Калагь-кюля васттаб адивойд
Семендкун 11. пяйвял ванхалэ вепсян малэ Калагь-кюляха тулиба адивод суседмаспяй - Суомеспяй. Нецил пяйвял Калаген кескшколас мяни мелентартуйне вастуз.
Вастусэлэ тули 54 мест Нурмийäрви-лиднаспяй. Нецен проектан тегий ом Пекка Киехеля. Мё олэм хянэнке себраникад ё 10 вот. Пеккалэ ом мелентартушт Каръялан валдкундан игяхижидэн рахвахидэн культур да кель. Хян паксус олэскелэб Каръялас да тулескелэб Калагь-кюляха. Тяс Каръялас хянэл ом äй себраникойд вепсляйжидэн да каръялайжидэн кескес. Суомалайжед тулиба Каръялан Валдкундаха, мише энамба тедиштада сен полхе да тундиштадас сен эляидэнке. Семендкун 12. пяйвял Суомес оли сурь празник - Маман пяйв. Нецикш пяйвякс мейдэн школан опеникад да опендаяд, а мугажо пенед лапсед пяйвкодишпяй ваўмичиба пюхян концертан армхидэн адивойдэн тяхт. Концертан авайжи музикан да аўготижшколан опендай Татьяна Механикова "Чома эхт"-паёл вепсян келел. Пидаб сануда, мише Татьяна Михайловна ом венялайне, но хян ё äй вот опендаб лапсид паятада вепсян келел и иче-ки луяс чомин да хювин паятаб. Школан пямезь Светлана Готич тервехтойти кайкид адивойд, озатэли хейд Маман пяйвян празниканке и старинойчи мейдэн школан полхе да äйвоччен ӱхтхижтёс вепсян Калагь-кюлян да суомен Калаёки-лиднан кескес. Хянэн старинан школан историяс да радос йäткси литературан опендай Юлия Апроду. Вастусэн айган пенед лапсед Калаген пяйвкодишпяй ихастойтиба адивойд лапсидэн паёл да рунойл маман полхе. Коўмандэн классан опеник Марина Малышева луги чоман "Мамалэ"-рунон, миччен автор ом Алевтина Андреева. Опеникад паятиба "Пень кодима"-паён, миччен киръюти англиян да вепсян келен опендай Ольга Миронова, да каргайжиба хороводас. Вепсляйжид паёйд, рунойд, эляб вепсян пагин... кайк неце ом мелентартушт суомен рахвахалэ. Мейдэн адивод войба кулда элябад вепсян пагинад ани тяс, концертал. Кюлян эляяд Валентина Семёновна Миронова и Евгений Матвеевич Кильцов лодайжиба кахтэн кескес ичезэ чомал похъёйжвепсляйжел пагинал кевязьхолидэн полхе: кут ома азъяд, мидя ом ё техтуд, мидя вёл пидаб техта кевядэл. Ведь радод кюляс ом луяс äй! Вастусэн лопус опендаяд Калаген кескшколаспяй ӱхтэс суомалайжидэнке адивойдэнке паятиба Паймнен паён вепсян да суомен келел. Йäльгес концертад адивойдэн тяхт оли техтуд йäрмарк. Мёдихе пехмдойд бобайжид да эразвуйччид техмусид, миччид ома технудэд иче лапсед. Кайк адивод йäйба хювиш мелиш. Вастуз тули тодэкс луяс чома и той кайкиле хювяд мельт. Спасиб кайкиле, кен ӱхтни концертаха и абути сен тегендас.
Мария МИРОНОВА
| 
