Сиз тааз õли лайскõ найнõ. Чедрӓз коонталаа. Мõнт пӓйвӓӓ тӓмӓ чедрӓз. А мээз кацоб, ётти коонтõлõ эб лõпу. Пани раттии вõттимõõ коонталаа. Тули мээз коттоо. Найн давай сõйттõõмаа: «Кухõ сиӓ панид раттии вõттимõõ? Миӓ эн пӓӓзнӱ и раттиисõõ. Айн он ахъё лӓммиттӓмӓттӓ. Эб õллу, митӓ кэйттӓӓ».

Мээз мэни дõ коблаб. Раттии вõттимõд сиин ӱхэз пайккаа он чи. А мээз õли мõнта пӓйвӓӓ тӧӧз кузалэ. Но сиз мээз юттõõб: «Но ко миӓ коолõн, тӓллээ эб лээ и силмӓкангасс, митӓ панна».

Вõтти сэ мээз нарошно кооли. Нõйси лавõзõллõ. А найзикко кацоб: «Мигӓлл миӓ нӱд катан?»

А ӱхс вӓрттэнэ õли чедрӓттӱ. Тӓмӓ вõтти сэнээ вӓрттэнӓ чӓттээ, я алки панна мэхэлээ силмкангасс. Пааб кõрваасõõ. Сиз тааз пааб варпаасõõ. Лооб этээз такааз. Пааб ӱмпӓр пӓӓтэ. Сиз тааз тõйсõõ варпаа. Вӓрттэнэ лõппу. Сиз иссууз найн я кацоб мэхээ пӓӓлээ, я юттõõб: «Ченэсэ сиӓ нӱттӓ õõд похож?»

А мээз вассааб лавõзõлт: «Балалайкаасõõ».

А лõппу нӱттэ.