАЙ АБРАМОВ
       Рунойлияд Николай Абрамовад войб лугеда кацмата хянэн возихе ё вепсляйжен литературан классикакс. Хян киръюти эзмяйжен литературижен киръян - "Koumekümne koume"-рунокиръян. Сэ пайндихе водэл 1994. Сэн jӓльгхе хян ом пайнну ӓjид рунотекстойд и радой редакторан вепсянкелижес "Кодима"-лехтэсэс. Хянэн рунод ом кятуд ӓjихе келихе. Хян иче-ки ом кяндну вепсян кельхе венялайжидэн классикойдэн и рунойлиёйдэн рунойд. Jӓльгмяйжил возил хян радой мугажо фотокувадаян; хянэн фотокувидэн темад озутаба энамба кайкед вепсляйжидэн элод.

СВЕТЛАНА ЕРШОВА
       Светлана Ершова ом сюндуну кесквепсляйжехе Ладв-кюляха и радой опендаян Курбан школас. Опендузрадон лижакс хян ом керадану эразвуйччид ванхойд кодикалуйд, миччед ома озутанудэд вепсляйжидэн эндэванхад элод да веройд. Ненэ экспонатад ома тулнудэд кодимузеян похъякс.
       Хян ом ӱксь активижиш риституйшпяй, кудамб радаб вепсян культуран кайчендобластиш. Ичезэ активижес радос хян сай тетабан "Древо Мира"-премиян.

НАТАЛЬЯ АНХИМОВА
       Шоўтjӓрвен Вепсян музеян пямехен Рюрик Лонинан jӓльгхе ом технус Наталья Анхимова, кудамб ом мугажо вепсляйжен рахвахалижен хоран хомайчий ӱхтник. Хян ом сирдну эдэхепяй музеян радод, техну ӓй музеян озутэлусид, кут ичезэ кюляс, муга сэн ирдполел-ки. Вепсян музеян озутэлусид ведихе, озутэсикш, Петроскойхе, Москваха, Суомехе (Юминкегохо). Вепсян музей ом сану хомайчиян сиян Веняман федералижидэн музеёйдэн кескес.

РАИСА ЛАРДОТ
       Шокшун кюляха (Ӓнижвепсян рёўн) сюндуну Раиса Лардотан перех ваехти ичезэ элосиян и аёй Суомехе войнан айган 1940-возил. Киръютаян радод хян заводи 1970-возил и сай тетабудэн "Ripaskalinnut"-киръян пайндэс, миччес хян старинойчи ичезэ вепсляйжес лапсьайгас. Хян ом коскну вепсляйжид темойд и верхазэ маха сирдяндад ӓjиш тойжиш-ки киръёйш.

Тедод вепсляйжидэн эзитатойш мирус
       Ванхад венялайжед хроникад 800-возилпяй старинойчеба, мише вепсляйжед олиба ӱхтэс венялайжидэнке и булгарилайжидэнке Веняман валдкундан ладимас. Вепсляйжед элиба эрилайжихе полихе водаjил ёгидэн ладвойл и олиба хомайчияд мёндмехед, эзмяй кайкед, викингойдэн айган. Мёхемба вепсляйжед кадойба мирун карталпяй садойкш возикш, сэн айган венялайжед заводиба куцта кайк балтиянмерен суомалайжид рахвахид чудикш. Кельтедомезь А. Й. Шёгрен "лёўзи" вепсляйжид удэс 1820-водэл.
       Хоть вепсляйжед ома нюгюдь вяхялугуйне рахваз, хейдэн культураспяй ом тулну ӓй лижад мирун культураха: озутэсикш, Кижин пюхякодид ома саўнудэд вепсляйжед мастарид вай саўдихе вепсляйжидэн ладун мёдхе.
       Наполеонан саркофаг ом техтуд вепсляйжес кивеспяй. Монументан ладий тахтой техта саркофаган эндэванхас русттас кивеспяй, миттушт эй лёўднус ни Эгиптас, ни Францияс. Сидь садихе тедойд, мише Суомеспяй вай Венямаспяй сидя войб лёўта. 
       Суомес сил айгал эляй и Калевалан франциян кельхе кяндай Луи Лезон Ле Дюк сай тегокс эцта мугошт кивед. Хян эци кивед эзмяй Суомес, но лёўзи сидя лопукс Ӓнижjӓрвен и Сювярин кальт Суоменлахтэлэ, сишпяй меричи Ле Аврэн Франциян валдмадлиднаха, и сигяпяй эдэхепяй Сена-ёгедме Парижан кескусэхе. Монумент оли ваўмиж водэл 1861. Наполеонан каўм Инвалидойдэн пюхякодиш ом нюгюдь Парижан армаз муштпацаз.
       Ленинан мавзолей Москвас ом мугажо техтуд вепсляйжес русттас порфираспяй. Русттан авоирдан пялитусэкс ом оттуд мугажо вепсляшт кивед. Вепсляйжед олиба хювин кивиникойн и мугажо стёкулмастарин и пусепин. Вепсляйжид кязимастарид радой Суомен княжестван айган Хельсинкиш и тойжиш суриш суомалайжиш лиднойш.

