МУРАХАЙНЕ И ПАЙМЕН 

Паймен полти мецас муражмятон, сикш ку мурахайне хяндаст кибедас оли пурну. Мурахайне тули пахазэ мельхе. Сил муйте-ки оли вяхян вягед, эй войнд паймент пекста. Курктуну мурахайне лякси Юмаланнокс паймнен пялэ жалуйчемхас, мише паймнед ӓй лейбмуруйд сордаба маха. Мурахайне эй рохтинд сануда паймнен пялэ нецен муражмятон полтандас. Ведь силой пидайжи сануда, мише эзмяй иче мурахайне хубин теги паймнелэ, ку пури хяндаст кибедас. Юмал сануй:

— Войб-ик ускта, мише неце ом този, мин синя пагижед? Ома-к синай нягияд и тодиштаяд? Муйте миня эн вой хейд судида.

Мурахайне лякси нягиёйд да тодиштаид эцмаха. А мяндэс тедме иче ичезэнке пагижеб: «Минэй пидаб хямяхоўк лёўта, неце хямяхоўк тедаб паймнен радод, мише хян эляб кайкен айган ненидэн койридэнке, кудамбид хямяхоўк варайдаб». Мурахайне лёўзи хямяхоўкун и сануй силлэ:

— Тули минэй, вейкой, нягиякс, миня паймненке Юмаланно судимой.

Хямяхоўк кюзуй:

— А миш синя судитой? Миччид тейл азъёйд ом?

Мурахайне эй санунд, мин тяхт хё судишойш, вайше сануй:

— Синэй пидайжи тулда, Юмал иче синдай куцуй!

Тулиба нед Юмаланнокс, и Юмал иче хямяхоўкул кюзушканзи:

— Нягид-ик синя, мише паймнен ӓй лейбмуруйд сордаб маха?

Хямяхоўк сануй:

— Паймнен эй олэ вяр. Ведь хянэл эй олэ сияд, кус хян войжи сёда, эй олэ столад, кудамбал лейбяд войжи чапта. Конз хянэл ом ёўдаяд айгад, ка силой хян сёб-ки.

Юмал сануй хямяхоўкулэ:

— Няген, мише неце синун пагин ом този. А синя, мурахайне, кайкен олэд келастану. Мин тяхт синя ичейж ляхелижен пялэ вихан кандад?

Юмал андой мурахайжелэ паликойл сельгха и люкяйжи сидя тайвхаспяй маха, эскай мурахайне кескел каткени. А хямяхоўкул Юмал оти и ласкети норал маха сэн тяхт, ку сэ тот пагижи и ичезэ ляхелижен пялэ вихад эй канданд.

Сиш пяйвяспяй хямяхоўкул ома-ки ненэ норад-нитид, кудамбидме сэ войб ӱляхякс и алахакс кявуда. А мурахайне сиш айгаспяй, конз оли ланктену тайвхаспяй, ом кути кахтэс паласпяй техтуд: кескел ом хойк, пя да тагембайне ома санктад.