СЯ МЕЙДЕН РАНДАЛ 

Мё тедам, мише тальвел ом луяс вилу, а кезал – лямь, а эрасти и ряк. Сюгюзел тегесэ вилумб: сюгюзь ом кути силд кезаспяй тальвехе. А кевядэл, васткарин, тегесэ лямемб, и кевязь ом кути силд тальвеспяй кезаха. Ирдильман лямудэн тойжетэсэд войб мярита лямянмяричимел. Ильман лямуз казваб тальвеспяй кезахапяй и вяхенеб кезаспяй тальвехепяй. Сикш ся-ки тойжетасэ.

Кезал хювин эляба живатад да казвмусэд. Кайк вихётаб, казвмусэд хювин казваба и ӓникойчеба. Мецас ом ӓй маръёйд, сенид, бабукойд и пяхкмид. Войм паксус нягиштада эразвуйччид живатойд, линдуйд, гаведид; йӓрвиш да ёгиш уюба калад; линдуд казватаба пойгайжид. Кайкиле тяўдуб сёмяд да пяйвяшт, и эло лондусэс кехуб. Хювя ом кезал лапсиле-ки: войб кявелта мецас, кюльптяс, пяйвитадас. Кезал ом ӓй ихастуст да илод.

Сюгюзел ом вилумб, ми кезал. Живатад ваўмичесэ вастмаха тальвед. Оравад, хиред да тойжед пенед живатад панеба сёмяд варха. Эрасэд линдуд лендаба сувимайхе: мейден мал тальвел ом хейле вилухк. Лехтэсэд Пуйш пакуштуба и сидь ланктэба маха. Вайше кузиш, кадагиш да педаиш ома тальвел-ки вихандад неглад. Кайк живатад, мехед, казвмусэд варастада тальвед, эзмяшт лунт.

Наку тулеб тальв. Ма тальвел луяс кюльмяб. Кайкъял ом луми – суред лумиӱбусэд: паксус ом йӱгед ирдалэ-ки ляхтта. Паўкаб пакайне, а йӓрвед да ёгед ома йӓс. Пуд сейжуба лехтэсита, пальхад. Йӱгед ом живатойден эло. Конди, мягр, неглик, маконди магадаба мапезойш, а тойжед ёксэндэба мецойдме да лумекахид пёўдойдме, эциба сёмяд. А оравайжелэ ом хювя: хян ом айгводхе панну варха ӓян пяхкмид да бабукойд. Тальвел ом йӱгед эляда линдуйле-ки – хейле ом вяхя сёмяд. Лапсиле тальвайган ом ани хювя: хё шургаба регузил, хихтаба суксил, вяндаба лумизил.

Тальвен йӓльгхе тулеб чома кевязь. Нюгюдь ся ом ё лямемб, ми тальвел. Луми сулаб, и вези шольайтэн ёксэб йӓрвихе да ёгихе. Ма тегесэ мёмст пехмдакс, везиуйтод хейтаба ичезэ йӓсобад. Лумен алпяй либуба эзмяйжед ӓникойжед – чомад лумикеллойжед. Пуйш ё турптаба урбад, а сидь ляхтэба эзмяйжед вихандвоўвхад лехтэсэд-ки. Узь хейнют-ки казвашкандэб. Кевядэл кезалиндуд пёрдасэ тагазэ мейденнокс лямиш майшпяй. Хё тегеба ичелэзэ пезайжид, муниба и варастаба пойгайжид. А эрасил живатойл пойгад ом ё технус, и хейд пидаб хювин сётта. Кондъяд хераштуба питькян магадусэн йӓльгхе луяс няльгхижед, эскай мехен-ки войба сёда.

Нюгюдь кацкам, мидя тегесэ ильмас эразвуйччил возьайгойл. И кезал, и тальвел, и тойжел айгал тайвхалпяй ланктэб вези. Кезал ом лямь, сикш вези-ки ланктэб маха нозолан – силой вихмуб; луяд вихмад куцтас вихмкурокс. Эрасти кевядэл да кезал валаб вихм юрунке да самалдусэнке – неце ом юмалан ся. Тальвел ом вилу, и вези, кудамб ланктэб тайвхалпяй, кюльмяб – силой садаб лунт. Кевядэл да сюгюзел эрасти лунт садаб да вихмуб ӱхтэс. Мугошт сяд куцтас ряндакс.

Вихм – неце ом ӓй пенид везитиппуйжид, а луми – неце ом ӓй лумузид. Лумут ом кюльмну везитиппуйне. Кацкат, миччед чомад ома лумудэд. Эрасти типпуйне кюльмяб тяхтхайжекс, а эрасти ристайжекс. Но ӱкс-сэ, сулану лумут кяндасэ везитиппуйжекс.

А эрасти казал-ки корктас тайвхас ом муга вилу, мише маха ланктэб ё кюльмну вези. Вайше силой маха ланктэба пеникайжед йӓсупалайжед – неце ом рагиж.