Вепсляйне пуархитектур
       Вепсляйжед олиба мирун парахимин кирвезмехин. Хейдэн путайдэхен озутэсэд-пюхякодид ома хейдэн энччил и нюгюдьляйжил элосиёйл.
       Кижин пюхякодид ом пандуд ЮНЭСКО:н лугетижхе, нед ом саўдуд ӱхтэта наглата. Легенд старинойчеб, мише конз пюхякодид саўдихе, ка пумастаридэн пямезь либуй катусэлэ и сануй: "Мугошт эдэл эй саўдуд, да тулияс-ки айгас никен эй саўво". Сэн jӓльгхе хян таци кирвхен jӓрвехе.
       Химъёген кюляха jӓй нюгюдь вайше куверт-сэ вепсляшт, но хейдэн кюлян тетабут тугедаб чомашти саўдуд пюхякоди.
       Калль-кюлян пюхякоди ёхтутаб ичезэ саўвондладун мёдхе Кижин кезапюхякодид, но сиш ом вяхемб куполойд.
       Ӱксалан 1490-возил саўдуд пупюхякоди ом кути вепсляйжидэн кирвезмехидэн мастаридэн да тайдэхмахтойдэн озутэз.

Пайндусэд
Юминкегон вепсянкелижед пайндусэд и пайндусэд вепсляйжес культурас
       Вепсян кирjкель лодихе эзмяйжен кердан Венян революциян jӓльгхе. Силой пайндихе лугендлехтэсид, техтихе опендузкиръёйд и литературад. Сталинан айган эрасид вепсянкелижид киръёцд полттихе. Вайше перестройкан айган вай 1980-возидэн лопус завоттихе удэс лода вепсян кирjкель.
       Активистойдэн кязишпяй тули вепсян абэце-кирj, сэн киръямиштон похъян олиба кирилижед киръямед. Сэн-жо айган завоттихе техта кирjкель латиналайжил киръямил. Оли пяттуд, мине ненэ киръямед паремба кожуба вепсян кулундойдэн ладуху. Заводихе вепсляйжен литературан вахв либунд.
       Вайше эрасэн озутэсэн jӓй вепсян букварь кирилижил киръямил (1992).
       Кирjкелен эдэмбайжен сирдяндан тяхт тарбиж абэце-кирj, митте оли пайндуд водэл 1991.

