| Рахвахалэ празник тули мельхе
Тули кезаку и тарбиж мёст аяда Видлаха вепсляйжидэн празникалэ. Тял водэл "Элонпу" оли нимитадуд "Игяхижидэн вяхялугуйжидэн рахвахидэн "Мийде айд"-празникакс. Хоменцеспяй кесккюлян авойнирдал керазихе рахваст, тули машинойд и автобусойд эразвуйччиш агъёйшпяй, лиднойшпяй и кюлишпяй. Ка оли тойжиш-ки валдкундойшпяй адивойд — эстилайжид нягин ирдал. Подпорожье-раёнан администрациян пямезь Пётр Левин и Питерин областин парламентан председатель Сергей Бебенин авайжиба празникан хювил санойл. Вёл празникан ӱхтникойд тервехтойтиба Питерин областин культуран комитетан пямезь Наталья Кононенко, а Каръяласпяй — рахвахалижен политикан министерстван специалист Евгения Шустова. Празникалэ тял кердал тули узид адивойд: неце "Манитаяд мируд. Этнине Веняма"-фестивалин валдкундан полярижен академиян (Питер — Чукотк) ӱляопеникойдэн ансамбль да "Шарпны"-этногрупп Карачаево-Черкесияспяй. Ӓй аплодисментойд празникал сайба арвастадуд Веняман Болот Быйрышев, Владимир Хоменко Эвенкияспяй и вёл ӓй тойжид норембид артистойд. Рахваз нягишти эразвуйччид похъёйжид каргуйд, кулишти вяндон оригиналижил рахвахалижил музикинструментойл. Кут тойжил-ки возил, празникал оли эразвуйччид конкурсойд. Ненэ ома "Кенэн кюля ом паремб", "Ой, ся, вепсойдэн бобайне" и "Вё, кути кайчуз"-конкурсад, а мугажо половикойдэн да сувениройдэн конкурсад. Силь-жо айгал Видлан ирдойл мяниба эразвуйччед мастарь-классад. Войли опетас паштта калиткойд и тойжид вепсляйжид эмягусид, техта савесижид астъёйд, кудода вёйд и тошт. Мугажо тяс войли остта олут, эразвуйччид пиргойд, муштлахъёйд... Знамасижен празникан палан оли "Армас"-ансамблин тервехтойтуз. Ансамблиле тяўдуй 25 вот. Сценалэ олиба ляхтнудэд ансамблин ӓидэн возидэн ӱхтникад. Вёл ом знамасине дат тял водэл — Видлан киръиштолэ тяўдуб 105 вот. Киръиштон радникад озатэли Видлан администрациян варапямезь Геннадий Мошников. Празникал ичезэ махтойд озутиба эразвуйччед коллективад: "Нойд" Каръяласпяй, "Оятская вечёрка" Пёўдоспяй, ингерманландцойдэн ансамбль Всеволожск-лиднаспяй, лапсидэн "Чомашти"-групп Видласпяй и тойжед. Празникан лопус валитихе и лахъёйтихе парахимид кюлян танхойд и мастарид. А эхтал, конз адивод ё аёйба ичезэ лиднойхе и кюлихе, Видлан кесккюлян авойнирдал оли этнодискотек.
Николай АБРАМОВ
| 
