ЭЗИСАНАД 

Хювяд лапсэд! 

Нецил водэл тё сашкандэт тедойд лондусэн полхе – митте мейдэн кодиман лондуз ом, кут тойжетасэ ся, кут эляба живатад и линдуд, калад и гаведид, кут казваба эразвуйччед казвмусэд. И мейл ом тойв, мише тё тедиштат ӓян хювяд да тарбхашт ненил урокойл. Неце кирй абутаб тейле сиш. Таркашти лугекат урокойдэн текстад, васткат кюзундойхе, кудамбад ом пандуд урокан лопху. Лёўткат текстаспяй сэ, мидя вёл эт теднугой. Мелетагат, мише неце тегесэ муга. Ку эт эльгендагой иче мидя-ни, кюзугат опендаял.

Ми лондуз ом? Кацкат ӱмбри мейш! Мё нягиштам ман, тайвхан, пяйвяйжен, пуйд да хейнид, эразвуйччид живатойд. Кайк неце ом лондуз. 

Лондуз ом сэ, мидя мезь эй вой техта ичезэ кязил. 

Озутэсикш, ристит саўваб пертин кивишпяй. Войб сануда, мише киви ом лондусэн пала, а перть эй олэ лондусэн пала.

Микш тарбиж ӓян тета лондусэн полхе? Сикш ку ненэ тедод луяс абутаба мейле элос. Эндэ риституд эй теднугой, кут техта металлойд, сикш хё тегиба кирвхид, нолагъёйд, вейчид кивишпяй, озутэсикш, луяс вахвойш олакивишпяй. Киви ом хювя, кова материал, но сэ ом луяс рябед. Кививейч ани теравас тюлцтуб.

Мёхемба риституд тедиштиба, кут сада металлойд, кут техта хейшпяй вейчид вай кирвхид. А нюгюдь риституд тегеба нениш металлойшпяй машинойд, чомитэсид и ӓян тошт тарбхашт.

Конз риституд тедиштиба, мише войб кодикойтта живатойд, хё сашканзиба энамбан лихад, майдод, виллад и тошт.

Эндэ пуд и хейняд казвойба мецойш, паллиштойл, в риституд вайше керазиба хейдэн маръёйд да юрид сёмян тяхт. Но мёхемба мезь опензихе казватамха хейнид и эразвуйччид пуйд, техта хейшпяй магукаст сёмяд.

Вайше конз риституд олиба хювин тедиштанудэд лондуст, хё тегиба радион, телефонан, тедомашинан, тойжид сурид тарбхайжид машинойд.

Лондуз войб олда эляман и элотоман. 

Эляб лондуз – неце ом кайкутте пу, хейн, живат, иче мезь. А тайваз, ма, киви, вези, луми, вихм – кайк неце ом элотой лондуз. 

Мейдэн лондуз ом луяс чома, вайше пидаб махтта нягиштада сида чомуст, и неце кирй абуташкандэб тейле мугойжес азъяс.

Кайк лондусэс тойжетасэ, ваехтасэ, сикш ку ом луяс тарбхашт киръютада кайк, мидя тё нягет лондусэс и тахтойт панда муштхо. Мидя войб киръютада лондусэн полхе? Войб киръютада, митте ом тямбей ся, митте ом ильман лямуз, куспяй пухуб тулей, вихмуб-ик вай садаб лунт, ома-к пильвед тайвхал.

Мугоман тён тяхт откат эрине лехтик и киръютагат синня мугоман озутэсэн мёдхе: 

ЛОНДУСЭН ПЯЙВКИРЙ

Тямбей ом (хейнкун 23, 2000 возь)

Пяйвяйне ноўзи (5) час. (47) мин.

Пяйвяйне ласкихе (21) час. (03) мин.

(Тё войт тедиштада нецен полхе хомендэсэл радиоспяй).

- Тямбей пухуй кова туллей похъёйжполеспяй.

(А войб олда, туллейд эй олэнд).

- Тайваз ом сельгед.

- Кайк тайваз ом пильвиш;

- Тайвхал ом ӓй пильвид;

- Тайвхал ом вяхя пильвид.

(Вихмуб, садаб лунт, рагишт).

(Тямбей хомендэсэл, эхтал оли сумег)

- Ильман лямузь ом 24 градусад лямяд.

(Вай ирдал ома суред лумиӱбусэд).

Войб олда муга: туллей пухуб вайше хомендэсэл, а эхтал эй олэ туллейд, вай вихмуб вайше эхтал (ӧл), а хомендэсэл эй олэ вихмад. Силой киръютагат нецен-ки полхе.