КАРХУ, СУЗИ Я РЭПОЙ

Карху, сузи я рэпой кӱлвэттии кэрран руйст. Руйз он кӱпсӱӱнт. Хӧӧ лэйкаттии ситӓ я вээтии риихээ. Куйватэттии тӓхтӓкуйваяал я нойстии пуймаа… А рэпой – нойсти тӓхкӓкуйваяллэ, нику ситӓ каннаттаа, дай айjяст айккаа вискаяа риўввун конз суэн, конз кархун пӓӓллэ. Хӧӧ саотаа рэвойллэ:

- Кумми-рэпой, канната тӓхкӓкуйваяа хӱвӓӓст, ёт риўввут эвӓт пуоттайз.

Рэпой вассаа:

- Миӓ ё нии ӱриттӓӓн, мут нээт эвӓт пӱзӱ!

- А иттсэ тахаллаа пуоттаа риўку кэрраллаа.

Карху я сузи пуйтии рукк иихэн. Тули колт мӱттӱӓ: пээнэммӓӓз он вилъя, кэскихизээз он руумэнэт, суурэммааз он олки.

Нойстии саттооа яккамаа.

Рэпой санноо:

- Лаа нии якамма: пээнэммӓллэ – пээн мӱттӱ, кэскихизэллэ – кэскихиин, суурэммаллэ – суур.

Хӧӧ нии тэхтии – рэпой сай вилъян, сузи сай руумэнэт, карху сай олэн.

Нойстии яўхамаа… Рэвойл яўхакиви копуттаа, а суээл я кархул ваа кахизоо.

Хӧӧ кӱзӱтӓӓ:

- Кумми-рэпой, микс сиўл яўхакиви копуттаа, энтӓ мэйл кахизоо?

Рэпой санноо:

- Миӓ ку нойзин яўхамаа, нии лисӓйзин хииттаа, сикс яўхакиви копуттаа.

Карху я сузи лизӓттии хииттаа, я хэйjен яўхакивэт нойстии копуттаммаа…

Яўхэттии кайкэн я нойстии пууроа кэйттӓмӓӓ. Кэйтэтӓӓ… Рэвойл пууро он валкиа я пухкуу, а суээл я кархуул пууро он мусса я эй пуху. Кӱзӱтӓӓ хӧӧ рэвойлт:

- Микс сиўн пууро он валкиа я пухкуу, энтӓ мэйjен ома – он мусса я эй пуху? Анна мэйллэ майстаа сиўн пууроа!

- Эн, энзикс миӓ тэйjен пууроа майссан.

Отти рэпой вӓхӓ пууроа суэлт я кархулт дай пани саламиттээ оман каттилан пӓӓллэ:

- Майстакаа!

Карху майсти я саой:

- Сиўн пууро эй оо парэмпаан миўн оммаа!

Сузи майсти я сэнэнсаман саой:

- А микс сиўн пууро он валкиамп мэйjен оммаа?

- Миӓ пиин яўхоа ёоксовааз вээ’эз. Сикс пууро он валкиамп.

Сузи я карху кооттии руумэнэт я олэн, лазэттии ёккээ – вэрта вэй кайкэн пойз…

Нии кумми-рэпой хэйjет пэткутти.