Юминкегон вепсянкелижед и вепсляйжидэн коскияд пайндусэд
       Киръёйдэн пайндуз техтихе вепсян келен и вепсян идентитетан тугекс.
       Кут вепсян культурводэн сатуз оли Нина Зайцеван Калевалан кяндмине вепсян кельхе (лапсидэн версий), миччен пайной Юминкегохо. Киръян кувити норь вепсляйне тайдэхпирдай Алексей Максимов.
       Kalarand ом эзмяйне вепсянкелине роман. Сэн ом киръютану Питериш эляй вепсян келен тундий и музыкант Игорь Бродский. Кирj пайндихе эзмяйжен вепсляйжидэн киръютаjидэн конференциян айгакс Юминкегос редукус 2002.
       Koivuine ом эдэл айгад колнудэн Алевтина Андрееван рунокирj. Киръяс ом хянэн рунойд вепсян и венян келел (2002).
       Kodima, Vepsänma ом кирj, миччес ом озутадуд вепсляйжидэн элотахойд. Сиш ом Маркку Ниемижен фотойд эрилайжиш Вепсян ман чогишпяй, а вепсянкелижед рунотекстад тяўтаба знамойчендад Вепсян ман чомудэн эльгендусэхе.
       Элиас Лённротан диссертаций "Om det Nord-Tschudiska språket" оли пайндуд эрипайндусэн (2002). Диссертаций оли ваўмиж водэл 1853, и сэ оли эзмяйне тедотё вепсян келес.
       Оли техтуд CD-диск, миччехе оли пандуд паёйд рахвахан суспяй (2002).
       Вепсян культурводэн 2002 сюндуй Элиас Лённротан вепсян мал киръютадуд сарнойшпяй "Vepsänman sarnad"-сарнкирj, миччен тодихе вепсян малэ.
       Оли пайндуд Анатолий Петухован венякелине кирj лапсидэн и нориштон тяхт, митте старинойчеб элос вепсляйжиш кюлиш.
       Элмиас Лённротан кератуд сарнойшпяй техтихе мугажо суоменкелине кирj. Сэн кувити Алексей Максимов, кут мугажо вепсянкелижкен-ки киръян.
       Нина Зайцеван и Ольга Жукован "Käte-ške käbedaks kägoihudeks"-кирj ом эзмяйне сурь войкуйдэн керадиж нотидэнке, кус ом мугажо леведад тедоэзисанад. Сэ оли культурводэн 2012 эзмяйне пандуз. Кирj ом пайндуд Юминкегон и Каръялан Тедокескусэн Келен, литературан и историян институтан ӱхтхижтён.
       Вепсян культурводэн сатуз: "Vepsän rahvahan sarnad" вепсякс. Сарнойд ом поймну эрасиш пайндусишпяй и тоймитану кирjкелен мёдхе Ольга Жукова. Киръян корькувитусэн ом техну Эстэр Торвинэн.
       Ольга Жукован валитуд эрилайжиш киръёйшпяй сарнад вепсян келеспяй ом кяндну суомен кельхе Маркку Ниеминэн. Кирjкорэн кувитусэн ом техну Эстэр Торвинэн.
       Ольга Жукован валитуд эрилайжиш киръёйшпяй сарнад вепсян келеспяй венгриян кельхе ом кяндну Эстэр Торвинэн, кудамб ом кувитану киръян.

Вепсянкелижед и тойжед вепсляйжидэн коскилад пайндусэд
       Вепсянкелине Kodima-лугендлехтэз завоттихе техта водэлпяй 1993. Эзмяйжен пяредакторан и кирjкелен сирдяян эдэхепяй оли Нина Зайцева.
       
