ЧОМА МУРЗЕЙН 

Эндэй элэтихе купец и купчих. Оли хийл ӱксь пойг. Пойг и сануб: «Папа, мили пидаб найда». – «Ну, кеда мё отам? Алгы откы бохатад, откам бедни да чома». И пойг и най, чоман мурзеймен и отть. Эляб пойг хивин, тойне тошть наведтазэ. Неце батть и сануб пойгалэ: «Войд-ик аяда Рыбинскиялэ тавараха?»

Анды коўме асттяд и пойг ляксь тавараха. Пойг ляксь и анды мурзеймелэ куўдэйжен колцейжен, суўкижен вохудэн. Неце пойг аи Рыбинскияха и таварад грузи асттяд тёўдод и ляксь кодихе. Ӓништь мёто аетихе и дёл табазь. Хё, нягед, тойжидеке купейдеке вятазэ картэйхе. Ӱхтэн купцанке споришкатхе. Сануб: «Мина тусттун акад мёто». Тойне купц сануб: «Ала тустту, может хян, акейж, тусттуб миндэй мёто…»

Неце тойне купц мяноб нойдан аканну и сануб: «Мянэ мурзейменну и варгаста хянэл вёхутт». Хян, нойдакк, мяни теравейдэшти мурзейменну, а мурзейн килбетин лямбитану оли, а нойдакк нецен акейжен килбетихе отть и нецен вён и варгасть. Вёб синна и андаб купцалэ, а купец сануб мужикалэ: «Кацу, акейж селгить вён, кудамбен дятид». Неце купц и уск, мисэ вё ом хянэн. Хян вийнан дёшканзь. Аи кодихе ка мурзейменке ийни здоровод анну. Эхткижел мужик сануб: «Ляхкам гулеймаха, мина кайкен сили старинийчен». Хяндаст манитаб силдадэ и дёгехе люкейдаб мурзеймен. Мурзеймен ветт мёто кандый и той рыбакыде пертиженну. Рыбакод нягиштэтхе и ведэспей ведэтихе элябан. Мурзейн оли луяс чома. Мурзеймен оттихе эмагакс пертижехе. Хян абутаб рыбакиле, калад кийтаб.

А неце мужик суўдитихе кюмнекс водэкс. Неце мурзейн мяноб цариле кухаркакс. Неце царь ом раваз, хян луяс наведиб мурзеймен, мисэ чома ом. А царь сэ кяўб тюрмха кацелмаха тюрёмщикид и хян, мурзейн, и сануб цариле: «Папа, ота миндэй кацмаха тюрёмщикид, миччед ома». Хянэнке ку мяноб, папазэке, тюрмха кацмаха, ка мужик сэ сига истуб. Мурзейн и кюзуб: «Кут сили ом ними?» Хян и сануб: «Сина вед олэд минун мужик». Мужик и лангень комбулэзэ, войкашканзь и сануб: «Эд-ик сина олэ минун акк?» – «Папа, – сануб, – неце ом минун мужик. Хян ий теда, мисэ миндэй ом ведэспей ведэтуд». Неце царь тойжел пяйвал мяни дэй пясть тюрмаспей и отть хяндаст пойгакс, а мурзеймен тютрекс и нугуне элэтазэ.