ТЮТРИНДАМ 

Эндэ элэтихе маманке какс тютярт, ӱкс тютяр оли родни, а тойне оли неродни тютяр, мамм хянэлэ оли эминдам. Нецида хян ичезэ тютрен наведи, нецида тютярт тощ эй наведну воўсё. Неце акк ичезэ родниялэ тютрелэ сануб: «Вёгам хяндаст рандппертийжехе элямаха». Нециле тютрелэ сануб: «Хомен сина мя эрижи элямаха». Хян андэй хянэлэ самалт куйдукс кезерта, тухкад ледэс андэй дёўхокс, чуўруд андэй шонакс, пиладёўход андэй суўрмакс. Хяндаст вёдхе синна пертийжехе элямаха ӱхттазэ. Неце лади кожлижен, самлудэн сидэй, вяртняйжен кядэхе и кезердашканз.

Куўлишть, ка колотиже. Мяни авойдамха. Вераян авойж, ка коўме хёрмуд разбойникад.

– Нейдихе, нейдихе, лямбита килбетийне.

Килбетийжен лямбить. Ненэд укод, коўме разбойникад, килбетихе мяндхе. Неце нейдихе пиргайжед аяшканз, кясттихе ка. Хийрутт и хиппясть.

– Нейдихе, нейдихе, тоўкнашть тахтхашть, пахал айгал лийнен хивя.

Неце нейдине тоўкунт тукун, тахтхашть шклякун. Хийрутт хивиш мелиш ляксь кодаха.

Ненэ тулдхе хёрмуд килбетишпей, ка сётть хейд, дётть.

– Нейдине, нейдине, тулижид ку магатта ка.

Кукей чайгахть, мужикад кадотине, неце нейчукайне ихасты. Дяй хянэлэ денгийд коўме сумкад.

Тойжел эхтал мёст колотиже. Ненэд же хёрмуд мёст кясттазэ:

– Нейдине, нейдине, лямбита килбетийне.

Килбетийхе мяндхе, а неце нейдине пиргайжед аяб. Хийрутт и хиппясть:

– Нейдине, нейдине, тоўкнашть тахтхашть, пахал айгал лийнен силэй хивя.

Неце нейдине тоўкунт тукун, тахтхашть андэй шклякун. Хийрутт хивиш мелиш пячин аллэ кодаха.

Ненэ укод тулдхе мёст килбетишпей, сётть, дётть ненид укийд.

– Нейдине, нейдине, тулижид ку магатта.

– Вайтти, наку валикийжен пезен.

Нецида нейчукашт хийрутт вастан аллэ мурдийжекс и муўталзь. Кукей чайгахть и ненэ мужикад мёст кадотихе.

Мамм и сизар сануб:

– Ляхкам отмаха, риктуд ома дё дай колну ом сига, ляхкам, хотя тогам луд не.

Мяндхе, ка хян сига кяндлэзэ ку пападь хивя. Тойне сизар сэ сануб:

– Кус, чикушко, олид, да кус отид нецевердан денгийд, опенда миндэй!

– Мя, – мамалэ сануб, – вё синна элямаха ичейж здрочонияд тютярт.

Кодихе тулдхе денгийдеке, канттихе эдва коўмен. Тойне сизар сануб:

– Мина ляхтэн синна. Опенда миндэй, чикушко.

Нецен тютрен сядатаб, тойжен, ичезэ селгитаб. Ичезэ тютрелэ андэй тёд ка куйдуд кезерта, дёўход андэй ругихишть, пиргийкш нижишть дёўход, шонад дё хивяд андэй, суўринт андэй, тоўкунт андэй, кайкед андэй ичезэ тютрелэ. Хёболэ иштуть дай вэй синна. Сизар сэ опендаб: «Кацу, тулоба разбойникад, ка килбеть лямбитада кясттазэ, лямбита, пиргайжед ая, хийрутт тулоб, пакичоб тоўкнашть тахтхашть, ка сина хянэлэ пайна валикол».

Неце нейчукайне дё хивиш мелиш иштуб, кезердаб, тулну денгийд самха. Куўлишть, ка колотиже, дё тулоба. Мяни, авойж, ка мёст разбойникад.

– Нейдине, нейдине, лямбитаскеп килбетийне, аяскеп пиргайжид.

Килбетин лямбить, ненэ килбетихе ляхттихе. Неце нейжне пиргайжид аяшканз. Хийрутт и хиппясть:

– Нейдине, нейдине, тоўкнашть тахтхашть, пахал айгал лийнен хивя.

Хийрудэлэ ку ласьк валикол пяха. Хийрутт войвотэсэнке ляксь кодаха, эй вёл колну. Ненэ укод килбетишпей тулдхе, чай дёдхе, кайк пиргад сёдхе.

– Нейдине, нейдине, тулижид ку магатта.

Хян магатта мяни, пекстихе, пекстихе, ка эдва хенг дяттихе. Ненэ укод ляхттихе. Нециле нимида дяну эй. Неце нейчукайне дё пелгастуну: «Тулоба, ка риктазэ нугуни миндэй». Мёст тулдхе, колотиже.

– Нейдине, нейдине, лямбита килбетийне, ая пиргайжед.

Ляхттихе килбетихе, мёст пиргайжед аяшканз. Хийрутт хиппясть мёст, эй, роўк, панну пахакс, мёст тулоб.

– Нейдине, нейдине, тоўкнашть тахтхашть, пахал айгал хивя лийнен.

Хян ласьк хийрудэлэ, хийрутт войвотэсэнке кодаха и ляксишканз.

– Сина миндэй рикейд да эд и сина пязу.

Иче коль, роўк. Ненэ килбетишпей тулоба, сёдазэ, дёдазэ.

– Нейдине, нейдине, тулэ магатта.

Нейдине неце магатта мяни. Нецида пекстихе, пекстихе, дёўгаб чаптихе, нижад чаптихе. Неце мамм да тютяр отмаха аетазэ, парал хёбол тулоба отмаха. Ненэ дё пандуд нижад икналэ, дёўгад гардалиялэ дё риппутэт.

– Кацу, накка минун тийтрудэл булкайжед вилугатазэ икнал.

Тулдхе, ка тютяр дё риктуд. Сихе лангень мамм неце. Луўхудэд кайк когозь мамм, кордхя пани, кодихе отть. Кодихе тулдхе да нецен тютренке эляскатхе кахтэн. Тегихе тютяр хянэлэ армаз. Нугуни сига элэтазэ. Энамба ни мида.