Сэ он. Марйõз õлтии. И кару тули, вõтти ӱхээ найзээ. И вэй оммаа майяа. Я сиис тӓмӓ õли сиӓлл тӓмӓкаа кахс воотта. И тӓлл сииз õли пойка каруукаа. Я сиис талвõлл еэгэрид саатии каруу йӓллэд. Я сиис саатии сэ кару, аммуттии. Сиис тӓмӓ нõйс мӧрнӓмӓӓ, вõттагаа тӓмӓ, найн. Сэ бõллу каўкан, куза кару аммуттии. Сииз вõтõттии нэ, тоотии коттоо, найн и пойка. А мэхэлл õли ё тõйн найн. Сииз мээз юттõõб: «Миӓ рихэз эллӓӓ эн анна. А рихээ пӓӓллӓ элӓ!». Сиис пойка кõвасси казви чиирээ. Ӱлӓпоол õли инимин, а алапоол õли кару. А сиис казви, я пиӓб шкоўлуу панна. А шкоўлуз тӓлл õли нии палло воймаа, четӓ кэртти, сэнээ таас тэчи вайвазõсси. А сиис шкоўлуу эб вõтõтаа энӓпӓӓ. Сииз митӓ муута, ку пити мэннӓ. Юттõõб эмӓлээ: «Тээ миллõõ палло корппуа. А сииз миӓ мэнэн куххõõ силмӓд нӓӱ̆ттӓвӓд». А сиис тӓмӓ лӓхси. И нии мэни. Энӓпӓӓ пойз эб туллу. А исӓ-кару нии кõвасси вахти найсса. Эб ласкõнну, эб куххõйд ласкõнну найсса. А сӱӱввӓ той пуу коории талвõлл. Пуукоории и маръяд.