Ильмас кайкен ом вет, пеникайжид везитиппуйжид. Пильвед тегесэ ильмас нециш ведэспяй. Пильвед ома эразвуйттушт муюд да формад, и туллейд аяба хейд кайкед маильмадме. Тё, нацейн, олэт няхнудэд сумегед-ки. Сумег ом пильвен появ, кути масс венуй пильв. Пильв и сумег ома веллесэд: сумег-ки тегесэ пеникайжиш везитиппуйжишпяй, конз ильм вилугандэб: Сумегес вай ведэн пял, конз тайвхас ом пяйвяйне, войб нягиштада чоман юмаланбемблен. Пяйвяйжен сильмад пязуба ляби везитиппуйжиш ильмас, пидятаба хейд, и тайвхалэ тёнгахтаб чома муюказ бембель.

А олэт-ик няхнудэд кевязькезал и кезал касткен? Кастэ – неце-ки ом ӓц везитиппуйжид, кудамбад нягуба хейнял айгойш хомендэсэл. Вези ильмаспяй иштусэ хейнялэ, сикш мише хомендэсэл хейн ом вилу. Пяйвял хейн лямбитасэ, и кастэ кадоб.

Сюгюзьтальвел хейнял, пуйш, айдойл, кивил, пертил, тойжиш сииш войм нягиштада хюдэген. Пуд и пензхад хюдэгес – неце ом луяс чома. Хюдэг – неце ом кюльмну кастэ, вези, кудамб касткен картте иштусэ казвмусиле, кивиле и кюльмяб.

Мейден рандал паксус пухуб туллей. Войб мярита туллейн вяген, миччен пигудэнке сэ пухуб. Войб хомайта, куспяй неце туллей пухуб. Лагедан тахон пялэ туллей кайкен пухуб вягевамба. А конз тальвел туллей пухуб луменке, ка силой ухойчеб.

КЮЗУНДАД

1. Кут тойжетасэ ильман лямуз эрижил возьайгойл?

2. Санугат, миччед собад риституд панеба пялэ эрижил возьайгойл?

3. Санугат, кут тойжетасэ ся тейден тахос эрижил возьайгойл?

4. Конз садаб лунт, рагишт, конз вихмуб?

5. Микш сумег коскуб пильвехе?

6. Ми ом юмаланбембель, кастэ, хюдэг?

Материал лугендан тяхт

ЛУМИ

Ми ом луми? Сэ тегесэ ӓиш чомиш лумузишпяй. Лумудэд ланктэба маха ани тайвхалпяй, пильвишпяй. Ку пильвеспяй ланктэба маха везитиппуйжед, ка вихмуб; ку тайвхал везитиппуйжед кюльмиба, тегесэ рагиж. А кут тегесэ луми?

Везипуру либуб маспяй корктаха, синня, кус кайкен ом луяс вилу. И сидь-жо нециш пуруспяй тегесэ ӓян пеникайжид ковид кузьчогайжид кристаллузид. Кайкутте кристаллут кайкен казваб и йӓльгмяй кяндасэ чомакс тяхтхайжекс. Конз лумудэд ланктэба маха, тегесэ луми – эзмяй хойк пархайне, сидь ё сангед лумикатуз, а йӓльгхепяй суред ӱбусэд.

Мейден тахойш луми венуб луяс хяткен. Миял паксус олэскелэба туход-ки, силой ухойчеб тед, кудамбид пидаб сельгитада лумеспяй. Мише эй ухойчижи тейд, пидуст хейд иштутадас пуйден ривид. Парахим пу нецен тяхт ом норь Кузь; ичезэ паксуйл барабайжил кузед каичеба тейд. Муга-жо каитас раўдтейд.

Лумипёву луяс хювин каичеб вилуспяй норид лейбид и тойжид казвмусид. Конз ирдал ом 25-30 градусад вилуд, лумен ал ом вайше каксь градусад вилуд. Мугой лямуз ом сигя кевядэхесай, лямихе пяйвихесай!

Кевядэл луми сулаб, и технус вези непстаб кайкен ман. Силой казвмусиле ом луяс хювя казда, и йӓльгхепяй линнеб хювя лейбян, маплодуйден и тойжиден тарбхайжиден казвмусиден сатуз.

Тальвайгал ӓяд живатад и линдуд пейтасэ лумехе и эскай эляба сиш. Озутэсикш, лумиайгал тедред кайкуччел ӧл ӧдуба лумиӱбусиш. Мугажо тегеба пюд, мецканад и мецойд. Пенед пёўдхиред тегеба лумехе питькид уруйжид. Сигя хё лёўдаба ичелэзэ хювяд сёмяд: казвмусиден лехтэсид и идуйд, гаведид, кудамбад тальвдуба самлос; войб лёўта маръёйд-ки: болад да гарблод. Кондъян и мягриден пезад ом каттуд лумикатусэл, нийш ом хювя магата!

Микш тальв ом мугой чома возьайг? Верез луми ом луяс пухтаз. Эй олэ ни-мидя ваўктэмбад мугошт лунт. Мё войм сануда ёўцнес, ӓникос вай собас, мише сэ ом лумен ваўктутте.

