Касэ õли минуу айканн. Мээз аjõли суудналла
мэрэллӓ. И синнэ уппоз. И найн кõввии иччи котонн. Нõйси ӧӧллӓ паха войма чӓӱ̆мӓӓ
коттоо. Тооже кахстõшшõмõтт тунниа. Тӓмӓ, найн, макази рихэзӓ ӱфснӓӓ. Тӓмӓ ӧӧллӓ
тули, эйтти тӓммӓӓкаа маккаамаа. И юттõõб: «Миӓ эн õõ кооллу, миӓ каўкаанна õлин.
Эн пӓӓзнӱ коттоо».
Найн нõйси ӱллээз оомнииз. Тӓллээ
нику тули ӓммӓ. Ӓммӓлээ юттõли, што пойк õли котонн. А эмӓ сэ юттõõб: «Эб õõ
тэчи. Тӓмӓ миннуа эб jӓттӓйзи. Туллõйз вааттамаа. Силлõ, – юттõõб, – жениха чӓӱ̆б».
Ӓммӓ арвас сиз: «Силлõõ паха войма чӓӱ̆б».
Вот сиз õли вээлӓ тõйн пойка ӓммӓллӓ.
Нох, сэ бõллу вээлӓ найзиза. И вот пантии, штоб миндяакаа эйттӓйз маккаамаа.
Пойка эб тахтонну. Таки пантии. Но вот сэ и тули паха войма. И õли чертатту ӱмпӓр
нӓйтӓ чиръяакаа. Но сиз тӓмӓ тули чехс-ӧӧллӓ. Юттõõб: «Арвазид!»
Личи õли чертта тэхтӱ. Чӱтӱ õли личи
черттаа. Нии ивууссиисс тõмпõзи. А тõйзõлл ӧӧтӓ jõка пайкказа чертаттии. А сиз лаггõõ
õцасса пӓӓси риххээ. Сиз тааз юттõõб: «Ая чӱтӱ вӓллӓӓ. Ато миӓ синуу курисан».
Юõлтии: «Элкаа лииккугаа! Элкаа эйттӱгаа!
Ӱххээ тунни он. Сиз мээб вӓллӓӓ».
А кõлмõттомалл ӧӧтӓ тули нии тэчи
куялõõ нику суурõõ тулõõ. – «Мэнкаа вӓллӓӓ, ато пõлõтта».
Нӓвӓд тааз эвӓд лииккунну. Сиз и рӓӓгаб:
«Ха! Арвазид!»
И jӓтти. Энӓпӓӓ эб туллу. Ато õллõйз
куриссанну найзõõ.
Миӓ вээлӓ тӱттӓрикконн õлин, ко õли.
Сэ он тэчи, што паха войма туõб.
| 
