КОЎМЕН ВЕЛЛЕСЭН БОХАТТУНД 

Эндэ оли коўме веллест. Татан сурман jӓльгхе хё ягойхе: ӱхтэлэ тули гоминлабидойне, тойжеле – кажи, а коўмандэлэ – нинькерайне.

Неце ванхемб велль лабидойженке лякси рахвахазэ. Астуй, астуй и тули гоминаха. Гоминас мужик ругихен пухтастаб, jӱвяйжид кандаб чогаха, а рунгузид тойжхе. Неце приха сануй хянэлэ:

— Ка мянэ синя, мугойне пухтастай, кодихе. Куни синя сёд, ка миня нецен ругихен пухтастан.

Мужик мяни, сёй, и конз тули сёмяспяй тагазэ, ка нецил прихал кайк ругихед ё пухтастадуд ом. Мужик кюзуй хянэл:

— Ми синай неце калуйне ом, кудамб ругихен пухтастаб?

— Ом минэй лабидойне, — сануй приха, и озути хянэлэ лабидойжен.

Мужик кюзуб:

— Мин синя пакичед нециш лабидойжес?

Приха либути лабидойжен сейжмаха и сануй:

— Нецен корччен когон денгойд!

Мужик андой, и неце приха лякси бохаттуну кодихе. Тойне велль сануб:

— Кутак минэй пидайжи бохаттуда? Ляхтта минэй-ки кажинке рахвахазэ.

Неце кескмяйне велль лякси мугажо бохатуст эцмаха. Астуй, астуй, и тули миччехе-сэ сияха. Кацуб, ведэтас мужик хириле сёмякс. Хян сануй:

— Мин андат, ку миня мянэн нецен мужикан тагут?

Хё тойвотиба хянэлэ ӓй денгойд. Мяни неце приха и панихе айтха магадамха. А айт-сэ оли тяўзь хирид. Конз ненэ хиред тулешканзиба хяндаст сёмха, ка приха пясти кажин шижляспяй. Кажи рикой ненид кайкид хирид.

Мяндихе кацмаха: хирид ома тяўдэд лаўчан алуйжед, кайк ом риктуд. Вайше ӱксь хирь, кайкид тобъемб, иштуб мехен риндхил. Ноўзи неце приха, тули пертьхе и озути кайкиле нецен зверижен, кудамб кайкид рикой. Лиднан ижанд кюзуй:

— Мин синя нециш звериш пакичед?

Приха либути кажин корвиш ӱляхякс и сануй:

— Нецен коркте ку андад хобедад, ка миня синэй андан кажин.

Прихалэ анттихе сэн вердан хобедад, и хян тули хобеданке кодихе луяс бохаттуну.

Коўманзь, норемб, велль сануб:

— Ляхтта минэй-ки рахвахазэ да бохаттуда.

Лякси неце норемб велль. Астуй, астуй, тули jӓрвен рандха и иштуйхе рандайжелэ да пуношканзи ичезэ нинькерайжеспяй норад. А ведэхине нягишти хянэн и ойгензи ичезэ вунукан:

— Мяне кацмаха, мин неце приха сигя радаб.

Вунук тули приханнокс и кюзуй:

— Дедам кяски кюзуда, мин синя радад?

Приха сануй вастха:

— Ка миня пунон нинеспяй норад, мише сада тейшпяй мяннузиш возиш денгойд, миччид тё эт макснугой лопхусай ведэн элос. А ку нюгюдь-ки эт макской, ка миня кярин jӓрвен кячиле, а ведэн вен пячиле!

Неце ведэхижен вунук мяни деданнокс и сануб:

— Вой, дедам, иштуб мужик jӓрвен рандас, пуноб нинькераспяй норад и пакичеб мяннузиш возиш налоган макста мейдэн элос ведэн сювюдэс. А ку мё эм макской, ка хян кяриб jӓрвен кячиле, а ведэн веб пячиле!

Ведэхине сануб:

— Ве хянэлэ наку неце минун валдпалик; ку люкяйдаб сидя синус ӱлемба, ка и кяриб jӓрвен кячиле, и веб ведэн пячиле.

Вунук мяни нецен приханнокс и сануй:

— Дедам кяски синэй неце палик люкяйта. Ку синя люкяйдад сидя минус ӱлемба, ка денгад-ки андам.

Неце вунук эзмяй иче люкяйжи паликон луяс ӱляхякс, а конз неце палик ланкси, ка поль паликод маха упси.

