МУЖИК И РЕБОЙ 

Мужик аёй каланке, калад оли тяўзь лач. Аёй, аёй, нягеб: тен лаптас лумес венуб ребой. Неце ребой оли вайше хейтнус коллиякс. Мужик оти ребойн и мелетаб: микш-жо неце ребойхут ом колну. Пани сэн калалачху. А ребой оти сигяпяй кайкен калан и таци тедме лумелэ. Иче пагени jӓльгмяй, а лачун катой энччен картте.

Мужик тули кодихе, ичезэ акалэ сануб: «Миня, акайжем, олин базарал и остин калад. А вёл тел лёўзин луяс сурен коллиян ребойн, асту-шке, кацухтам!» Мяниба хё танхалэ, авайжиба лачун, а лачус эй олэ калад да ребойд-ки.

Неце ребой мяни, кайкен калан тедме керази и вей сэн нагрижкопха. Тули сихе хяндиказ, кюзуб ребойл: «Мин синя, комайне, сёйд?» Ребой сануб: «Ка калад сёйн!» Хяндиказ мёст кюзуб: «Кус синя отид нецен калан?» Ребой сануб вастха: «Авой, комайне, миня ку олин кюляс, ка иштумой ляхткен рёўналэ, а хяндан пястин ляхткехе. А хяндха-сэ муга ё ӓй калад тартуй, сидя миня сёйн-ки. Мянэ синя-ки, комайне, ишттэ ляхткен рёўналэ, хянд пяста ляхткехе и пидя сигя хяткемба. И хоть калад ликутэлэшкандэба хяндад, ка синя ала хяндад ота».

Мяни хяндиказ, муга теги-ки, кут ребой оли невону. Иштуйхе ляхткен рёўналэ, хяндан пясти ляхткехе. А ирдал оли сурь пакайне. Хяндикахан хяндан-сэ кюльми-ки ляхткехе. Тахтойб хяндиказ хяндан отта, а эй вой. Найжед тулиба ведэлэ  и заводиба хяндикаст корендойл лёда. Хяндиказ хаби пагени найжишпяй, а хянд ляхткехе jӓй.

Куни найжед олиба ёгенно, ребой тули ӱхтэн найжен пертьхе, а найжел оли сегойтадуд кюрзид столал. Ребой сёй нецен тахтхан, а падаспяй jӓгмяйжед типпуд кумайжи ичезэ пяхя и ёксэшканзи тедме мецха. Тел хомайчи хяндикахан, кудамб ёкси хяндата и вонгуй. Ребой кюзуй: «Комайне, хяндан-сэ куна jӓтид? Микш хяндад-сэ эй олэ?» Хяндиказ ребойле вастха: «Сидя миндай кяскид мянда кюляхя да пястта хянд ляхткехе. Ну иштумой миня ляхткен рёўналэ, пястин хяндан ведэхе, а хяндан минай кюльми. Сил айгал тулиба найжед ведэлэ и миндай лёйба корендойл польхе сурмахасай, хаби пагенин». Неце ребой сануй хяндикахалэ: «А миндай, кацу-шке, комайне, муга лёдихе, конз миня тулин синдай кюляхя варъёйчемха, ка эскай пя-ки хаўгени, кац, кайкен пян муретихе, айвод пяспяй ирдалэ ёксэба. Хаби пагенин сигяпяй. Хяндиказ уской-ки. Наку митте ребой валлишпя ом!