Миттушт муюд ом йӓ? Ни-миттушт. Йӓ ом сельгед, сикш мише сэ пястаб ляби ичтазэ кайк пяйвяйжен сильмяд. Кайкутте лумут мугажо пястаб ляби ичтазэ кайк пяйвяйжен сильмяд. Но конз ӓян лумузид венуб тойне тойжен пял, кескети (кут, озутэсикш, лумиӱбусэс), хё эй войгой пястта ляби пяйвяйжен сильмид! Сикш луми эй олэ сельгед. Кайк пяйвяйжен сильмяд кувазуба лумеспяй и путуба мейден сильмихе – сикш луми луяс хоштаб.

Лижаматериал

МИТТЕ СЯ ЛИННЕБ ХОМЕН?

Кут войб тедиштада: митте ся линнеб хомен? Ом сельгед, мише войб авайта радион вай телевизоран, и диктор сануб мейле, тулэб-ик хомен вихм вай луми, ӓяк линнеб градусид, миттушт вягед линнеб хомезлине туллей. Мугойден эндустусэн тегеба тедаймехед, а тё войт тедиштада хяндаст лехтэсишпяй, радио- вай телеозутэсишпяй.

Но эндэ эй олэнд мугойжид эндустусид, и риституд сайба тедойд тойжен пяйвян сян полхе лондусэн знамойден мёдхе. Нацейн, синя-ки кулид, кут ванхембад сануйба: «Хомен линнеб чома пяйв: хямяхоўк кудоб сурт веркод, сяськед вяндаба ильмас, дя пяйвой ласкесэ сельктан тайвазрёўнан тага». Муга войб эндустада хомезлишт сяд, и эрасти мугойжес эндустусэс ом вяхембан вигойд, ми сиш, кудамб пайндас лехтэсэс. Лондуз андаб мейле ичевуйччид знамойд, кудамбиден мёдхе мё войм эльгета, митте ся тулэб мейден тахозэ. Ненэ знамад ома тутабад кайкиле. Ёхтутагам хейд!

Ку хомендэззорьайне ом чома, пяйвяйне либуб сельктан тайвазрёўнан тагапяй, а эдэлижел эхтал ласкихе мугажо сельктан тайвазрёўнан тага, ка линнеб чома ся. Мяннудэл ӧл кудмайне и тяхтхад олиба ани чомад, хоштокахад. Линдуйжед паятаба, пяскхайжед лендаба корктас, кайкъял ом ӓй гаведид: бумбакойд, мезйӓйжид, кярбхайжид… Сяськед керадасэ когохо и чомашти «каргайдаба» ильмас. Калад вяндаба йӓрвес и хюппиба ведэспяй, пюдаба гаведид.

Но ку пяйвяйне ласкесэ пильвехе, а хомендэсэл либуб пильвишпяй, ку ӧл кудмайне оли рузавер, неце знамойчеб, мише тулэб паха ся. Сидь ома тойжен лондусэн знамад, кудамбиден мёдхе войб эндустада пахан сян тулэндад: хомендэсэл ильмас войб риппуда юмаланбембель, кути йӓльгес вихмад; кала кокиб хондойн, кайкъял ом вяхя гаведид. Мезйӓйжед иштуба ичезэ пезойш и озутасэ харвойн, эскай тархад мурахайжед иштуба кодиш. Пяскхайжед лендаба ани алахали. Паскачуд и тойжед пеникайжед линдуйжед кюльбесэ леткес. Лёцуд да ракад ляхтэба везиуйтойшпяй.

А войб-ик эндустада, озутэсикш, митте линнеб тулэб тальв вай кеза. Нацейн, войб. Ку пихлиш ом ӓй пихлячуйд, а сенид, васткарин, ом вяхя, ка линнеб луяс вилу тальв. А ку мецас ом вяхя пяхкмид, но казваб ӓй сенид, ка тальв линнеб лямь.

Кайкил рахвхил ом тедойд сэн полхе, кут эндустада сяд. Ом мугойжид тедойд вепсляйжил-ки. Лугекат, кут пагиштас мейден рахвхан кескес:

«Пяйвинька ласкихе пильвихе, ка хомен линнеб вихм».

«Варишад иштуба айдал – неце вилукс».

«Ёўцнед летас – теравас линнеб луми».

«Тайваз рипустихе – луми линнеб».

«Тяхтхаказ тайваз – пакайне линнеб».

«Киви мярг ом – паха ся линнеб».

«Савун маха вёб – линнеб хуба пяйв».

«Хямяхоўкун верк ом хювякс сякс».

«Кажи кабрише – вихмакс».

«Кохтун кибиштаб куройл – хубакс сякс».

«Тайваз каёз – вилу линнеб».

«Скочкхейне чикитаб – ругиж ом эхтню».

Кайк ненэ рахвхан эндустусэд ома луяс мелентартуйжед мейден тедаймехиле, и ку синя кулиштад хейд ванхембилпяй, ка олэ хювя, киръюта да озута ичейж опендаиле. Войб олда, синя лёўдад мугойжид рахвханмелен плодуйд, кудамбид вёл ни-кен эй лёўданд.