| Удэд киръяд рахвахалижил келил
Тальвкун 27. пяйвял Петроскойн озутэлуззалас оли 2012. водэн пайндусидэн презентаций. Сэн теги Рахвахалижен политикан да ускондсебройдэн министерств. Оли эзитадуд удэд вепсян-, каръялан-, суомен- да венянкелижижед киръяд, кулехтэсэд, календарид да дискад, миччед ом ваўмитуд Каръялан рахвахалижен политикан да ускондсебройдэн министерстван абул.
Презентациян айган адивойдэн эдэс пидиба пагинойд Каръялан рахвахалижен политикан да ускондсебройдэн министерстван варапямезь Елизавета Харитонова, Периодика-пайништон радникад да киръёйдэн авторад. Киръёйдэн авторад старинойчиба, мин полхе ома хейдэн удэд киръяд да кут мяни рад нийдэн техтэс. Презентациял оли эзитадуд нелль вепсянкелишт пайнуст: Нина Зайцеван, Елизавета Харитонован да Ольга Жукован "Vepsän kelen orfografine vajehnik", Нина Зайцеван "Virantanaz"-эпос, Евгений да Надежда Марковойдэн "Vepsän man mujud"-кирj и "Verez tullei"-тойне вепсянкелине альманах. Каръялан келел литературан полхе старинойчиба Ольга Жаринова, Александр Волков да Пётр Семёнов. Ольга Жаринова теги "Pagizemmo karjalakse"-опендузабукиръян, миччелэ лижакс ом вёл аудиодиск. Александр Волков старинойчи "Kieli meijän"-киръяс, а Пётр Семёнов — кятуд каръялакс Лев Толстован "Lapsile. Sanutesed, runosarnad, sarnad, tozistarinad"-киръяс. Мугажо ом ваўмитуд чома куваказ 2013. водэн этнокультурине календарь венян келел — "Карьяла — наш дом", митте ом омиштадуд Каръялан игяхижидэн рахвахидэн сёмалэ. Презентациян лопус тетаб каръялайне рунойлий Елена Сойни луги ичезэ чомид рунойд да старинойчи удэс "Ночная северная птица"-рунокогомусэс. Кут санутихе презентациян айган, 2012. возь оли сатусэказ, ом тулну ӓй чомин хювянладуйжид киръёйд. Ом хювя сэ-ки, мише киръяд рахвахалижил келил пайндас и нийд эй олэ вяхемба водэспяй водхе.
Марина ГИНИЯТУЛЛИНА
| 
