| Мушт хейш эляшкандэб игян
Мейдэн элос ом ӓй эразвуйччид празникойд — пюхид и илокахид, празникалижид и знамасижид, но ни ӱксь нийшпяй эй вой риндатадас Вягестусэн празниканке. Ӓй вот мяни Сурен Вягестусэн пяйвяспяй, но тямбей-ки празнуйтас семендкун 9. пяйвяд ӱлендусэнке. Нецил пяйвял мё луяс ӱлендамойш ичемой историял и тахтойше ускта, мише мё вягестам кайкид jӱгедусид. Ведь мейдэн мал ом сурь историй и сурид вягестусид.
Никонз эй са унохтада нецен пяйвян тяргедудэс. Мейдэн дедад и прадедад воюйба торапёўдойл мейдэн элон тяхт и сиш, мише нецил мал олижи тулий айг. Ом луяс жаль, мише ӓjид хейшпяй эй олэ ё хенгиш, но кайчихе киръейжид, ёхтутэсид, фотокувид, паўклахъёйд... Мушт урохойш и хейдэн урохонтегойш эляшкандэб игян, куни мё элям нецил мал. Нецил чомал лямял кевязьпяйвял Калагь-кюлян эляяд удэс керазихе ӱхтэс культурпертинно, мише муштелта ичезэ урохойд и кайкид коллиёйд, кудамбад лахъёйчиба хейле элон нецил мал. Митингалэ тули лапсид ванхембидэнке и ванхойд риституйд — войнан колнузидэн ӱхтникойдэн лапсид и лескиакойд. Калаген администрациян пямезь Надежда Шеленкова и культурпертин пямезь Анна Татаринцева авайжиба митинган санудэс лямид тервхенсанойд кайкиле тулиёйле и озателиба хейд сурен празниканке. Ом луяс жаль, мише кайкуччен водэнке тулеб митингалэ кайк вяхемба и вяхемба мейдэн кюлян риституйд. Мейл эй олэ ё нийд салдатойд, кед воюйба Сурен Кодимайжен войнан фронтойл, кайк эдэмба ляхтэба ненэд опакад 40. водэд, но мушт эляб, мё муштам, мё ӱлендамойш. Празникалэ тулиба адивод Петроскойшпяй-ки — ветеранойдэн невондиштон эзитай, энзне милициян подполковник Сергей Николаевич Котов и Прионежъен раёнан администрациян эзитай Наталья Константиновна Белоусова. Митингал лапсед лугиба рунойд да паятиба паёйд войнан полхе. Нед коскиба кайкуччен риститун хенгед. Jӓльгес оли ӓнетомудэн минут коллиёйдэн муштокс да венкойдэн и ӓникойдэн паненд каўмойле. Олгха нед харвад Сурен Кодимайжен войнан ӱхтникад, кудамбад ома хенгиш мейдэн айгойхесай, нягеба и тедаба, мише хейдэн урохонтегод, хейдэн себраникойдэн сурм эй олнугой хёдхювижед, мише мушт хейш эляб и тулий сугупольв тедашкандэб хейш. А вягестусэн пяйв кайкен линнеб сурен пяйвян, ӱксъяйжен празникан, миттушт вастатас илоказ сярайдуз сюдяймес и ӱхтэн айган — кюндлед сильмиш. Ирина СОТНИКОВА
| 