Приха сануй:

— Са-шке палик маспяй и анда-шке минэй. Миня синун jӓльгид эн сашкандэ.

Ведэхижен вунук сай паликон и андой нециле прихалэ. Приха оти паликон кядэхе и сануй:

— Тулгха пильвед, миня люкяйдан паликон ненихе пильвихе, микш сэ синна тартуйжи.

— Вой, — сануй ведэхихен вунук, — ала люкяйда! Дедам миндай лаиб и лёб!

Лякси вунук паликонке дедойннокс и сануй, мише приха тахтойб тартутада палик пилвихе. Ведэхине сануй хянэлэ:

— Мянэ, куцу приха кандмаха хебод ӱмбри jӓрвес!

Мяни вунук и сануй прихалэ:

— Дедам кяски синэй хебо ӱмбри jӓрвес кандмаха. Кацкам кен паремба кандаб: ку синя кандад, ка денгад-ки андам.

Ведэхижен вунук кандашканзи эдэл, напри веда да кингитада, ка эй тяўдунд вягид, эй войнд кантта. А приха иштуйхе рацциле и аёй хебон сельгяс ӱмбри jӓрвес.

Мёст лякси ведэхижен вунук и сануб дедойле:

— Вой дедой! Миня эн войнд нимидя кантта, а неце приха яўгойдэн кескхе табази хебон да кандашканзи ӱмбри jӓрвес, ка хигостунд-ки эй!

Ведэхине сануй хянэлэ:

— Мянэ, куцу хяндаст ёкста jӓтойжин. Ку хян ом эзмяйне, ка и кяриб jӓрвен кячиле да веб ведэн пячиле.

Лякси вунук, тули и сануй прихалэ:

— Дедам кяски ёкста jӓтойжин. Кудамб мейшпяй ом эзмяйне, ка хян и вягестай ом. Ку синя олэд эзмяйне, ка максам синэй денгад.

А приха сануй хянэлэ:

— Кац, накка каскесэс ом минун коўманзь пойг. Хян-ки jӓтаб синдай, а эй вайше миня! Мянэ да киргоўда хяндаст, ёкскаха хян синунке.

Мяни вунук, киргоўзи, и пензхишпяй хюппяхти jӓниш да кут ёксэшканзи, ка вунук эй войнд сабутада хяндаст.

Неце вунук тули дедойннокс и сануй:

— Вой, дедам, хянэн коўманзь пойг-ки миндай jӓти тагана. А ми олижи, ку иче хян ёксэшканзи!

Ведэхине сануй:

— Мянэ, куцу хяндаст борцуйле.

Вунук мяни и сануй:

— Дедам кяски мейле борцуйдас. Кудамб сордаб тойжен, ка хян ом вягестай-ки. Ку синя вягестад миндай, ка андам синэй денгад.

Неце приха сануб:

— Мянэ-шке накху пихкуйжехе, сигя пензхан тага ом минун садавозне ук. Ишке хяндаст дубинал, ка силой кацум, кен кеда сордаб.

Мяни ведэхижен вунук, а сигя пензхан тага конди оли. Вунук ишки кондъяд дубинал, конди хюппяхти и табазихе вунукаха. Ванути, ванути хяндаст, пекси, пекси польхе сурмхасай. Неце вунук вяхяс хенгес хаби тули дедойннокс и сануй:

— Вой, дедам! Кац, эскай прихан садавозне ук-ки пекси и ванути миндай польхе сурмхасай. Ка мидя техта?!

Сануй ведэхине:

— Мянэ, кюзу прихал, ӓяк хян пакичеб денгойд?

Вунук мяни и кюзуй:

— Ӓяк синя пакичед денгойд?

Приха сануй:

— Наку неце минун шапкайне олижи тяўзь кулдад.

Вунук той ненэ тедод ведэхижелэ. А неце приха шапкаха рейгун теги, а шапкан аллэ кайвой хаўдан. Ведэхине той кулдад, вискайжи шапкаха, а ненэ кулдад ляби рейгус маха ланксиба, хаўдха! Ведэхине кандиши, кандиши, куни неце хаўд да шапук тяўдэд тегихе. Приха пани кулдад хавадохо и лякси кодихе. Тули хян кодихе, и эляшканзиба ненэ коўме мелекаст веллест бохатас, ка нюгюдь-ки эляба.