Вана айкаа эли ӱхс кару. Ванна я суури. Отисси тӓтӓ куцутаа-куцуасса. Ӱхскõрт тахтози-тахтõ Оти сӱввä. Мэни маръясõõ. А куõз-касõнн маръяз õли хäмӧӧ вõркко. Хäмӧлайн пэлчäзи, этти Оти хäмӧӧ вõрккоа нõйзõб каткомаа, я паятти:

— Õõ ӱвӓ, элӓ кадго минуу като! Аннан силлõõ вõркоо нõддётуу. Мээ ранналõõ я õнчи калаа мõнт он тарвиз.

Тули Оти мэрээ ранналõõ õнчимаа. Пани вõрккоо вэтээсээ я нõйси ооттõõмаа. Пӱӱси паллё калой. Сэй. Тахтози вээлä. Пӱӱси я сэй вээлä. Парайка думааб:

— Миä эн тахо сӱввä – эб õõ пайккаа! Но оомõнна эн лээ cӧӧннӱ, миä сэйсэйзин калаа мӧӧхэпи. Пӱввäн вээлä калой.

Я пани Оти вõркоо вэтээсээ тааз. Сиз мэрэссä нõйси суури кала, нику мäчи. Оти паятти:

— Ситä тапааб каўгõпасси!

И нõйси тõмпаамаа калаа ранналõõ. Но кала ӱппäзи ӱлээз, вõркоо каткози-каткõ я лэй тäмää äннääкаа-сиивээкаа. Оти лэнти вäллää я пääси тайваасõõ. Эб õõ калой, эб õõ вõрккоа нõддётуа. Казõсса пäйвäссä тайвааз ончи, сиэллä исуб Оти – вана кару. А инэмизэд куцутаа тäтä Отавасси.