| Вепсян вайхен лямой эй самбу!
Муга ом технус, мише Узь Возь-празник ом ӓил рахвахил эрижел сиял. Мё, вепсляйжед, мугажо наведим сидя, тахтойм, мише сэ тойжи мейле ут вахвад тервхут, ут хювяд элод перехиш-канзойш, озад да армастуст. Сидя Вепсян культурсебр тейле тойвоб-ки. Но усккат ичетой-ки вягихе. Техкат ичетой элод озакахакс да ойктакс иче-ки. Олгат хювин вёл-ки энамба ичетой татойле да мамойле, тютриле да пойгиле, вунукойле, ичетой суседойле да себраникойле. И эло тоб тейле энамба ихастуст, ми мяннудэл водэл. Мянну, 2012, возь эй олэнд кебн, оли техтуд ӓй радойд. Но ихастойтаб сэ, мише ӓяд мейшпяй кайкен айган пидиба пяс да хенгес ичемой рахвахан холид, кудамбиш пагижим ӓй Пагинклубан айган, миччен радод ведяб Лариса Смолина. Неце возь оли вепсян культурвозь, миччен мё тегим ё коўмандэн кердан ӱхтэс Юминкего-фонданке, кудамб ом Суомес, Кухмо-лиднас. Суред спасибод нециш радос Маркку да Сирпа Ниемижиле! Нецил водэл мё тегим ӱхтэм аелусид вепсляйжихе кюлихе, мейдэн паяникад аелихе эразвуйччиле кезапразникойле кут вепсляйжидэн маха, муга и Суомехе, мё пагижим кезал Виндлан конференциял мейдэн рахвахан проблемойш, тегим вепсляйжидэн киръютаидэн конференциян Вологдас... Ӱхтхижил вягил мё киръютим да пястим ӓй узид киръёйд, миччид войм нюгюдь лугеда. Неце ом мугойне азj, митте войб коскта кядэл, отта кядэхе, пидяда, ихастуда сихе. Киръёйдэн кескес тахтойжин ёхтутада эзмяй кайкед "Verez tullei"-альманахан, миччен мё тегим ё тойжен кердан, и кус пиди техта ӓй jӱгедад радод Марина Гиниятуллиналэ, Ирина Сотниковалэ. Неце ом сурь тё, митте озутаб мейле кайкиле: кель ом эляб, сил войб техта ани сурид альманахойд, сил войб киръютада чомид старинойд, рунойд, санутэсид, миччид киръютаба Николай Абрамов, Валентина Лебедева, Алексей Щеников, Гуля Поливанова, Валентина Рогозина, Ольга Жукова, Евгений Марков. Нецил водэл ом пайндуд "Virantanaz"-эпос, миччен миня тахтойжин лахъёйта тейле кайкиле, минун кальхед хеймолайжед! Тахтойжин, мише сэ-ки тойжи тейле, хювяд рахваст, ихастуст ёўдаил пордойл. Но тахтойжин ёностада — нецидя кайкед и ӓяд тошт эй олнуйжи техтуд, кут тё, хювяд рахваст, эт отнуйжигой ичетой тулендойл вепсляйжиле празникойле, концертойле, эразвуйччиле керагиле, мише тё тугедад Вепсян культурсебран радод, и мише мё кайк пухум ӱхтхе хильхе, сикш вепсян келен, вепсян вайхен лямой эй самбу! Парахиманке возьпразниканке тейд, кальхед риституйд, Удэнке Водэнке!
Вепсян культурсебраспяй — Нина ЗАЙЦЕВА
| 
