Мээз мэни каллаакаа. Ваатаб, рэпо он
хуккаўнну тээ сэрвӓз. Но дуумааб, нӱд сайн найзõлõ ӱввӓӓ каглуссõõ. А рэпо хитрõй,
вõтти тэчи саании аўкоо. Калад кõйкк тõўкки аўкосса тээлээ. И иззэ мэни аўкосс
вӓллӓӓ.
Мээз мэни коттоо. Найзõлõ юттõõб: «Миӓ
тõйн силлõõ ӱввӓӓ каглуссõõ».
Мэнтии вааттамаа. Бõõ рэппуа! Бõлõ
каллой! А рэпо он тээ сэрвӓз. Суси тули. Чӱзӱб: «Кусс сиӓ сайд каллой?»
А тӓм, рэпо, юттõõб: «Миӓ пӱввин ярвõсс».
«А куй сиӓ пӱввид?» – сэ суси юттõль.
Рэпо юттõль: «Лӓӓммӓ ярвõõ! Миӓ нӓӱ̆тӓн».
И лэввэттии аватоо. Суõлõõ чӓхс рэпо
писсӓӓ ӓннӓӓ ярвõõ. А рэпо айн чӓӱ̆б ӱмпӓр сутта и юттõõб: «Jӓӓтӱ, jӓӓтӱ, суõõ ӓнтӓ!»
Вот, ӓнтӓ и jӓӓттӱ jӓххээсээ чиин. Рэпо
рӓӓгасти: «Ай мэддед ампуасс!»
Рэпо ӱппии. Мэни ёхсõмаа. Суси ко ӱппии,
ӓннӓӓ катказ.
| 