Вепсляйжед рунокиръяд
       Узь кирjкель сюндутаб эзмяй кайкед мелентартуст рунойдэн киръютамижехе. Эзмяйжед рунотекстад озутаба эзмяй кайкед кодирандад и маман келен знамойчендад.
       Николай Абрамован эзмяйне рунокирj озути вепсян келен чомут и руномахтойд (1994).
       Сэ либути ӓjил вепсян келен тундиёйл тахтод киръютамха вепсякс.
       Абрамован тойжехе рунокиръяха мюлюб мугажо венялайжидэн классикойдэн кяндмижид: Пушкинан, Есенинан, Евтушенкон рунод кулуба чомин мугажо вепсякс-ки (1999).
       Коўмандэс Абрамован рунокиръяс ом хянэн рунойд вепсякс и венякс (2005).
       Нина Зайцеван рунод озутаба кодиман и ичезэ рахвахан чомут. Эрасид рунойд хян киръютаб лапсидэн тяхт, мише веразкелижес мирус эляяд вепсляйжед лапсед войжиба тундиштадас маман келенке (2008).
       Вепсляйжидэн рунойлиёйдэн ӱхтихе кирj "Verez tullei" старинойчеб, кут ичезэ келен туленд ёгапяйвяжехе элохо тугедаб кельт и сюндутаб тойвойд (2006).
       
Тедолитератур
       Кирjкелен кюпснемижен знам ом сиш, конз сил киръюташкатас тедолитературад.
       Эзмяйне сурь Венямал техтуд вепсянкелине тедокирj ом пайндуд водэл 2003. Сэн киръюти вепсян кирjкелен сирдяй Нина Зайцева.
       Наталья Анхимова ом техну киръян вепсян музеян фондиш (2003).
       Водэл 2008 сурен финно-угрилайжидэн рахвазэзитаjидэн конгрессан рамиш пайндихе Зинаида Строгальщикова кирj вепсляйжидэн полхе, митте кятихе вепсян-ки кельхе. Сэ андаб пятедойд вепсян историян айгкескустойш и культурас.
       Ӓйтедойне Ирина Винокурован тедокирj живатойш кут вепсляйжен мифологиян кескусэс пайндихе 2006 водэл.

Ваехникад
       Ваехникад тегесойш луяс тарбхайжикш, конз сюндуб узь кирjкель.
       Водэл 1995 лякси Нина Зайцеван и Мария Мулложен эзмяйне "Vepsä-venä-vepsläine vajehnik".
       Водэл 2007 пайндихе Нина Зайцеван и Мария Мулложен "Uz' venä-vepsläine vajehnik".
       Водэл 2009 ом тулну Нина Зайцеван и Ольга Жукован "Venä-vepsläine abupaginkirj".
       Водэл 2010 пайндихе Нина Зайцеван "Uz' vepsä-venälaine vajehnik".

Киръяд лапсиле
       Лапсидэнкиръёйл ом сурь знамойченд, конз тарттас техмаха ут кирjкельт. Оли пайндуд Владимир Луккожен кувидэнкирj, миччес кувид сатаб вепсянкелине текст (1992).
       Анна Коттинан, Александр Максимован и Нина Зайцеван лугендкирj лапсиле ом пайндуд водэл 1998.
       Нина Зайцеван рунокирj лапсиле ом пайндуд водэл 2005.
       Ольга Жукован кератуд вепсляйжидэн сарнойдэн кирj - 2012.

Опендузкиръяд
       Кирjкелен сюндумижен айган пидаб äй опендузкиръёйд эри-игяйжидэн лапсидэн тяхт.
       Кирjкелен тегемине заводише кайкен абэце-киръяспяй. Вепсян абэце-кирj пайндихе водэл 1991. Сэн тегиёйн олиба Нина Зайцева и Мария Муллонен.
       Водэл 1991 и 1994 ляксиба Нина Зайцеван и Мария Мулложен вепсянкелижед опендузкиръяд 2., 3.-4. классойле.
       Вепсян кельт опендаjиле лапсиле ом техну киръян Игорь Бродский (2000), кудамб киръюти мугажо эзмяйжен вепсляйжен романан.
       Лапсиле, кудамбад вайше заводиба опета кельт, ом техну ичезэ киръян Елена Кочерина (2004).
       Нина Зайцеван техтуд 1995, 2000 возил кахтэс киръяс ом пятедойд вепсян келес, сэн грамматикас.
       Нина Зайцева теги сурен опендузкиръян вепсян келен грамматикан теорияс 5.-9. классойдэн тяхт (2003).
       Нина Зайцева киръюти доктортён вепсляйжес вербас (2002).

