Õли эминтимӓ. Тӱттӓриккõйзõлл õли чӱммээ вуотта васс. А эминтимӓӓ тӱттӓрэлл õли виистõшшõмõт вуотта. И тӓмӓ эб тахтонну, этти старикаа тӱтӓр элӓйсси сииннӓ. Юттõõб старикаллõ: «Виэ õмас тӱтӓр мэццӓӓ. Миӓ панõн таппура-куонталод, и чӓси-чедрӓпуу. И пуол сатаа панõн тӓллээ чӓси-вӓрттӓнии.

Нӱт старикка ракõтаб овõсса и изэ идгõб. Но тӱттӓриккõйзõллõ эминтимӓ пани кааса апойт капуссой, кахс пихуа сууримой, и кахс пихуа эрнэй, вииз брюкваа, кõм рэччӓӓ, и нэллӓ лууккаа, и кахс пихуа явой, и чӱммээ куонталаа. И штоб нӓтэлисс õлõйс чедрӓттӱ.

Старикка пани тули-нӓӱ̆ттимиӓ, и чӱммээ бучкаа пӓрэйтӓ, и ящщикаа спичкой. Јӓтти старикка тӱттӓрээ мэццӓӓ зэмлӓнкаасõõ куонталой чедрӓмӓӓ.

Тӱттӓрикко сэкас каккуй вӓхӓккõйзõõ, рэхтэлкаккуй. И нõйси сӱӧмӓӓ. Ёхс пиккарайнõ иири. И юттõли: «Анна миллõ каккуа. Миӓ силлõ лиэн кõлпуза. Эд нõйзõ ичӓвӧймӓӓ, эд нõйзõ иткõмаа».

«Антõ каккуа».

«Нӱд миӓ силлõ юттõõн ютуу. Тулõб õхтагонна кару, и юттõõб: «Нõõмма пимэпилккуа мӓнчимӓӓ. И кару силлõ юттõõб: «Ко тапаан чини, сиз миӓ синну сӱӧн. А ко н тапаа, сиз миӓ силлõ аннан култаа õпõата. И каръяа лэхмии, и дабунии опõзиита, сэйцеэ кирстуа сõпõйта мõнõллайсии. И нõйзõб синуа суваамаа эминтимӓ. – Иири паятти. – А миӓ сис тулõн, ко кару силлõ пиккарайзõõ челлӓӓ аннаб, ко нõõтта пимэпилккуа мӓнчимӓӓ. А миӓ нõõн сэйнии мӱӧ юониттõлõмаа. А кару нõõб пӱӱтӓмӓӓ. Тӓмӓ минуа эб тапаа. А силмӓд сивомма кõвõпи чини рӓтээкаа».

Нӱт тули õхтагонн кару. А кару вэть каст эб тӓӓтӓннӱ, митӓ иири паятти тӱттӓриккõйзõлõõ. Колизõб кару ухсõõсõõ. Тӱттӓриккõйн чӱзӱб: «Чен он?»

«Миӓ õлõн, мэццӓкару. Лаззõ минуа суојõттõлõмаа: милл он айвуо чӱлмӓ».

Тӱттӓриккõйн юттõõб: «Пиӓб ласкõа суојõттõлõмаа». Лахчи.

Кару тули: «Ах, ах, куй ӱвӓлээ силл хайзõб кõйкк. Каккуй õлõд тэхнӱ?»

«Тэйн. Да энӓпии эб јӓӓннӱ. Ато õлõйзин антанну и силлõ. Да энӓпӓӓ бõлõ».

Кару юттõõб: «Бõлõ, нии давай пимэпилккуа мӓнчимӓӓ. Эб лиэ силлõ сиз нии ичӓвӓ».

Но нõйсõвад лукõмаа, куммалл силмӓд чиин панна. Но ӱфс, кахс, кõлмõд лукõвад. Куммалл тулõб кõлмайз, сэнэлл и пиӓб ӓсилмӓд чиин панна. Алкõ кару лукõа, каннии лукõа: ӱфс, кахс, кõлмõд. Карулõõ и силмӓд чиин пити панна. Кару антõ тӓллээ пиэнээ челлӓӓ.

«Сиӓ юониттõлõ челлӓӓкаа. Милл он силмӓд чиин. Миӓ эн нӓе».

