Иэлмуйнаа õли старикка и старуха.
Мэни старикка калаа õссамаа. Õсси куормаа калой, хайлиита. И тулõб тиэтӓ мӱӧ
котуосõõ. Рэпо лэжиб тиэ пӓӓллӓ. Старикка дуумааб, этти рэпо он таўгõнну.
Вискас куормаа пӓӓлээ. И юттõль: «Виэн старухаллõ. Лиэб ӱвӓ воротникка». Сӓӓ
õли туйску. Старикка тагааз эб ваатахтанну. Айн овõсс этэзи аjõ. Тули котуо.
Найзикко аваз вӓрӓјӓӓ. И старикка юттõли: «Миӓ силлõ суурõд подаркад тõйн».
«Нӓӱ̆тӓ вааттаа!»
Старикка нõйси куормаа пӓӓлт вӓллӓӓ.
И нõйсаб куляа ӱлээлээ. Эб õлõ калой. Эб õлõ воротниккаа. Старуха юттõõб: «Ай,
сиӓ вана клӓӓццӓ!» Эб õлõ калой. Эб õлõ воротникка».
Рэпо тӓмӓ калад вискõ, и ӱхтээ кокуо
кõйкк кантõ. Тулõб суси, и чӱзӱб: «Кусс сиӓ сайд?»
«А миӓ ӓннӓӓкаа пӱӱзин».
«А õпõта и минуата: анна и миллõ
калой сӱввӓ!»
«Эн анна! Пӱввӓ изэ! Силл он ӱвӓ
тожõ ӓнтӓ».
«Õпõта!»
«Õпõтан. Вот, нӓет сиӓлл он ярвõс
пролоба. И тõўккаа õмаз ӓнтӓ. И õлõ уомниккуоссаа. И калад тарттувад».
Вот, суси тõўкказ ӓннӓӓ. И
уомниккуоссаа иссу. И јӓӓтӱтти ӓннӓӓ. Мэнэвӓд каланикад вэттӓ вõттамаа. И эйттӱзивӓд,
этти суси исуб пролобаа тӱӱвэнн. А ӓнтӓ виэз и јӓӓтӱннӱ. Старикад и юттõõвад:
«Ва ми хуллу суси. Јӓӓтӱтти ӓннӓӓ». Нõйстии панкõйкаа лӱӧмӓӓ сутта пӓӓтӓ мӱӧ. И
рикотти пангõд. Суси хӱппии. Ӓннӓӓ јӓттии јӓхээсээ. Мэнэб мэццӓӓ и идгõб.
Пуутту рэпо вассаа.
«Митӓ идгõд?» - чӱзӱб.
«Ӓннӓӓ јӓӓтӱтин. А калой эн саанну».
«Михээ сиӓ нии вӓхӓӓ виинаа ейд, ко
граадусии синуз бõллу?»
«Хэрралл õли вахтитрэнки пиччӓ
руоска чӓезӓ. Эм пӓӓссӱ синнэ мэнэмӓӓ. А ко хэрраа хуллуд койрад такаа аjõвад!»
А рэпо и юттõõб: «Хуллупаа синуа
мааилмаз бõлõ. Ко ӓннӓӓ јӓтид. Јӓнэз он пиэни, ито пиккарайзõõ ӓннӓӓ каннаб. А
сиӓ и суурõõ јӓтид».
| 