Паёкиръяд
       Кельт войб опета паёйдэн кальт. Сикш тарбиж паёкиръёйд, эзмяй кайкед лапсидэн тяхт.
       Эзмяйжен вепсляйжен паёкиръян теги Вепсян рахвазхоран питькайгайне охъяндай Людмила Мелентьева (1994).
       Вепсян культуран кайчий Рюрик Лонин керази äй вепсляйжид люхюдойд паёйжид, миччид пайндихе водэл 1994.
       Ольга Жукова ом техну паё- и рунокиръян пениле лапсиле (2011).

Ускондлитератур вепсякс
       Кирjкелен кехитойтай Нина Зайцева ом техну мугажо Библиян кяндмижид. Нед пайндихе возил: 1992 - Маркан эвангелий, 1993 - Ёаннан эвангелий, 1996 - Лукан эвангелий, 1996 - Лапсидэн Библий, 1999 - Апостолидэн тегод, 1998 - Матвеян эвангелий, 2006 - Узь завет.

Суомалайжед пайндусэд
       Суомес ом мелентартуст вяхялугуйжехе вепсляйжехе хеймрахвахазэ.
       Суомалайжен Литературан Себр ом пайнну Калэви Виикан киръян вепсян келен вокальгармонияс (1989).
       Микко Саволайжен фотокирj Вепсян ман полхе старинойчеб кюлидэн элос и мехиш 1990-возил.
       "Jäätyneet linnut putoavat oksiltaan"-рунокирj ом Раиса Лардотан кядэл техтуд. Киръяха ом мюлютадуд Микко Саволайжен фотойд.
       Суомалайжен Литературан Себр ом пайнну водэл 2005 сурен киръян вепсляйжиш и хейдэн культурас. Тоймитай - Лассэ Сарэссало.
       Вепсян мал сюндунудэн Раиса Лардотан "Ripaskalinnut"-кирj старинойчеб верхазэ маха сирдяникойш тойжен мирвойнан jӓльгхе.

"Элонпу"-празник
       Ӓнижвепсян мал и мугажо Вологдан и Питерин агъёйш вепсляйжед тегеба ӱхтхижид "Элонпу"-кезапразникойд. Празникойд пидэтас чередан мёдхе эразвуйччиш сиёйш. Кезал 2012 (10. кезакуд) мугойне празник ведэтихе Видлас (кесквепсляйне агj).
Категория: Kodima | Добавил: Максим (27.08.2012)
Просмотров: 633 | Комментарии: 1 | Рейтинг: 0.0/0
Всего комментариев: 0
Имя *:
Email *:
Код *:
Водская сказка
Надменная принцесса
Ютуд я каазгõд
Ижоран кааска
Только у нас!
Сказка из грамматики Волмари Поркки!

Ваддя каазгõд
Только у нас!
Сказки из грамматики Августа Алквиста!

Ваддя ютуд
(Водские предания)



Вепсян сарнад
Сарнад Матвеянсельг да Тихоништ-кюлишпяй
(Сказки из деревень Матвеева Сельга и Тихоништа)


RSS

Все новые тексты!
Подпишись!
Чат
Добро пожаловать в чат!
Курсы вепсского
Курсы вепсского языка в Санкт-Петербурге!
Подробности здесь.
Автор пагижеб
Ищете водские сказки?
Ищете вепсские сказки?
Ищете ижорские сказки?
Всё есть!
Эцмине
Друзья сайта
  • Ucoz
  • Энецкий сайт
  • Вепсская Викия
  • Вепсская Википедия
  • Сайт СПб Вепсского общества
  • Немного расскажу о води...
  • Эвенгус и Эвенкитека
  • Тофастан
  • Браузер
    Для просмотра сайта рекомендуется браузер Google Chrome
    Copyright MyCorp © 2023
    Конструктор сайтов - uCoz