Ситõ карулт силмӓд чиини. Челлӓӓ вõтти чӓтээ. Тули иири. Тӓм иирэлээ каглаа челлӓӓ ситõ. Изэ мэни ахъюо алаа пакуо. Вот иир и юониттõлõб силтаа мӱӧ, лакõа мӱӧ, сэйнии мӱӧ. Кару пӱӱтэли уомниккуоссаа. Эби таванну. Вӓсӱ кару мӓнчиӓ. Юттõõб: «Аваа силмӓд авõõ. Миӓ силлõ махзан кõйкк суурõõ махзуо. Миӓ õлõн айвуо вӓсӱннӱ".

А тӱттӓриккõйн юттõõб: «Миӓ õлõн энӓб вӓсӱннӱ, дай митӓйд эн юттõõ. И синуа пэлчӓӓн».

«Ӓлӓ пэлчӓӓ минуа. Аваа силмӓд авõõ!»

Аваз силмӓд авõõ. Вõтти иэстӓӓ челлӓӓ иирэлт чӓтээ. И аваз карулт силмӓд. Сис кару юттõли: «Аннан миӓ силлõ дабунии опõзиита, суурõõ каръяа лэхмии, сэйцеэ кирстуа сõпаа, суурõõ боџгаа култаа, тõйзõõ õпõата. Аннан миӓ силлõ сэйцеэ сиглаа вахчизиита, и кахс каляскаа каўнии раттайкаа. Кõлтõйзõõ луокаакаа опõзõд ракõтõтту лиэвӓд».

И кару мэни вӓллӓӓ. И тӓллээ кõйкк јӓйвӓд.

Нӱт старикка, исӓ, мэнэб вааттамаа. А Мажас куцõттии тӱттӓриккõйсс.

«Куй сиӓ, Маша, элӓд?»

«Элӓн, ӓтӓни, касс он мину риккаўз. Канэ он кõйкк минуу. Миллõ кару антõ».

Нӱд мэнэвӓд изӓӓкаа котуо. А нӓйлл õли койра эминтимӓллӓ. И койра хаўкуб: «Тјӓф, тјӓф, суур каръя лэхмии тулõб, и дабуни опõзии. Маша тулõб. Култаа туоб. Õпõат туоб. Ай õннõва арматтойнõ Маша».

«А минуу Фъёкла мэнэб, нии энӓб туоб».

Тули Маша рихээ. Лэхмӓд и опõзõд аккуналл овад. И култа бочкõйкаа.

Эминтимӓ эб антанну Мажалõõ сӱввӓ, а мэни ё Мажаакаа мэццӓӓ нӓӱ̆ттӓмӓӓ зэмлӓнкаа эмӓӓ тӱттӓрэллэ, што туожõ риккаўтта сайсс. Но ё мэнивӓд. Тӱттӓрэллээ пани лӓнникко вõйта, суурõõ лобаткаа лихаа. Пани кукшинаа ӱлэттӓ, суурõõ лаадгуо ворогаа, шайкаа мэттӓ, коко вӓрчи явойт, кахс ниппуа сӱӓммиит. И јӓтти синнэ. И туливад вӓллӓӓ Мажаакаа. А Фъёкла јӓтти.

Тõйзõлл пӓйвӓӓ мэни вааттамаа, а тӱтӓрт и элоза бõлõ. Кару рэпи. А ко тӓм тэчи каккуй, тули иири, чӱсӱ каккуй. Эб антанну. Тӓмӓ тайчинаакаа висказ ииртӓ. А тули кару. Тӓмӓ аваз ухзõõ ӱвии миэлии. Дуумаз, этти туоб паллё култаат, аннаб. И лучи лугуу. Тӱттӓриккõйн лучи. Энэссӓ алкõ: «Ӱфс, кахс, кõлмõд». И пити силмӓд чиин панна кару тӓлтӓ. И кару нõйси пӱӱтӓмӓӓ и сэй. Эмӓ тулõб ваатамаа тõйзõлл пӓйвӓӓ. А койра хаўкуб вӓрӓјӓӓ тӱвэнн: «Тјӓф, тјӓф, Фъёкла он рэвиттӱ, каруу рэвиттӱ. Фъёкла котуо эб тулõ. Кару лууд лучи. Силтаа мӱӧ лэживӓд».

Силтаа мӱӧ и овад лууд.